ചുരുക്കം ചില സിനിമകള്‍ കൊണ്ടു തന്നെ ഏറെ പ്രേക്ഷകശ്രദ്ധ പിടിച്ചുപറ്റിയ നടനാണ് ടൊവിനോ തോമസ്. എന്നു നിന്റെ മൊയ്തീനിലെ അപ്പുവിനെയും എബിസിഡി യിലെ അഖിലേഷ് എന്ന രാഷ്ട്രീയക്കാരനെയും വെള്ളിത്തിരയില്‍ അനശ്വരമാക്കിയ നടന്‍. എന്നാല്‍ താരം ഇപ്പോള്‍ അത്ര സന്തോഷത്തിലല്ല. കാരണം എന്താണെന്നാണോ?

നവാഗതനായ ജോണ്‍ പോള്‍ ജോര്‍ജ് സംവിധാനം ചെയ്ത ചിത്രമായ ഗപ്പിയില്‍ വളരെ ശ്രദ്ധേയമായ വേഷം ടൊവിനോ ചെയ്തിരുന്നു. ഈ വര്‍ഷം ആഗസ്റ്റ് 5 നാണ് ചിത്രം പുറത്തിറങ്ങിയത്. നിരൂപകര്‍ക്കിടയിലും മറ്റും മികച്ച അഭിപ്രായം നേടിയെങ്കിലും വലിയൊരു സാമ്പത്തിക വിജയം നേടിയിരുന്നില്ല ഗപ്പി. ഇപ്പോള്‍ ഈ സിനിമയുടെ ഡിവിഡി അണിയറ പ്രവര്‍ത്തകര്‍ പുറത്തിറക്കിയിട്ടുണ്ട്. ഡിവിഡി കണ്ട ശേഷം ഈ സിനിമ ഒരുപാട് ഇഷ്ടപ്പെട്ടുവെന്ന് പറഞ്ഞു ആളുകള്‍ അയക്കുന്ന സന്ദേശങ്ങള്‍ കാണുമ്പോള്‍ വേദന തോന്നുവെന്നാണ് ടൊവീനോ തോമസ് പറയുന്നത്. ഫെയ്‌സ് ബുക്കിലൂടെയാണ് താരം ഈ കാര്യം പങ്കുവച്ചത്.

താരത്തിന്റെ പോസ്റ്റ് ഇങ്ങനെ..

ഗപ്പി എന്ന സിനിമയുടെ ഡിവിഡി ഇറങ്ങിയതിനു ശേഷം ദിവസേന നൂറ് കണക്കിന് മെസ്സേജുകള്‍ ആണ് വന്നുകൊണ്ടിരിക്കുന്നത് .വളരെ നല്ല സിനിമയാണെന്നും തിയേറ്ററില്‍ പോയി ഈ സിനിമ കാണാഞ്ഞതില്‍ ഖേദിക്കന്നു എന്നും പല മെസ്സേജുകളിലും കണ്ടപ്പോള്‍ എന്തുകൊണ്ടോ സന്തോഷത്തേക്കാള്‍ വേദന ആണ് തോന്നിയത്.

ഈ പറയുന്നവരൊക്കെ അന്ന് ഞങ്ങളെ വിശ്വസിച്ച് തിയേറ്ററില്‍ പോയി തന്നെ സിനിമ കണ്ടിരുന്നെങ്കില്‍ എന്ന് ആഗ്രഹിച്ചു പോകുന്നു. കേരളത്തില്‍ സൂപ്പര്‍ ഹിറ്റല്ല എന്ന കാരണത്താല്‍ കേരളത്തിനു പുറത്തും ഇന്ത്യക്കു പുറത്തും ഈ സിനിമ തിയേറ്ററില്‍ പ്രദര്‍ശിപ്പിക്കാന്‍ സാധിച്ചില്ല!

ആരോടും പരാതിയോ പരിഭവമോ ഇല്ല. ആരെയും കുറ്റപ്പെടുത്തുന്നതുമല്ല. പക്ഷെ ഇനി മുതല്‍ എങ്കിലും മലയാളത്തില്‍ ഇറങ്ങുന്ന നല്ല സിനിമകള്‍ ഇവിടുത്തെ പ്രേക്ഷകരാല്‍ തഴയപ്പെടാതിരുന്നെങ്കില്‍ എന്ന് ആത്മാര്‍ത്ഥമായി ആഗ്രഹമുണ്ട്.മലയാള സിനിമ അതിന്റെ ഏറ്റവും നല്ല സമയത്തിലൂടെ കടന്നു പോകുന്നോള്‍ കുറച്ചു കൂടുതല്‍ പ്രേക്ഷക പിന്തുണ ഒരു പക്ഷെ വലിയ മാറ്റങ്ങള്‍ ഉണ്ടാക്കിയേക്കാം.

നിങ്ങള്‍ക്കെല്ലാം മികച്ച തിയേറ്റര്‍ അനുഭവം ആവണം എന്ന ആഗ്രഹത്തോടെ ഒരുപാട് പരിമിതികള്‍ക്കുള്ളില്‍ നിന്നു കൊണ്ട് വളരെയധികം കഷ്ടപ്പെട്ട് തന്നെയാണ് ഇവിടെ മികച്ച ക്വാളിറ്റി ഉള്ള സിനിമകള്‍ ഉണ്ടാക്കപ്പെടുന്നത്. ഞാന്‍ ഈ പോസ്റ്റില്‍ പറഞ്ഞിട്ടുള്ള കാര്യങ്ങള്‍ വളരെ നല്ല അര്‍ത്ഥത്തില്‍ മാത്രം എല്ലാവരും മനസ്സിലാക്കും എന്ന വിശ്വാസത്തില്‍ നിറുത്തട്ടെ! എല്ലാവര്‍ക്കും നന്മ മാത്രം വരട്ടെ! അപ്പൊ ഇനി തിയേറ്ററില്‍ കാണാം. നന്ദി!