മലയാളികളുടെ പ്രിയതാരം മോഹന്‍ലാലും ഭാര്യ സുചിത്രയും 31 ആം വിവാഹ വാര്‍ഷിക നിറവിലാണ്. വിവാഹ വാര്‍ഷികത്തില്‍ ഭാര്യ സുചിത്രയോടൊപ്പമുള്ള പുതിയ ചിത്രം പങ്കുവെച്ച് മോഹന്‍ലാല്‍. ഫേസ്ബുക്കിലൂടെയാണ് പുതിയ ചിത്രം പുറത്തുവിട്ടത്. വളരെ സന്തോഷത്തില്‍ എന്ന ടൈറ്റിലോടെ ഭാര്യയ്‌ക്കൊപ്പം ഇലകള്‍ക്കിടയില്‍ നില്‍ക്കുന്ന ചിത്രമാണ് മോഹന്‍ലാല്‍ പങ്കുവെച്ചത്. 

താരത്തിന് സോഷ്യല്‍ മീഡിയയിലൂടെ നിരവധി ആശംസാപ്രവാഹമാണ് വരുന്നത്. 1988 ഏപ്രില്‍ 28 ന് തിരുവനന്തപുരത്തെ ആറ്റുകാല്‍ ഭഗവതി ക്ഷേത്രത്തില്‍ വെച്ചായിരുന്നു ഇവരുടെ വിവാഹം. സിനിമാപ്രവര്‍ത്തകരും സുഹൃത്തുക്കളുമടക്കം നിരവധി പേരാണ് വിവാഹത്തില്‍ പങ്കെടുത്തത്. വിവാഹ വീഡിയോ സോഷ്യല്‍ മീഡിയയിലൂടെ നേരത്തെ തന്നെ വൈറലായിരുന്നു

കല്യാണത്തിന് മുന്‍പുള്ള രസകരമായ ചില സംഭവങ്ങള്‍ ലാലേട്ടന്‍ തന്നെ പലയിടത്തും പങ്കു വച്ചിട്ടുണ്ട്. തമിഴിലെ പ്രശസ്ത നിര്‍മാതാവ് ബാലാജിയുടെ മകളാണ് സുചിത്ര. ലാലേട്ടന്റേത് ഒരു പ്രണയ വിവാഹമായിരുന്നു എന്ന് അധികമാര്‍ക്കും അറിയില്ല. സുചിത്ര ലാലിന്റെ കടുത്ത ആരാധികയായിരുന്നു. 

എന്നും കാര്‍ഡുകളൊക്കെ അയക്കുമായിരുന്നു. ആദ്യം ജാതകം ചേരാതെ ആയതോടെ വിവാഹം നിന്ന് പോയി. രണ്ട് വര്‍ഷം ലാല്‍ അറിയാതെ സുചിത്ര നടനെ പ്രേമിച്ചു. രണ്ടു വര്‍ഷമായി തന്നെ കാത്തിരുന്ന താന്‍ അറിയാതെ തന്നെ സ്‌നേഹിച്ച സുചിത്രയെ ലാലേട്ടന്‍ മിന്നു ചാര്‍ത്തുകയായിരുന്നു.