ഒരുകാലത്ത് തെന്നിന്ത്യന്‍ സിനിമയിലെ താര റാണിയായിരുന്നു സമീറ റെഡ്ഡി. സമീറയെ ആരാധകര്‍ വിളിച്ചിരുന്നത് സെക്സി സാം എന്നായിരുന്നു. പിന്നീട് സിനിമയില്‍ നിന്നും ഇടവേളയെടുത്ത സമീറ തിരികെ വരുന്നത് സോഷ്യല്‍ മീഡിയയിലൂടെയാണ്. തന്റെ അഭിപ്രായങ്ങളും നിലപാടുകളും പങ്കുവയ്ക്കുന്നതിനും സമൂഹത്തില്‍ നിലനില്‍ക്കുന്ന സ്റ്റീരിയോടൈപ്പുകളെ ചോദ്യം ചെയ്യാനും സമീറയ്ക്ക് മടിയില്ല.

ഇന്ന് സോഷ്യല്‍ മീഡിയ സമീറയെ മെസി മമ്മ എന്നാണ് വിളിക്കുന്നത്. സംഗീത ആല്‍ബങ്ങളിലൂടെയാണ് സമീറ റെഡ്ഡി ശ്രദ്ധ നേടുന്നത്. മേനെ ദില്‍ തുച്ച് കോ ദിയ ആണ് ആദ്യ സിനിമ. നരസിംഹുഡുവിലൂടെ തെലുങ്കിലെത്തി. വാരണം ആയിരം ആണ് ആദ്യ തമിഴ് ചിത്രം. സിനിമ ക്ലാസിക് ഹിറ്റ് ആയതോടെ സമീറയ്ക്ക് ആരാധകര്‍ ഏറുകയായിരുന്നു. ഒരുനാള്‍ വരും എന്ന ചിത്രത്തിലൂടെ മലയാളത്തിലും എത്തി. 2014 ലാണ് താരം വിവാഹിതയാകുന്നത്. ഇതോടെ അഭിനയത്തില്‍ നിന്നും വിട്ടു നില്‍ക്കുകയാണ്.

മേക്കപ്പില്ലാതെയും തന്റെ നരച്ച മുടി കളര്‍ ചെയ്യാതെയുമാണ് സമീറ സോഷ്യല്‍ മീഡിയയില്‍ എത്താറുള്ളത്. തന്റെ കരിയറിന്റെ തുടക്കകാലത്ത് നേരിടേണ്ടി വന്ന ബോഡി ഷെയ്മിംഗിനെക്കുറിച്ചും പ്ലാസ്റ്റിക് സര്‍ജറി നടത്താന്‍ പറഞ്ഞതിനെക്കുറിച്ചുമൊക്കെ നേരത്തെ സമീറ വെളിപ്പെടുത്തിയിരുന്നു.

''പത്ത് വര്‍ഷം മുമ്പത്തെ അവസ്ഥ ഭ്രാന്തമായിരുന്നു. എല്ലാവരും പ്ലാസ്റ്റിക് സര്‍ജറി ചെയ്യുമായിരുന്നു. ബൂബ് ജോബും നോസ് ജോബുമൊക്കെ ചെയ്യുമായിരുന്നു. എനിക്ക് എപ്പോഴും മാറിടത്തില്‍ പാഡ് ഉപയോഗിക്കേണ്ടി വന്നിരുന്നു. എന്നോട് ബൂബ് ജോബ് ചെയ്യാന്‍ പറഞ്ഞു. പലവട്ടം. ഞാന്‍ അതേക്കുറിച്ച് ചിന്തിച്ചിരുന്നു. പക്ഷെ ഞാനത് ചെയ്തില്ല. അതില്‍ ഞാനിന്ന് സന്തോഷിക്കുന്നു.

കാരണം ഞാന്‍ അതില്‍ ഒട്ടും തൃപ്തയായിരിക്കില്ലെന്ന് എനിക്കറിയാം. സര്‍ജറികള്‍ ചെയ്യുന്നവരുണ്ട്. അത് അവരുടെ തിരഞ്ഞെടുപ്പാണ്. അതില്‍ അവര്‍ക്ക് സന്തോഷം ലഭിക്കുന്നുണ്ടെങ്കില്‍ ആകാം. ജീവിക്കൂ ജീവിക്കാന്‍ അനുവദിക്കൂ എന്നാണ് എനിക്ക് പറയാനുള്ളത്. വിധിക്കാന്‍ നമ്മള്‍ ആരാണ്?'' - സമീറ ചോദിക്കുന്നു.