താന്‍ അഭിനയം നിര്‍ത്താന്‍ തീരുമാനിച്ചിരുന്നെന്ന് നടി ഷംന കാസിം. അഭിനയിച്ച ചിത്രങ്ങള്‍ പലതും വിജയിച്ചില്ല. അതുകൊണ്ടാകാം അംഗീകാരങ്ങളൊന്നും ലഭിച്ചില്ല. അഭിനയം അനുമോദിക്കപ്പെട്ടുമില്ല. അതോടെയാണ് അഭിനയം നിര്‍ത്തി നൃത്തത്തില്‍ മാത്രം ശ്രദ്ധിക്കാന്‍ ഷംന തീരുമാനിച്ചത്. ആ സമയത്താണ് തെലുങ്കില്‍ നിന്ന് കുറേ അവസരങ്ങള്‍ ലഭിച്ചത്. തുടര്‍ന്ന് തമിഴില്‍ നിന്നും നിരവധി ഓഫറുകള്‍ വന്നു. അതും അഭിനയ സാധ്യതയുള്ള വേഷങ്ങള്‍. അത് വലിയ അംഗീകാരം തന്നെയാണ്. നമ്മള്‍ ചെയ്യുന്ന ജോലി അംഗീകരിക്കപ്പെടുന്നതിന്റെ തെളിവാണതെന്നും താരം പറഞ്ഞു.

മലയാളത്തില്‍ അഭിനയിക്കാന്‍ തുടങ്ങിയിട്ട് പത്ത് വര്‍ഷത്തിലധികമായി. എന്നിട്ടും നല്ലൊരു കഥാപാത്രം ലഭിച്ചില്ല. അതില്‍ വിഷമമുണ്ടെന്നും ഷംന പറഞ്ഞു. ഇപ്പോഴും മലയാളം ഐറ്റം ഡാന്‍സിനും മറ്റുമാണ് താരത്തെ വിളിക്കുന്നത്. അതിലവര്‍ക്ക് പരിഭവമില്ല. മമ്മൂട്ടിയുടെ രാജാധിരാജയിലാണ് അവസാനമായി ഐറ്റംഡാന്‍സ് ചെയ്തത്. മുസ്്‌ലിം മതവിശ്വാസിയായ തനിക്ക് എല്ലാവിധ പിന്തുണയും നല്‍കുന്നത് മാതാപിതാക്കളാണെന്ന് താരം പറഞ്ഞു. അവരോടാണ് തീര്‍ത്താല്‍ തീരാത്ത കടപ്പാടുള്ളത്. സോഷ്യല്‍ മീഡിയയിലെ വിമര്‍ശനങ്ങളെ ഭയക്കുന്നില്ലെന്നും താരം വ്യക്തമാക്കി.

മൂന്ന് തെലുങ്ക് പടത്തിലും ഒരു തമിഴ് സിനിമയിലും അഭിനയിക്കാന്‍ കരാറൊപ്പിട്ട് കഴിഞ്ഞു താരം. തെലുങ്കിലോ തമിഴിലോ ഏതെങ്കിലും ഒരുപടം സൂപ്പര്‍ഹിറ്റായാല്‍ അടുത്ത രണ്ട് വര്‍ഷത്തേക്ക് നിരവധി ഓഫറുകള്‍ ലഭിക്കും. ഇതിന് പുറമേ നിരവധി ഡാന്‍സ് പരിപാടികളും കമ്മിറ്റ് ചെയ്തിട്ടുണ്ട്. തല്‍ക്കാലം വിവാഹത്തെ കുറിച്ച് ആലോചിക്കുന്നില്ലെന്ന് താരം പറഞ്ഞു.