ദിലീപ് കാവ്യ വിവാഹത്തിന് പിന്നാലെ തന്റേതെന്ന പേരില്‍ പല വാര്‍ത്തകളും നവമാധ്യമങ്ങളില്‍ പ്രചരിക്കുന്നതായി കണ്ടെന്നും ഇത്തരം വ്യാജ വാര്‍ത്തകള്‍ പടച്ചുവിടുന്നവര്‍ക്കെതിരെ നിയമനടപടി സ്വീകരിക്കുമെന്നും നടി ഭാവന.

ദിലീപിന്റെയും കാവ്യയുടെയും വിവാഹം അവരുടെ വ്യക്തിപരമായ കാര്യമാണ്. എന്നെ ഒരു തരത്തിലും ബാധിക്കുന്ന ഒന്നല്ല അത്. ഇതിനോടൊന്നും പ്രതികരിക്കാനും ഞാന്‍ ആഗ്രഹിക്കുന്നില്ല,ഭാവന വ്യക്തമാക്കി.ഇരുവരുടേയും വിവാഹത്തിന് തന്നെ ക്ഷണിച്ചെന്നും എന്നാല്‍ മനപൂര്‍വം പോകാത്തതാണെന്നുമൊക്കെയാണ് വാര്‍ത്ത പ്രചരിക്കുന്നത്. ഇതെല്ലാം വ്യാജ വാര്‍ത്തകളാണ്. ദിലീപ് കാവ്യ മാധവന്‍ വിവാഹത്തിന് തന്നെ ആരും ക്ഷണിച്ചിട്ടില്ല. അതു കൊണ്ടാണ് പോകാതിരുന്നത്. എന്നെ ക്ഷണിക്കണോ വേണ്ടയോ എന്നുള്ളത് തീരുമാനിക്കേണ്ടത് അവരാണ്. അവര്‍ക്ക് അടുപ്പമുള്ളവരെ അവര്‍ വിവാഹത്തിനു ക്ഷണിച്ചു. അത് ആരൊക്കെയാവണം എന്നുള്ളത് അവരുടെ ഇഷ്ടം. എനിക്കതില്‍ ഒരു പരിഭവവുമില്ല. മനോരമ ഓണ്‍ലൈനിന് നല്‍കിയ അഭിമുഖത്തില്‍ സംസാരിക്കുകയായിരുന്നു ഭാവന.ദിലീപ് കാവ്യ വിവാഹത്തിന് ഭാവന എത്താതിരുന്നത് ദിലീപുമായുള്ള അകല്‍ച്ച കാരണമാണെന്നും ദിലീപ് കാവ്യ വിഷയത്തില്‍ ഭാവന മഞ്ജുവാര്യര്‍ക്കൊപ്പമാണെന്നുമുള്ള തരത്തിലായിരുന്നു റിപ്പോര്‍ട്ടുകള്‍ വന്നത്.