എന്നാ ഒണ്ട് വിശേഷം, സുഖമല്ലേ ഇന്ന് ചോറിന് എന്നതാരൂന്നൂ കൂട്ടാന്‍ തനി പാലാ ഭാഷ പറഞ്ഞ് മിനി സ്‌ക്രീനില്‍ ലക്ഷക്കണക്കിന് പ്രേക്ഷകരുടെ കണ്ണിലുണ്ണിയായി മാറിയ റിമി , റോയ്‌സുമായുള്ള ജീവിതം അവസാനിപ്പിക്കുന്നുവെന്ന വാര്‍ത്ത പാലാക്കാര്‍ക്ക് വിശ്വസിക്കാനാവുന്നില്ല. പാലാ ളാലം പള്ളിയില്‍ ക്വയറില്‍ പാടി, പിന്നീട് സെന്റ് മേരീസ് സ്‌കൂളില്‍ നിന്നു കലോല്‍സവ വേദികളില്‍ തിളങ്ങിയ റിമിയുടെ വളര്‍ച്ച പ്രശസ്തമായ ആ പൊട്ടിച്ചിരിപ്പോലെ വളരെ പെട്ടെന്നായിരുന്നു.

ചിങ്ങമാസം വന്നു ചേര്‍ന്നാല്‍ എന്ന ആദ്യ ഗാനം പാടുമ്പോള്‍, പാലാ പുത്തന്‍ പള്ളിക്കുന്നിലെ കൊച്ചു വാടക വീട്ടിലായിരുന്നു റിമിയും കുടുംബവും . എനിക്ക് അറിയപ്പെടുന്ന പിന്നണി ഗായികയായി മാറണം. പറ്റിയാല്‍ അഭിനയ രംഗത്തും ഒരു കൈ നോക്കണം. എന്റെ അമ്മയുടെ ആഗ്രഹവും ഇതു തന്നെ അന്ന് റിമി പറഞ്ഞു. മുന്‍ സൈനികനായിരുന്ന അച്ഛന്‍ ടോമിയും അമ്മ റാണിയും ഒരു കാലത്ത് കലാ രംഗത്തുണ്ടായിരുന്നവര്‍. മുത്തച്ഛന്‍ വക്കച്ചനും മികച്ച കലാകാരന്‍ ആ പാരമ്പര്യമാണ് റിമിക്ക് കിട്ടിയത്.

പിന്നണി ഗായികയായും ടെലിവിഷന്‍ അവകതാരകയായും കുടുംബ സദസുകളില്‍ ശ്രദ്ധേയയായ റിമി ദൂരദര്‍ശിനിലെ ഗാനവീഥി എന്ന അഭിമുഖ പരിപാടിയിലൂടെയാണ് കരിയര്‍ ആരംഭിക്കുന്തന്. 2002 ല്‍ പുറത്തിറങ്ങിയ ദിലീപ് ചിത്രം മീശ മാധവനിലെ ചിങ്ങമാസം വന്നു ചേര്‍ന്നാല്‍ എന്ന ഗാനം ഹിറ്റായതോടെ റിമിക്കും തിരക്കേറി. പിന്നീട് പട്ടണത്തില്‍ സുന്ദരന്‍ എന്ന ചിത്രത്തില്‍ യേശുദാസിനൊപ്പം കണ്ണനായാല്‍ രാധ വേണം എന്ന ഗാനം ആലപിച്ച് തന്റെ സ്ഥാനം റിമി അരക്കെട്ടുറപ്പിച്ചു.

ഹണീ് ബീ ടു വരെ 70 ഓളം ചിത്രങ്ങളില്‍ റിമി പിന്നണി ഗായികയായെത്തി. ഇതിനിടെ 2006 ല്‍ ബല്‍റാം വേഴ്‌സതാരാദാസ് എന്ന ചിത്രത്തിലൂടെ സിനിമ പ്രവേശനം നടത്തിയ റിമി 2015 ല്‍ ജയറാമിനൊപ്പം തിങ്കള്‍ മുതല്‍ വെള്ളിവരെ എന്ന ചിത്രത്തിലൂടെ നായിക വേഷത്തിലുമെത്തി. 2012 ല്‍ ഏഷ്യാനെറ്റ് ഫിലിം അവാര്‍ഡ് ഷോയിക്കിടെ തുംപാസ് ആയെ എന്ന ഗാനത്തിനൊപ്പം ചുവടു വയ്ക്കാന്‍ വേദിയിലെത്തിയ ഹിന്ദി സിനിമാ താരം ഷാരൂഖ് ഖാന്‍ റിമിയെ എടുത്ത് പൊക്കിയുയര്‍ത്തിയത് ഏറെ ചര്‍ച്ചയായിരുന്നു.

വളരെ സരസമായി സംസാരിക്കുന്ന റിമിയുടെ പ്രകൃതമാണ് അവരെ പ്രേക്ഷകരുടെ പ്രിയങ്കരിയാക്കിയതും. പാലാക്കാരി ആയതു കൊണ്ടാണ് ഇങ്ങനെ സംസാരിക്കുന്നതെന്ന് പലപ്പോഴും റിമി പറഞ്ഞിട്ടുണ്ട്. ഒരു കാലത്ത് നാട്ടിന്‍ പുറങ്ങളിലെയും നഗരങ്ങളിലുെയും ഗാനമേളകളിലെ മിന്നും താരമായിരുന്നു റിമി
വാടക വീട്ടില്‍ നിന്നും മാറി പാലായുടെ ഹൃദയ ഭാഗത്ത് തന്നെ മനോഹരമായൊരു വീട് സ്വന്തമാക്കിയ റിമി വിവാഹശേഷം തൃശൂരിലും എറണാകുളത്തുമായിട്ടായിരുന്നു താമസം. റോയിസുമായുള്ള അകല്‍ച്ചയും വേര്‍പിരിയലും ജന്മനാട്ടിലും ഇപ്പോള്‍ ടിവി പ്രേക്ഷകരുടെ ചര്‍ച്ചാ വിഷയമാണ്. കുട്ടികളില്ലാത്തതും റിമിയെ അസ്വസ്ഥമാക്കിയിരുന്നുവെന്ന് സുഹൃത്തുക്കള്‍ പറയുന്നു.

പരസ്പര സമ്മതത്തോടെയാണ് ഇരുവരും വേര്‍പിരിയാനായി തീരുമാനിച്ചത്. റിമിയോടും ഭര്‍ത്താവിനോടും വ്യാഴാഴ്ച കോടതിയില്‍ ഹാജരാവാനും നിര്‍ദേശിച്ചിരുന്നു. ഇത് പ്രകാരം ഇരുവരും കോടതിയിലേക്കെത്തിയിരുന്നു. 11 വര്‍ഷത്തെ ദൗമ്ബത്യ ജീവിതമാണ് ഇരുവരും അവസാനിപ്പിക്കുന്നത്. ഇനി ഒരുമിച്ച് ജീവിക്കാനാവില്ലെന്നും പരസ്പരസമ്മതത്തോടെ ഇരുവരും വേര്‍പിരിയുകയാണന്നും ഇവരുടെ സുഹൃത്തുക്കള്‍ വ്യക്തമാക്കി.

വേദിയെ ഇളക്കിമറിക്കുന്ന തരത്തിലുള്ള പ്രകടനവുമായാണ് റിമി ടോമി ഓരോ തവണയും പ്രേക്ഷകര്‍ക്ക് മുന്നിലേക്കെത്താറുള്ളത്. കാണികളെ ത്രസിപ്പിച്ച് നിര്‍ത്താന്‍ പ്രത്യേക മിടുക്കാണ് താരത്തിന്. എങ്ങനെയാണ് റിമിക്ക് ഇത്രയും എനര്‍ജി കിട്ടുന്നതെന്ന് ചോദിച്ച് നിരവധി പേരെത്തിയിരുന്നു. ഗായികയായി മാത്രമല്ല നല്ലൊരു അവതാരക കൂടിയാണ് താനെന്നും റിമി തെളിയിച്ചിരുന്നു. പ്രേക്ഷകരെ ബോറടിപ്പിക്കാത്ത തരത്തിലുള്ള അവതരണവുമായാണ് ഒന്നും ഒന്നും മൂന്നിന്റേത്. റിമി ടോമി അവതരിപ്പിച്ചിരുന്ന പരിപാടി രണ്ടാം സീസണുമായും എത്തിയിരുന്നു. തനിക്ക് മുന്നിലേക്കെത്തുന്ന അതിഥികളോട് രസകരമായ ചോദ്യങ്ങളും ചെറിയ ടാസ്‌ക്കുകളുമൊക്കെയാണ് റിമി നല്‍കാറുള്ളത്. ആരാധകര്‍ അറിയാനാഗ്രഹിക്കുന്ന തരത്തിലുള്ള വിശേഷങ്ങളെക്കുറിച്ചാണ് റിമി ചോദിക്കാറുള്ളത്. ഒരുകാലത്ത് സിനിമയില്‍ സജീവമായിരുന്നവരെ തിരിച്ചുകൊണ്ടുവരുന്നതിനും ഈ പരിപാടി കാരണമായിരുന്നു.

സോഷ്യല്‍ മീഡിയയിലൂടെ ശക്തമായ സ്വീകാര്യതയും പിന്തുണയുമാണ് റിമി ടോമിക്ക് ലഭിക്കുന്നത്. സഹോദര ഭാര്യയായ മുക്തയും സോഷ്യല്‍ മീഡിയയില്‍ സജീവമാണ്. മുക്തയുടെ മകളായ കിയാരയ്‌ക്കൊപ്പമുള്ള റിമിയുടെ ചിത്രങ്ങളും വീഡിയോയുമൊക്കെ സോഷ്യല്‍ മീഡിയയിലൂടെ വൈറലായിരുന്നു. ഒന്നും ഒന്നും മൂന്നിന്റെ പ്രമോ വീഡിയോയും ക്ഷണനേരം കൊണ്ടാണ് തരംഗമായി മാറാറുള്ളത്.

ഒരുമിച്ചുള്ള ജീവിതം ബുദ്ധിമുട്ടാണെന്നും വിവാഹമോചനം അനുവദിക്കണമെന്നുമാവശ്യപ്പെട്ടാണ് ഇരുവരും എറണാകുളം കുടുംബ കോടതിയെ സമീപിച്ചത്. ഇരുവര്‍ക്കും കോടതി കൗണ്‍സലിംഗ് നിര്‍ദേശിച്ചിട്ടുണ്ട്. റിമി ടോമിയും റോയ്‌സും വേര്‍പിരിയുകയാണെന്ന കാര്യം ഇവരുടെ സുഹൃത്തുക്കള്‍ സ്ഥിരീകരിച്ചിട്ടുണ്ട്. എന്നാല്‍ കുടുംബാംഗങ്ങളോ റിമിയോ ഇക്കാര്യത്തെക്കുറിച്ച് പ്രതികരിച്ചിട്ടില്ല.