വിവാഹ തീയതി പുറത്തുവിട്ട് മുന്‍ ബിഗ് ബോസ് താരം റോബിന്‍ രാധാകൃഷ്ണനും യൂട്യൂബര്‍ ആരതി പൊടിയും. ജൂണ്‍ 26നാണ് തങ്ങളുടെ വിവാഹമെന്ന് റോബിന്‍ ഇന്‍സ്റ്റഗ്രാമിലൂടെയാണ് ആരാധകരെ അറിയിച്ചിരിക്കുന്നത്. എല്ലാവരുടെയും അനുഗ്രഹം വേണമെന്നും താരം കുറിച്ചു. കഴിഞ്ഞ വര്‍ഷം ഫെബ്രുവരി പതിനാറിനായിരുന്നു ഇരുവരുടെയും വിവാഹ നിശ്ചയം നടന്നത്. വിവാഹ നിശ്ചയ സമയത്തെടുത്ത ഫോട്ടോ പങ്കുവച്ചുകൊണ്ടാണ് റോബിന്‍ വിവാഹ തീയതി പുറത്തുവിട്ടിരിക്കുന്നത്.

ബിഗ് ബോസ് സീസണ്‍ 4 ന് പിന്നാലെയാണ് റോബിനും ആരതി പൊടിയും തമ്മില്‍ പ്രണയത്തിലായത്. ഒരു യുട്യൂബ് ചാനലില്‍ വെച്ച് റോബിന്റെ അഭിമുഖം എടുക്കാന്‍ എത്തിയപ്പോഴാണ് ആരതിയും റോബിനും പരിചയപ്പെടുന്നത്. ഈ പരിചയം പിന്നീട് സൗഹൃദത്തിലേക്കും പ്രണയത്തിലേക്കും വഴിമാറുകയായിരുന്നു.റോബിന്‍ തന്നെയാണ് തന്നോട് പ്രണയം പറഞ്ഞിരുന്നതെന്നും തീരുമാനമെടുക്കാന്‍ താന്‍ സമയം ചോദിച്ചിരുന്നുവെന്നും ആരതി പറഞ്ഞിരുന്നു.

പരസ്പരം മനസിലാക്കിയ ശേഷം താന്‍ യെസ് പറയുകയായിരുന്നുവെന്നാണ് ആരതി പറഞ്ഞത്. തന്നെ വളരെ അധികം മനസിലാക്കുന്ന വ്യക്തിയാണ് റോബിനെന്നും ഒരു സ്ത്രീയെന്ന നിലയിലും പങ്കാളിയെന്ന നിലയിലും തനിക്ക് എല്ലാ ബഹുമാനവും റോബിന്‍ നല്‍കാറുണ്ടെന്നും ആരതി പറഞ്ഞു. തന്റെ ഉയര്‍ച്ചയും താഴ്ചയുമെല്ലാം മനസിലാക്കിയാണ് ആരതി തന്റെ ജീവിതത്തിലേക്ക് കടന്ന് വന്നതെന്ന് റോബിനും പ്രതികരിച്ചിരുന്നു.