വിവാഹത്തോടെ അഭിനയത്തിന് താത്കാലികമായി വിരാമമിട്ടിരുന്ന മീരാ ജാസ്മിന്‍ വീണ്ടും മലയാളത്തിലേക്ക് മടങ്ങിയെത്തുന്നു. അതും പോലീസ് യൂണിഫോമില്‍. എഡിറ്റര്‍ ഡോണ്‍ മാക്‌സ് സംവിധാനം ചെയ്യുന്ന 'പത്ത് കല്പനകള്‍' എന്ന ചിത്രത്തിലാണ് മീരയുടെ പോലീസ് വേഷം. മുരളി ഗോപിയും, അനൂപ് മേനോനും പ്രധാന താരങ്ങളാകുന്ന ചിത്രമാണിത്. ഒരു ക്രൈം ത്രില്ലറാണ് ചിത്രം. അനുമോള്‍, കനിഹ എന്നിവരും ചിത്രത്തിലെ പ്രധാന താരങ്ങളാണ്.

കരിയറില്‍ ഇത് രണ്ടാം തവണയാണ് മീരാ ജാസ്മിന്‍ പോലീസ് വേഷത്തിലെത്തുന്നത്. തമിഴില്‍ 'പെണ്‍ സിങ്കം' എന്ന സിനിമയില്‍ ഇതിനു മുമ്പ് മീര ഐ പി എസ് ഓഫീസറായി അഭിനയിച്ചിട്ടുണ്ട്. തമിഴ്‌നാട് മുന്‍ മുഖ്യമന്ത്രി കരുണാനിധിയുടെ തിരക്കഥയില്‍ ബാലി ശ്രീരംഗം സംവിധാനം ചെയ്ത ചിത്രമായിരുന്നു 'പെണ്‍ സിങ്കം'.

എന്നാല്‍ ഈ ചിത്രം വന്‍ പരാജയമായിരുന്നു. മീരയുടെ പോലീസ് വേഷം ശ്രദ്ധിക്കപ്പെട്ടതുമില്ല. കരിയറില്‍ രണ്ടാം തവണ പോലീസ് വേഷത്തിലെത്തുമ്പോള്‍ മീരയ്ക്കും ഏറെ പ്രധാനപ്പെട്ടതാണ് ഈ പ്രോജക്ട്. സിനിമയില്‍ ഏറെ തകര്‍ച്ച നേരിട്ട സമയത്താണ് മീര കരിയറില്‍ ഒരു ഇടവേളയെടുത്തത്. ഒരു കാലത്ത് മുന്‍നിര നായകന്‍മാരുടെയും സംവിധായകരുടെയും സിനിമകളില്‍ നായികയായിരുന്ന മീര കരിയറില്‍ തകര്‍ച്ച നേരിട്ടപ്പോള്‍ മൂന്നാംനിര സിനിമകളില്‍ വരെ അഭിനയിക്കുന്ന സ്ഥിതിയുണ്ടായി. ഡോണ്‍ മാക്‌സിന്റെ സിനിമയിലൂടെ നല്ലൊരു തിരിച്ചു വരവാണ് മീര ആഗ്രഹിക്കുന്നത്. മെയ് അവസാനം ചിത്രത്തിന്റെ ഷൂട്ടിംഗ് ആരംഭിക്കും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha