മിഷ്‌കിന്‍ സംവിധാനം ചെയ്യുന്ന സവരക്കത്തി എന്ന തമിഴ് ചിത്രത്തില്‍ ശക്തമായ കഥാപാത്രത്തെ അവതരിപ്പിച്ചുകൊണ്ട് ചെറിയൊരു ഇടവേളയ്ക്ക് ശേഷം തിരിച്ചെത്തുകയാണ് മലയാളിയായ തെന്നിന്ത്യന്‍ നടി ഷംന കാസിം. സിനിമയില്‍ താന്‍ നേരിട്ട അവഗണനകളെ കുറിച്ചെല്ലാം ഇതിനോടകം മനസ്സ് തുറന്നു കഴിഞ്ഞ ഷംന ഫേസ്ബുക്കില്‍ വരുന്ന കമന്റുകളെ കുറിച്ചും വിവാദങ്ങളെ കുറിച്ചുമാണ് ഇപ്പോള്‍ പ്രതികരിയ്ക്കുന്നത്.

എന്നെ പറ്റി ഒരുപാട് ഗോസിപ്പുകള്‍ വന്നിട്ടുണ്ടെന്നും ഗര്‍ഭിണിയായി അഭിനയിച്ചപ്പോള്‍ ഷംന വിവാഹം കഴിക്കാതെ ഗര്‍ഭിണിയായി എന്ന് വരെ വാര്‍ത്തകള്‍ പ്രചരിച്ചുവെന്നും താരം പറയുന്നു. എന്നെ പറ്റിയുള്ള ഗോസിപ്പുകള്‍ വരുമ്പോള്‍ വീട്ടുകാരാണ് ഏറ്റവും കൂടുതല്‍ വിഷമിച്ചത്. ഞാനും ഒരുപാട് കരഞ്ഞിരുന്നു. ഇനി ഇക്കാര്യത്തെ ചൊല്ലി കരയാന്‍ എന്നെ കിട്ടില്ലെന്നും താരം പറയുന്നു.അതുപോലെ തന്നെ താന്‍ പൊട്ട് തൊട്ടുള്ള ഫോട്ടോസ് ഫേസ്ബുക്കിലും മറ്റും ഇടുമ്പോള്‍ ഒരുപാട് കമന്റുകള്‍ വരാറുണ്ട്. മുസ്ലീം പെണ്‍കുട്ടികള്‍ പൊട്ട് തൊടാമോ? പലരും ചീത്തവിളിച്ചാണ് കമന്റ് പറയുന്നത്. ഞാനത് മൈന്റ് ചെയ്യാറില്ല.

തീര്‍ച്ചയായും ഞാനൊരു മുസ്ലീം പെണ്‍കുട്ടിയാണ്. ജീവിതത്തില്‍ അതിന്റെ ചിട്ടകള്‍ പാലിക്കുന്നുണ്ട്. പക്ഷേ ഞാനൊരു സെലിബ്രിറ്റി കൂടിയാണ്. പൊട്ട് തൊടേണ്ടിവന്നാല്‍ തീര്‍ച്ചയായും തൊടും. അതിനെതിരെ ആര് കമന്റ് പറഞ്ഞാലും എനിക്ക് പേടിയില്ല. ഇളം നിറത്തിലുള്ള പൊട്ടുകളോടാണ് താല്‍പ്പര്യം. ചുവന്ന പൊട്ടുകളാണ് കൂടുതലിഷ്ടം എന്നും ഷംന പറഞ്ഞു.