ജീവനൊടുക്കിയ സീരിയല്‍ താരം സബര്‍ണയുടെ മരണകാരണം മാനസിക സമ്മര്‍ദ്ദമെന്ന് സൂചന. ആത്മഹത്യയോട് അടുത്ത ദിവസങ്ങളില്‍ സബര്‍ണ കടുത്ത മാനസിക സമ്മര്‍ദ്ദത്തിന് അടിമയായിരുന്നെന്നാണ് സൂചന. അവരുടെ ഫെയ്‌സ്ബുക്ക് പോസ്റ്റുകള്‍ ഇക്കാര്യം വ്യക്തമാക്കുന്നു.

മലയാളത്തില്‍ നിരവധി സീരിയലുകള്‍ ചെയ്തു കൊണ്ടിരിക്കുകയായിരുന്നു സബര്‍ണ. അതിനാല്‍ തന്നെ അവരുമായി ഏറെ അടുപ്പമുള്ള താരങ്ങളും അണിയറക്കാരും അല്‍പ്പം ആശങ്കയിലാണ്.

വ്യക്തി ബന്ധങ്ങളിലെ തകര്‍ച്ചയാണ് അവരെ മാനസിക സമ്മര്‍ദ്ദത്തിലേക്ക് നയിച്ചതെന്നാണ് പോലീസ് നിഗമനം. പലരും ചൂഷണം ചെയ്തതും പ്രതീക്ഷയ്‌ക്കൊത്ത് അവസരങ്ങള്‍ ലഭിക്കാതിരുന്നതും സബര്‍ണയെ നിരാശപ്പെടുത്തി.

സബര്‍ണ ആത്മഹത്യ ചെയ്തതാണെന്ന നിഗമനത്തില്‍ തന്നെയാണ് പോലീസ്. കയ്യിലെ ഞരമ്പ് മുറിച്ചിരുന്നു. സബര്‍ണ മയക്കുമരുന്ന് ഉപയോഗിച്ചിരുന്നതായും പറയപ്പെടുന്നു. കഴിഞ്ഞ വെള്ളിയാഴ്ചയാണ് ചെന്നൈയിലെ വീട്ടില്‍ സബര്‍ണയുടെ മൃതദേഹം കണ്ടെത്തിയത്. സബര്‍ണ താമസിച്ചിരുന്ന വീട്ടില്‍ നിന്ന് ദുര്‍ഗന്ധം വമിച്ചതിനെ തുടര്‍ന്ന് അയല്‍വാസികള്‍ പോലീസില്‍ വിവരം അറിയിക്കുകയായിരുന്നു.

ഹരിചന്ദനം എന്ന സീരിയലിലൂടെ മലയാളി പ്രേക്ഷകര്‍ക്കും സുപരിചിതയാണ് സുബര്‍ണ. ഹരിചന്ദനത്തിലെ വില്ലത്തിയായിരുന്നു സബര്‍ണ. മായമോഹിനിയില്‍ ആണ്‍വേഷത്തിലും സബര്‍ണ അഭിനയിച്ചിരുന്നു.