നടി സബര്‍ണയുടെ ദുരൂഹ മരണത്തില്‍ വ്യക്തമായ തെളിവുമായി തമിഴ്‌നാട് പോലീസ് കേരളത്തിലേക്ക്. സബര്‍ണയുടെ അജ്ഞാത കാമുകന്‍ ഒരു മലയാള സീരിയല്‍ താരമാണെന്ന സൂചനകളെ തുടര്‍ന്നാണ് അന്വേഷണം കേരളത്തിലേയ്ക്കും നീളുന്നത്.

നടിയുമായി അടുപ്പമുണ്ടായിരുന്ന സുഹൃത്തുക്കളില്‍ നിന്നുമാണ് ഇവര്‍ തുടരെ തുടരെ കേരളത്തില്‍ പോയിരുന്നു എന്ന വിവരം ലഭിച്ചത്. സബര്‍ണയ്ക്ക് ഒരു മലയാള സീരിയല്‍ താരവുമായി അടുപ്പമുണ്ടെന്നും ഇവരുടെ മൊഴിയിലുണ്ട്. എന്നാല്‍, ആളാരാണെന്ന് അടുത്ത സുഹൃത്തുക്കളോടു പോലും നടി വെളിപ്പെടുത്തിയിരുന്നില്ല. ഇതേതുടര്‍ന്ന് ഇവര്‍ തുടര്‍ച്ചയായി നടത്തിയിരുന്ന കേരള യാത്രകളെ കുറിച്ച് പൊലീസ് അന്വേഷിച്ചിക്കുന്നത്. സബര്‍ണയുടെ ഫോണ്‍കോളുകളും പരിശോധിക്കുന്നുണ്ട്.

അവസാന നാളുകളില്‍ സബര്‍ണ മാനസികമായി തളര്‍ന്നിരുന്നുവെന്നും പലപ്പോഴും വിഷാദ രോഗികളെപ്പോലാണ് പെരുമാറിയിരുന്നതെന്നുമാണ് നടിയുടെ അയല്‍ക്കാരുടെ മൊഴികളില്‍ നിന്നും മനസിലാകുന്നത്. കാമുകനുമായുള്ള ബന്ധത്തിലെ വിള്ളലാകാം സബര്‍ണയെ ഇത്തരമൊരു നിലയില്‍ എത്തിച്ചത് എന്നാണ് നിഗമനം.

തന്റെ മകള്‍ ജീവനൊടുക്കില്ലെന്നും ആരോ മന:പൂര്‍വ്വം ഇല്ലാതാക്കിയതാണ് എന്നുമാണ് നടിയുടെ മാതാപിതാക്കള്‍ പറയുന്നത്. വെള്ളിയാഴ്ചയാണ് സബര്‍ണയെ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തിയത്. മൃതദേഹം പൂര്‍ണ നഗ്‌നമായിരുന്നു. ഇതോടെ നടിയെ ബലാത്സംഗം ചെയ്ത് കൊന്നെന്ന ആരോപണവും ശക്തമായി.