രാജ്യം അംഗീകരിച്ച നടനായാലും, സുരാജ് വെഞ്ഞാറമൂടിന്റെ നായികയാകാന്‍ താനില്ലെന്ന് പ്രശസ്ത താരം പ്രിയാമണി. പരുത്തി വീരന്‍ എന്ന കാര്‍ത്തി ചിത്രത്തിലൂടെ ദേശീയ അവാര്‍ഡ് ജേതാവായതിനു ശേഷമാണ് പ്രിയാമണിയെ സിനിമാ ലോകം കഴിവുള്ള നടിയായി അംഗീകരിച്ചത്. ദേശീയ അവാര്‍ഡിന്റെ തിളക്കത്തില്‍ പ്രിയാമണിയെത്തേടി കരുത്തുറ്റ സ്ത്രീ കഥാപാത്രങ്ങള്‍ എത്തിയിരുന്നു. രഞ്ജിത്തിന്റെ \'തിരക്കഥ\'യിലെ മാളവിക എന്ന കഥാപാത്രവും രഞ്ജിത്തിന്റെ തന്നെ മമ്മൂട്ടിച്ചിത്രമായ പ്രാഞ്ചിയേട്ടനിലെ പത്മശ്രീ എന്ന കഥാപാത്രവും പ്രിയാമണിയുടെ കരിയറിലെ മികച്ച വേഷങ്ങളാണ്. കഥ ഇങ്ങനെയൊക്കെയായാലും മലയാളികളുടെ പ്രിയങ്കരനായ സുരാജിന്റെ, അതും രാജ്യം എറ്റവും മികച്ച നടനായി അംഗീകരിച്ച ദേശീയ അവാര്‍ഡ് ജേതാവിന്റെ നായികയാകാനില്ലെന്ന് പ്രിയാമണി പറഞ്ഞത് അഹങ്കാരം തന്നെയല്ലേ?  പ്രിയാമണിയുടെ ന്യായീകരണം 
“ ഒരു സിനിമ വരുമ്പോള്‍ ആ സമയത്ത് നമ്മള്‍ ഏതു ലെവലിലാണോ നില്‍ക്കുന്നത്, അതേ റാങ്കിലോ അതിനു മുകളിലോ വരുന്ന നായകന്‍മാര്‍ക്കൊപ്പം അഭിനയിക്കുന്നതാണ് നല്ലത്. ഞാനിക്കാര്യം ശ്രദ്ധിച്ചെന്നു മാത്രം. അല്ലെങ്കില്‍ മാധ്യമങ്ങള്‍ പറയില്ലേ സൂപ്പര്‍ താരങ്ങള്‍ക്കൊപ്പം അഭിനയിച്ച നടിയിപ്പോള്‍ ചെറിയ നായക നടന്‍മാര്‍ക്കൊപ്പം അഭിനയിക്കുന്നുവെന്ന്. അങ്ങനെ അഭിനയിച്ചിട്ടും ഹിറ്റാകാതെ പോയാലുള്ള അവസ്ഥയൊന്നാലോചിച്ചു നോക്കിയേ ...” .
ഒരു താരത്തിന് ആദ്യം വേണ്ടത് ആത്മവിശ്വാസമാണ്. അതില്ലാത്തതുകൊണ്ടാണ് പ്രിയാമണിക്കിങ്ങനെ ബാലിശമായി സംസാരിക്കേണ്ടി വന്നത്. സിനിമയില്‍ ആരുടെയും സ്ഥാനം ശാശ്വതമല്ല. 
വര്‍ഷങ്ങള്‍ക്കുമുമ്പ് കരുമാടിക്കുട്ടന്‍ എന്ന സിനിമയില്‍ കലാഭവന്‍ മണിയ്‌ക്കൊപ്പം അഭിനയിക്കാന്‍ താനില്ലെന്ന് പറഞ്ഞ ദിവ്യാ ഉണ്ണിയ്ക്ക് പിന്നീട് തന്റെ കരിയറില്‍ കാര്യമായൊന്നും ചെയ്യാന്‍ കഴിഞ്ഞിട്ടില്ല. എന്നാല്‍ താരമൂല്യം ഏറെയുണ്ടായിരുന്ന സമയത്താണ് ഉര്‍വശി അന്നത്തെ ചെറിയ നായക നടന്‍മാരായിരുന്ന ജഗദീഷിനൊപ്പവും സായ്കുമാറിനൊപ്പവുമൊക്കെ അഭിനയിച്ചത്. എന്നിട്ടും ഉര്‍വശിയുടെ മൂല്യത്തിന് അന്നും ഇന്നും തെല്ലും കുറവു വന്നിട്ടില്ല.
കിംഗ്ഖാനൊപ്പം ചെന്നൈ എക്‌സ്പ്രസില്‍ ഐറ്റം ഡാന്‍സ് അഭിനയിച്ചതിന്റെ ത്രില്ലിലാണ് പ്രിയാമണി ഇപ്പോഴും. എന്നാല്‍ ആ ഓര്‍മ്മ എന്നും സിനിമാ ലോകത്തിനുണ്ടാവുമെന്നു കരുതുന്നത് വിഡ്ഢിത്തമല്ലേ?
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക https://www.facebook.com/Malayalivartha