വിനീത് ശ്രീനിവാസന്‍ സംവിധാനം ചെയ്യുന്ന പുതിയ ചിത്രം 'വര്‍ഷങ്ങള്‍ക്ക് ശേഷ'ത്തിന്റെ വാലെന്റൈന്‍സ് സ്‌പെഷ്യല്‍ പോസ്റ്റര്‍ പുറത്തിറക്കി. പ്രണവ് മോഹന്‍ലാലും കല്യാണി പ്രിയദര്‍ശനും ഒരുമിച്ചുള്ള പോസ്റ്ററാണ് വിനീത് തന്റെ സോഷ്യല്‍ മീഡിയയില്‍ പങ്കുവെച്ചത്.

പോസ്റ്റര്‍ പുറത്തിറങ്ങിയതോടെ സോഷ്യല്‍ മീഡിയ മുഴുവന്‍ ഇപ്പോള്‍ ഇതാണ് ചര്‍ച്ച. 'ദേ പഴയ ലാലേട്ടന്‍', 'വിന്റേജ് ഏട്ടന്‍', 'പ്രണവ് വേറെ ലെവല്‍', 'ദേവദൂതനിലെ ലാലേട്ടന്‍ അല്ലേ ആ ഇരിക്കുന്നത്', എന്നിങ്ങനെ കമെന്റുകളാണ് പോസ്റ്റിന് താഴെ വന്നുകൊണ്ടിരിക്കുന്നത്. ഇന്നലെ ആയിരുന്നു ചിത്രത്തിന്റെ ടീസര്‍ പുറത്തുവിട്ടത്. മികച്ച പ്രതികരണമാണ് ടീസറിന് ലഭിച്ചുകൊണ്ടിരിക്കുന്നത്.

പ്രണവ് മോഹന്‍ലാലും ധ്യാന്‍ ശ്രീനിവാസനും പ്രധാന വേഷത്തിലെത്തുന്ന ചിത്രം രണ്ട് കാലഘട്ടത്തെ കഥയാണ് പറയുന്നതെന്നാണ് ടീസര്‍ നല്‍കുന്ന സൂചന. ടീസറിലെ ചില സീനുകളില്‍ പഴയ മോഹന്‍ലാലിനെ കണ്ടു എന്നൊക്കെയാണ് ആരാധകര്‍ അഭിപ്രായപ്പെടുന്നത്. മോഹന്‍ലാലിന്റേയും ശ്രീനിവാസന്റെയും മദ്രാസിലെ ജീവിതവും കഥയുമാണ് ചിത്രത്തിലേത് എന്നും റിപ്പോര്‍ട്ടുകള്‍ പറയുന്നു.