അമാനുഷിക ശക്തി പ്രമേയമാക്കി സിനിമകൾ ചെയ്യുമ്പോൾ പലപ്പോഴും അനുഭവപ്പെടുന്ന ആദ്യശ്യമായ ചില ശക്തികളെ കുറിച്ച് പല സിനിമാ പ്രവർത്തകരും അനുഭവം പങ്കുവച്ചിട്ടുണ്ട്. അത്തരത്തിലുള്ള ഒരു അനുഭവം പങ്കുവയ്ക്കുകയാണ് സംവിധായകന്‍ രഞ്ജിത്ത് ശങ്കർ.

ജയസൂര്യ രഞ്ജിത് ശങ്കര്‍ കൂട്ട്ക്കെട്ടില്‍ ഒരുങ്ങുന്ന ചിത്രമാണ് പ്രേതം 2. ചിത്രത്തിനെ കുറിച്ചുളള പ്രഖ്യാപനം നടത്തി കഴിഞ്ഞു. ഈ അവസരത്തിലാണ് തിരുവനന്തപുരത്തെ ഒരു ഹോട്ടല്‍ മുറിയിൽ വച്ച് തനിക്ക് അനുഭവപ്പെട്ട അദൃശ്യശക്തിയെക്കുറിച്ച് സംവിധായകന്‍ പറയുന്നത്. തന്റെ ഫേസ്ബുക്‌പോസ്റ്റിലൂടെയാണ് രഞ്ജിത് ശങ്കര്‍ ഇക്കാര്യം തുറന്നുപറയുന്നത്.

ഫേസ്ബുക് പോസ്റ്റ് ഇങ്ങനെ : തിരുവനന്തപുരത്തെ ഒരു പ്രശസ്തമായ ഹോട്ടലില്‍ താന്‍ ഒരു രാത്രി താമസിച്ചിരുന്നു. ആ ഹോട്ടലില്‍ ഒരു ആത്മാവിന്റെ സാന്നിധ്യമുണ്ടെന്ന് തന്റെ സുഹൃത്ത് തനിയ്ക്ക് മുന്നറിയിപ്പ് നല്‍കിയിരുന്നു. ആ ചിന്ത തന്റെ ഉളളിലുണ്ടായിരുന്നു. മുറിയില്‍ എത്തിയപ്പോള്‍ മുതല്‍ ആരോ തന്റെ ഒപ്പമുണ്ടെന്നുള്ള തോന്നല്‍ ശക്തമായി അനുഭവപ്പെട്ട് തുടങ്ങി. ആ രാത്രി മുഴുവന്‍ തന്നില്‍ ആ തോന്നല്‍ ഉണ്ടായിരുന്നു. ഇത് കേള്‍ക്കുമ്ബോള്‍ നിങ്ങള്‍ക്ക് ഒരു തമാശയായി തോന്നാമായിരിക്കും. പക്ഷേ മനുഷ്യന്റെ മനസ്സാണ് ഇതെല്ലാം സൃഷ്ടിക്കുന്നത്‌'- രഞ്ജിത്ത് ഫേസ്ബുക്കില്‍ കുറിച്ചു.

പ്രേതം ആദ്യഭാഗത്തിന് മികച്ച സ്വീകാര്യതയായിരുന്നു ലഭിച്ചിരുന്നത്. ഗോവിന്ദ് പത്മസൂര്യ, അജു വര്‍ഗീസ്, ഷറഫുദ്ധീന്‍, ഹരീഷ് പേരടി, ശ്രുതി രാമചന്ദ്രന്‍, ധര്‍മജന്‍ തുടങ്ങിയവരായിരുന്നു ആദ്യ ഭാഗത്തില്‍ കേന്ദ്രകഥാപാത്രങ്ങളെ അവതരിപ്പിച്ചത്. കൃസ്തുമസ് റിലീസായിട്ടാകും പ്രേതം 2 തിയേറ്ററുകളില്‍ എത്തുന്നത്.