ഡല്‍ഹി യൂണിവേഴ്‌സിറ്റി യൂണിയന്‍ തിരഞ്ഞെടുപ്പില്‍ എ.ബി.വി.പി മികച്ച വിജയം. പ്രസിഡന്റ് സ്ഥാനം ഉള്‍പ്പെടെ മൂന്ന് പ്രധാന പാനല്‍ പോസ്റ്റുകള്‍ നിലനിറുത്തി കൊണ്ടാണ് എ.ബി.വി.പിയുടെ വിജയം. പ്രസിഡന്റ്, സെക്രട്ടറി, ജോയിന്റ് സെക്രട്ടറി സ്ഥാനങ്ങളാണ് എ.ബി.വി.പി നിലനിറുത്തിയത്. എന്‍.എസ്.യു.ഐയുടെ വിജയ് ശങ്കര്‍ മീണയെ കടുത്ത മത്സരത്തിനൊടുവില്‍ പരാജയപ്പെടുത്തി എ.ബി.വി.പിയുടെ യാഷ് ദബാസ് പ്രസിഡന്റ് സ്ഥാനം നേടി. റിയ ച്വാഡി സെക്രട്ടറിയായും ലക്ഷ്യ രാജ് സിംഗ് ജോയിന്റ് സെക്രട്ടറിയായും തിരഞ്ഞെടുക്കപ്പെട്ടു.

മുന്‍ എന്‍.എസ്.യു.ഐ നേതാവും സ്വതന്ത്ര സ്ഥാനാര്‍ത്ഥിയുമായ ദീപാന്‍ഷു ഷോക്കീന്‍ വൈസ് പ്രസിഡന്റ് സ്ഥാനത്തേക്ക് തിരഞ്ഞെടുക്കപ്പെട്ടതും ശ്രദ്ധേയമായി. ഹൈക്കോടതി ഉത്തരവുള്ളതിനാല്‍ വിജയാഘോഷ റാലികള്‍ നടത്തരുതെന്ന് ഫലം പ്രഖ്യാപിക്കുന്നത് മുന്‍പ് തന്നെ യൂണിവേഴ്‌സിറ്റി അധികൃതര്‍ അറിയിച്ചിരുന്നു. എസ്.ആര്‍.സി.സി. അതിഥി മഹാവിദ്യാലയം, ഭാരതി കോളേജ്, ശിവാജി കോളേജ് തുടങ്ങിയ സ്ഥാപനങ്ങളില്‍ മുഴുവന്‍ സീറ്റുകളിലും എ.ബി.വി.പി വന്‍വിജയം നേടി.