അന്തരിച്ച നടന്‍ വിജയകാന്തിന്റെ ശവകുടീരം സന്ദര്‍ശിച്ച് വികാരാധീനനാവുന്ന സൂര്യയുടെ വീഡിയോ പുറത്തുവന്നിരിക്കുകയാണ്. വിജയകാന്തിന്റെ ശവകുടീരത്തിന്റെ അടുത്തിരുന്ന് കരയുന്ന സൂര്യയെ വീഡിയോയില്‍ കാണാം. സഹോദരനും നടനുമായ കാര്‍ത്തിയും ഒപ്പമുണ്ടായിരുന്നു. വിജയകാന്തിന്റെ വീട്ടിലെത്തി കുടുംബാംഗങ്ങളെയും സൂര്യ സന്ദര്‍ശിച്ചു.

സൂര്യയുടെ തുടക്കകാലത്തെ ചിത്രമായ പെരിയണ്ണയില്‍ വിജയകാന്ത് അതിഥി വേഷത്തില്‍ എത്തിയിരുന്നു. വിദേശത്ത് ചിത്രീകരണത്തിലായിരുന്നതിനാല്‍ സംസ്‌കാരച്ചടങ്ങുകളില്‍ പങ്കെടുക്കാന്‍ സാധിക്കാത്തതിന്റെ ദുഃഖം അറിയിച്ച് മുന്‍പ് സൂര്യ തന്റെ സോഷ്യല്‍ മീഡിയ പേജുകളില്‍ ഒരു വീഡിയോ പങ്കുവച്ചിരുന്നു. ഒരു കണ്ണില്‍ ധൈര്യവും മറ്റൊരു കണ്ണില്‍ അനുകമ്പയുമായി ജീവിച്ച അപൂര്‍വ കലാകാരനായിരുന്നു വിജയകാന്തെന്നാണ് സൂര്യ അന്ന് പറഞ്ഞത്.

കഴിഞ്ഞ മാസമാണ് പ്രശസ്ത നടനും ഡിഎംഡികെ നേതാവുമായ വിജയകാന്ത് അന്തരിച്ചത്. ചെന്നൈയിലെ സ്വകാര്യ ആശുപത്രിയിലായിരുന്നു അന്ത്യം. വിജയ്, രജനി തുടങ്ങിയ നിരവധി പ്രമുഖ താരങ്ങള്‍ വിജയകാന്തിന്റെ ഭൗതിക ശരീരം കാണാന്‍ എത്തിയിരുന്നു. എന്നാല്‍ വിദേശത്ത് ചിത്രീകരണത്തിലായിരുന്നതിനാല്‍ നടന്‍ സൂര്യക്ക് വിജയകാന്തിന്റെ സംസ്‌കാരച്ചടങ്ങുകളില്‍ പങ്കെടുക്കാന്‍ സാധിച്ചിരുന്നില്ല.