വാണിയും രണ്ടും കല്‍പ്പിച്ചു തന്നെ. മലയാള സിനിമയില്‍ നിന്ന് കുറച്ചുകാലമായി വിട്ടുനില്‍ക്കുന്ന നടി വാണി വിശ്വനാഥ് രാഷ്ട്രീയത്തിലേക്ക് ഇറങ്ങാനൊരുങ്ങന്നതായി റിപ്പോര്‍ട്ട്. കേരളത്തിലല്ല, ആന്ധ്രയിലാണ് വാണി രാഷ്ട്രീയ അരങ്ങേറ്റം നടത്തുന്നത്. മുഖ്യമന്ത്രി ചന്ദ്രബാബു നായിഡുവിന്റെ തെലുങ്കുദേശം പാര്‍ട്ടിയാണ് വാണിയെ രാഷ്ട്രീയത്തിലേക്ക് ക്ഷണിച്ചിരിക്കുന്നത്.
തെലുങ്ക് രാഷ്ട്രീയത്തിലെ ഫയര്‍ ബ്രാന്‍ഡായ റോജയെ എതിരിടുകയെന്ന ജോലിയാണ് വാണിക്ക് ചന്ദ്രബാബു നായിഡു
നല്‍കിയിരിക്കുന്നതെന്നാണ് റിപ്പോര്‍ട്ട്. ഇതിനെക്കുറിച്ച് വാണി ഇതുവരെ പ്രതികരിച്ചിട്ടില്ല.
ജഗന്‍മോഹന്‍ റെഡ്ഡിയുടെ വൈഎസ്ആര്‍ കോണ്‍ഗ്രസിന്റെ കരുത്തരായ നേതാക്കളില്‍ ഒരാളാണ് റോജ. തെലുങ്കുദേശം പാര്‍ട്ടിയിലൂടെ രാഷ്ട്രീയത്തിലെത്തിയ റോജ പിന്നീട് വൈഎസ്ആര്‍ കോണ്‍ഗ്രസിലേക്ക് ചേക്കേറുകയായിരുന്നു. ശോഭാ നാഗിറെഡ്ഡിയുടെ മരണത്തോടെ വൈഎസ്ആര്‍ കോണ്‍ഗ്രസിലെ മുന്‍നിര നേതാവായി മാറിയ റോജ ഇന്ന് ചന്ദ്രബാബു നായിഡുവിന്റെ ഏറ്റവും വലിയ വിമര്‍ശകയുമാണ്.
അതുകൊണ്ട് തന്നെയാണ് ആക്ഷന്‍ ഹീറോയിനെയിറക്കി റോജയെ ഏതു വിധത്തിലും ഒതുക്കാന്‍ നായിഡു തീരുമാനിച്ചത്. 2019ലെ നിയമസഭാ തെരഞ്ഞെടുപ്പില്‍ വാണിയിലൂടെ വനിതാ വോട്ടുകള്‍ സമാഹരിക്കാമെന്നാണ് തെലുങ്കുദേശത്തിന്റെ കണക്കുകൂട്ടല്‍. ജയിച്ചാല്‍ വാണി ആന്ധ്രാ മന്ത്രിയായാലും അത്ഭുതമില്ല.