ജൂൺ 24 ന് ആരംഭിച്ച ബിഗ് ബോസ് സംഭവ ബഹുലമായ കഥാ സന്ദർഭത്തിലൂടെ ജൈത്രയാത്ര തുടരുകയാണ്. ഏഴ് മത്സരാർത്ഥികളുമായാണ് ബിഗ്‌ബോസ് ചാനൽ ഷോ പുരോഗമിക്കുന്നത്. ഇനി രണ്ടാഴ്ചകൾ മാത്രമാണ് ഷോ ഉള്ളത്. അതിനിടയിൽ സംഭവ ബഹുലമായ കാര്യങ്ങളാണ് ബിഗ്‌ബോസ് വീട്ടിൽ അരങ്ങേറുന്നത്. പേളി ഇത്ര തിടുക്കപ്പെട്ട് തീരുമാനമെടുത്തത് എന്താണെന്ന് അറിയില്ല. പേളിയുടെ തീരുമാനം കുടുംബത്തെ ബാധിച്ചുവെന്നും മാണി പോള്‍ പ്രതികരിച്ചത്. ഞാൻ ബിഗ് ബോസ് സ്ഥിരമായി കാണാറില്ല. ഒന്നാമത്തെ കാരണം ഞാൻ വളരെയധികം ജോലി തിരക്കിലാണ്. എന്നും യാത്രകളും ട്രെയിനിങ്ങുകളും. രണ്ടാമത്തെ കാരണം പേളിയും ശ്രീനിഷും തമ്മിലുള്ള അടുപ്പം വന്നതോടെ വീട്ടുകാർക്ക് സ്വാഭാവികമായും അത് കാണുന്നത് അത്ര രസകരമല്ല.

വലിയ വിവാദമൊക്കെ ഉണ്ടാവുമ്പോൾ ആ എപ്പിസോഡ് ഒക്കെ കാണും. അല്ലാതെ കൃത്യമായി കാണാറില്ല. അതിനാൽ ആധികാരികമായി പ്രോഗ്രാമിനെ വിലയിരുത്താൻ കഴിയില്ല. ഞങ്ങളും കൺഫ്യൂഷനിലാണ്. പേളിയും, ശ്രീനിയും ശരിക്കും പ്രണയിക്കുകയാണോ അതോ ബിഗ് ബോസ് അവർക്ക് എന്തെങ്കിലും ടാസ്ക്ക് കൊടുത്തതാണോ എന്നൊന്നും ഞങ്ങൾക്കും അറിയാൻ പറ്റുന്നില്ല. എന്നാൽ, ഇടക്കവൾ വിവാഹത്തെ കുറിച്ചൊക്കെ പറഞ്ഞു കണ്ടു.

ഞങ്ങൾക്കും ഒന്നും മനസ്സിലാവുന്നില്ല. അവൾ പുറത്തു വന്നാലേ എന്താണ് സംഭവിക്കുന്നത് എന്നറിയാൻ സാധിക്കൂ. ഞാൻ സമചിത്തതയോടെയാണ് ഇത് കാണുന്നത്. എന്നാൽ, പേളിയുടെ അമ്മയും അനിയത്തിയും കുറച്ചു വിഷമത്തിലാണ്. ഞാൻ അവർക്ക് പരമാവധി സപ്പോർട്ട് കൊടുത്തു ഫീൽ ചെയ്യാതെ നിൽക്കുന്നു. എനിക്ക് പേളിയോട് ഒരു ദേഷ്യവും ഇല്ല. എന്നാൽ എന്താണ് നടക്കുന്നത് എന്ന കൺഫ്യൂഷനുണ്ട്. പേളി പുറത്തു വരുമ്പോൾ അവൾ എടുക്കുന്ന എന്ത് തീരുമാനവും ഞങ്ങൾ സ്വീകരിക്കും. ശ്രീനിഷിനെ ഞാൻ ഷോയിൽ കണ്ടു. വളരെ നല്ലൊരു പയ്യനായി തോന്നി.

ഇതൊരു റിയാലിറ്റി ഷോ ആയതു കൊണ്ടാണ് ആളുകൾ ഇപ്പോ ജഡ്ജ് ചെയ്യുന്നത്. ഷോ കഴിഞ്ഞാൽ പിന്നെ ആർക്കും ഇതിൽ താല്പര്യമൊന്നും ഉണ്ടാവില്ല. വിമർശകർ വിമർശിക്കട്ടെ. ഫാൻസ്‌ പിന്തുണക്കട്ടെ. അതൊക്കെ അവരുടെ സ്വാതന്ത്ര്യം. ഇത്രയും ദിവസം കഴിഞ്ഞു തിരിച്ചു വരുമ്പോൾ എങ്ങനെയായിരിക്കും എന്നറിയില്ല. പഴയ പോലെ എന്‍റര്‍ടെയിനറായ പേളി വരുമോ, കരയുന്ന പേളി വരുമോ എന്ന് നമുക്ക് നോക്കാം. 

തനിക്ക് ശ്രീനിഷിനെ ഇഷ്ടമാണെന്നും തന്റെ മമ്മിയോട് മോഹന്‍ലാല്‍ സംസാരിക്കണമെന്നും പേളി ഷോയില്‍ ആവശ്യപ്പെട്ടിരുന്നു. സമാനമായ ആവശ്യവുമായി ശ്രീനിഷും രംഗത്തെത്തിയിട്ടുണ്ട്. ഇതേതുടര്‍ന്ന് ഇരു വീട്ടുകാരെയും ഹൗസില്‍ എത്തിച്ച്‌ സംസാരിക്കാന്‍ അവസരം ഒരുക്കാമെന്നും ഇരുവര്‍ക്കും നല്ല ഭാവി നേരുന്നുവെന്നും മോഹന്‍ലാല്‍ പറഞ്ഞു. ഇതിനിടെ, ബിഗ് ബോസില്‍ ഹൗസില്‍ വച്ച്‌ മോതിരം മാറ്റം നടത്തണമെന്ന് ഒരു വിഭാഗം ആവശ്യപ്പെട്ടപ്പോള്‍, ജീവിതമാണ് തീരുമാനം ചിന്തിച്ചെടുക്കണമെന്ന അഭിപ്രായമാണ് മറു വിഭാഗം പങ്കുവെച്ചത്.

ശക്തമായി തന്നെ പിന്തുണയ്ക്കുന്ന ശ്രീനിയോട് തനിക്കും പ്രണയമാണെന്ന് പേളി തുറന്നുപറയുകയായിരുന്നു. ബിഗ് ബോസ് വീട്ടില്‍ എത്തിയ മോഹന്‍ലാലും ഇക്കാര്യത്തെക്കുറിച്ച് ചോദിച്ചിരുന്നു. മോഹന്‍ലാല്‍ ഇതിനെക്കുറിച്ച് ചോദിച്ചപ്പോള്‍ ബിഗ് ബോസും മോഹന്‍ലാലും അമ്മമാരും അറിയുന്നതിലുള്ള നാണത്തോടെയായിരുന്നു പേളി ഇക്കാര്യത്തെക്കുറിച്ച് സമ്മതിച്ചത്.