നടന്‍ സിദ്ദിഖിനെതിരെ ലൈംഗികാതിക്രമ വെളിപ്പെടുത്തലുമായി എത്തിയ നടിയ്ക്ക് മറുപടിയുമായി നടൻ സിദ്ദിഖ്. കഴിഞ്ഞ ദിവസം യുവനടി രേവതി സമ്പത്താണ് സിദ്ദിഖിനെതിരെ വെളിപ്പെടുത്തലുമായി രംഗത്തെത്തിയത്. കോടതിസമക്ഷം ബാലൻ വക്കീൽ എന്ന ചിത്രത്തിൽ നിന്നും നീക്കം ചെയ്ത ഒരു രംഗത്തിന്റെ വിഡിയോ തന്റെ ഔദ്യോഗിക ഫെയ്സ്ബുക്ക് പേജിൽ പങ്കുവച്ചാണ് 'മീ ടൂ' വിഷയത്തിൽ താരം പ്രതികരിച്ചത്.

ചിത്രത്തിൽ ബ്രജിത്ത് എന്ന വിദേശ വനിതയോട് ഐ ലൗവ് യു എന്ന് സിദ്ദിഖിന്റെ കഥാപാത്രം പറയുന്നു. ഇതിന് മറുപടിയായി തനിക്കും ഇഷ്ടമാണ് എന്ന തരത്തിൽ മീടൂ എന്ന് തിരിച്ച് പറയുന്നു. ഇപ്പോൾ സോഷ്യൽ മീഡിയയിലൂടെ സജീവമായ 'മീ ടൂ' കാംപെയ്നാണെന്ന് തെറ്റിദ്ധരിച്ച് സിദ്ദിഖ് ഓടി രക്ഷപ്പെടുന്നതാണ് രംഗത്തിലുള്ളത്. ചിരി പടർത്തുന്ന വീഡിയോ ആണ് യാതൊരു ഹാഷ്ടടാഗോ അടിക്കുറിപ്പുകളോ ഇല്ലാതെ താരം പങ്കുവച്ചിട്ടുള്ളത്.

2006ൽ സുഖമായിരിക്കട്ടെ എന്ന സിനിമയുടെ പ്രിവ്യു ചടങ്ങിനിടെയാണ് സിദ്ദിഖിൽ നിന്നും മോശം അനുഭവം ഉണ്ടായതെന്നായിരുന്നു താരത്തിന്റെ വെളിപ്പെടുത്തൽ. ഫേസ്ബുക്ക് പോസ്റ്റിലൂടെയാണ് നടി ഇക്കാര്യം വ്യക്തമാക്കിയത്. നടൻ സിദ്ദിഖും കെ.പി.എ.സി ലളിതയും മാദ്ധ്യമങ്ങൾക്ക് മുമ്പിൽ സംസാരിക്കുന്ന വീഡിയോ ഫേസ്ബുക്കിൽ പങ്കുവച്ചാണ് രേവതിയുടെ കുറിപ്പ്.ആരോപണത്തെ കുറിച്ച് സിദ്ദിഖ് പറയുന്നതിങ്ങനെ:

ഞാൻ പ്രധാനവേഷത്തിലെത്തിയ സുഖമായിരിക്കട്ടെ എന്ന സിനിമയുടെ പ്രിവ്യു ചടങ്ങിൽ എന്റെ ക്ഷണം അനുസരിച്ചാണ് ഈ കുട്ടി, അച്ഛനെയും അമ്മയെയും കൂട്ടി എത്തിയത്. പ്രിവ്യുവിനു ശേഷം മസ്ക്കറ്റ് ഹോട്ടലിൽ വച്ച് ഒരുമിച്ച് ഭക്ഷണവും കഴിച്ച് സന്തോഷമായാണ് ഞങ്ങൾ പിരിഞ്ഞത്. അതിനു ശേഷവും ഇടയ്ക്ക് ആ കുട്ടി എന്നെ വിളിക്കാറുണ്ടായിരുന്നു. ആരോപണത്തിൽ പറയുന്നതുപോലൊരു സംഭവം നടന്നിട്ടില്ല. ഇപ്പോൾ ഇങ്ങനെയൊരു ആരോപണം എന്തിനെന്നും എനിക്ക് അറിയില്ല. സിദ്ദിഖ് വ്യക്തമാക്കി.