ഉത്തരാഖണ്ഡിലെ മഞ്ഞുമലകള്‍ അതിവേഗം ഉരുകുന്നതായി സമീപകാലത്ത് നടത്തിയ പഠനം കണ്ടെത്തി. വാഡിയ ഇന്‍സ്റ്റിറ്റിയൂട്ട് ഓഫ് ഹിമാലയന്‍ ജിയോളജിയിലെ ശാസ്ത്രജ്ഞരാണ് പഠനം നടത്തിയത്. ഗവേഷണ പ്രബന്ധം 'ഡിസ്‌കവര്‍ ജിയോസയന്‍സ്' ജേണലില്‍ പ്രസിദ്ധീകരിച്ചു. 23 ഹിമാനികളുടെ ചരിത്രരേഖകള്‍ പരിശോധിച്ച ഗവേഷകര്‍ ഓരോ മഞ്ഞുമലകളും ഉരുകുന്നതിന്റെ കാരണങ്ങളും വിശദമായി വിലയിരുത്തി.

കാലാവസ്ഥാ വ്യതിയാനവും ആഗോളതാപനവും മൂലമുണ്ടാകുന്ന താപനിലയിലെ വര്‍ദ്ധനയാണ് മഞ്ഞുമലകള്‍ ഉരുകുന്നതിന്റെ പ്രധാന കാരണമെന്ന് പഠനം വ്യക്തമാക്കുന്നു. ഇതിനുപുറമെ, ഓരോ മഞ്ഞുമലയുടെയും ആകൃതി, ചരിവ്, മഞ്ഞിന് മുകളിലുള്ള അവശിഷ്ടങ്ങളുടെ അളവ് എന്നിവയും ഉരുകലിന്റെ വേഗതയെ സ്വാധീനിക്കുന്നു. നേപ്പാളില്‍ 1,400ലധികം പേരുടെ മരണത്തിനിടയാക്കിയ വെള്ളപ്പൊക്കവുമായി മഞ്ഞുമലകള്‍ ഉരുകുന്നതിന് ബന്ധമുണ്ടെന്ന് കണ്ടെത്തിയതിന് ദിവസങ്ങള്‍ക്കുശേഷമാണ് പഠനം പ്രസിദ്ധീകരിച്ചത്. ഭൂപ്രകൃതിയില്‍ ഉത്തരാഖണ്ഡിന് നേപ്പാളുമായി ഏറെ സാമ്യതകളുണ്ട്.

കഴിഞ്ഞ ഏതാനും വര്‍ഷങ്ങളായി ഭീമന്‍ മഞ്ഞുമലകളില്‍ നിന്നും മഞ്ഞുകട്ടകള്‍ അടര്‍ന്നുവീണ് താഴ്വരകളിലൂടെ ഒഴുകിയെത്തുന്നത് ജനവാസ മേഖലകളില്‍ വലിയ നാശനഷ്ടങ്ങള്‍ക്ക് കാരണമാകുന്നുണ്ട്. ഇതോടെയാണ് അപകടസാധ്യതയുള്ള ഹിമാലയന്‍ മഞ്ഞുമലകളില്‍ ശാസ്ത്രജ്ഞരും പരിസ്ഥിതി പ്രവര്‍ത്തകരും സര്‍ക്കാരുകളും കൂടുതല്‍ ശ്രദ്ധ കേന്ദ്രീകരിച്ചത്. ഇന്ത്യയ്ക്കു മാത്രമല്ല, അയല്‍രാജ്യങ്ങളുടെ ജലസേചനം, കുടിവെള്ളം, ജലവൈദ്യുതി തുടങ്ങിയ ആവശ്യങ്ങള്‍ക്ക് ആവശ്യമായ ജലത്തിന്റെ പ്രധാന സ്രോതസ്സുകളാണ് ഹിമാലയന്‍ മഞ്ഞുമലകള്‍.

ചരിത്രരേഖകള്‍ പരിശോധിച്ചപ്പോള്‍ അവശിഷ്ടങ്ങളാല്‍ മൂടപ്പെട്ട മഞ്ഞുമലകള്‍ പ്രതിവര്‍ഷം ഏതാനും മീറ്ററുകള്‍ വീതമാണ് ഉരുകുന്നതെന്ന് കണ്ടെത്തി. എന്നാല്‍ മാലിന്യങ്ങളോ അവശിഷ്ടങ്ങളോ ഇല്ലാത്ത മഞ്ഞുമലകളുടെ ഉരുകല്‍ നിരക്ക് കൂടുതലാണ്. 2000ന് ശേഷം മഞ്ഞുമലകള്‍ ഉരുകുന്നതിന്റെ വേഗം ഗണ്യമായി വര്‍ദ്ധിച്ചതായും പഠനം ചൂണ്ടിക്കാട്ടുന്നു. ഏകദേശം 4,000 മീറ്റര്‍ വരെ ഉയരത്തിലുള്ള പ്രദേശങ്ങളില്‍ മുമ്പ് മഞ്ഞുവീഴ്ച ഉണ്ടായിരുന്ന സ്ഥാനത്ത് ഇപ്പോള്‍ മഴ ലഭിക്കുന്നതാണ് പ്രധാന കാരണങ്ങളിലൊന്ന്.

വേനല്‍ക്കാലം ദൈര്‍ഘ്യമേറിയതും ശൈത്യകാലത്തെ മഞ്ഞുവീഴ്ച കുത്തനെ കുറഞ്ഞതും മഞ്ഞുമലകളുടെ നിലനില്‍പ്പിനെ ബാധിക്കുന്നുണ്ട്. ലഭിക്കുന്ന മഞ്ഞിന് ഉറച്ച പാളിയായി മാറാന്‍ ആവശ്യമായ സമയം ലഭിക്കാത്തതും തിരിച്ചടിയാണ്. മഞ്ഞുമലകള്‍ അതിവേഗം ഉരുകുന്നത് ഭാവിയില്‍ സമുദ്രനിരപ്പ് ഉയരുന്നതിനുള്ള സാധ്യത വര്‍ദ്ധിപ്പിക്കുന്നതിനൊപ്പം മഞ്ഞുമലയിലൂടെ ഉത്ഭവിക്കുന്ന തടാകങ്ങള്‍ പൊട്ടിത്തെറിച്ചുണ്ടാകുന്ന പ്രളയം, ഹിമപാതം, ഉയര്‍ന്ന പ്രദേശങ്ങളില്‍ നിന്നുള്ള മണ്ണും പാറയും ഉള്‍പ്പെടെയുള്ള അവശിഷ്ടങ്ങളുടെ പ്രവാഹം തുടങ്ങിയ പ്രകൃതിദുരന്തങ്ങളുടെ സാധ്യതയും വര്‍ദ്ധിപ്പിക്കുന്നു.

ഗംഗ, ഭഗീരഥി, സത്‌ലജ്, രവി, സിന്ധു, ബ്രഹ്മപുത്ര, യമുന, അളകനന്ദ, മഹാകാളി തുടങ്ങിയ നദികളുടെ ജലസ്രോതസ്സുകള്‍ ഹിമാലയന്‍ മേഖലയുമായി ബന്ധപ്പെട്ടതാണ്. കൃഷി, കുടിവെള്ളം, ജലവൈദ്യുതി തുടങ്ങിയ ആവശ്യങ്ങള്‍ക്ക് ഇന്ത്യയ്ക്കും അയല്‍രാജ്യങ്ങള്‍ക്കും ഹിമാലയന്‍ മഞ്ഞുമലകളാണ് ആശ്രയം.