റാണി മുഖര്‍ജി മകള്‍ ആദിറയുടെ ഒന്നാം പിറന്നാള്‍ ദിനത്തില്‍ റാണി കുഞ്ഞുവാവയ്ക്കു നല്‍കിയ സമ്മാനത്തെക്കുറിച്ചാണ് ഇപ്പോള്‍ ബി ടൗണ്‍ ചര്‍ച്ച ചെയ്യുന്നത്.ആദിറയെ താന്‍ എത്രത്തോളം സ്‌നേഹിക്കുന്നുണ്ടെന്നും അവള്‍ വന്നതോടു കൂടി തന്റെ ജീവിതത്തിലുണ്ടായ പോസിറ്റീവ് മാറ്റങ്ങളെക്കുറിച്ചും ആദിറയെ എങ്ങനെയാണ് താന്‍ മിടുക്കിക്കുട്ടിയായി വളര്‍ത്താന്‍ പോകുന്നത് എന്നതിനെക്കുറിച്ചുമെല്ലാം വളരെ വിശദമായി എഴുതിയ ഒരു കത്താണ് 36 വയസ്സുകാരിയായ അമ്മ റാണി കുഞ്ഞ് ആദിറയ്ക്കു നല്‍കിയ പിറന്നാള്‍ സമ്മാനം.

യഷ്രാജ് ഫിലിംസിന്റെ ട്വിറ്റര്‍ പേജിലാണ് റാണിയുടെ കൈപ്പടയിലുള്ള കത്ത് ട്വീറ്റ് ചെയ്തിരിക്കുന്നത്. ഒരൊറ്റ ദിവസം കൊണ്ട് തന്റെ ജീവിതം മാറ്റിമറിച്ചയാളാണ് കുഞ്ഞുവാവയെന്നും. ഒരു കുഞ്ഞുണ്ടാവുന്നത് അല്‍പം ഭയപ്പെടേണ്ട സംഗതിയാണെന്നും കുഞ്ഞു പിറക്കുന്ന ദിവസം മുതല്‍ നമ്മള്‍ നമുക്കുവേണ്ടി ജീവിക്കുന്നതുപേക്ഷിച്ച് അവര്‍ക്കായി ജീവിച്ചു തുടങ്ങുമെന്നും പറഞ്ഞുകൊണ്ടാണ് റാണി കത്തെഴുതിത്തുടങ്ങിയത്.

ഒരു സ്ത്രീ ഒരു കുഞ്ഞിനു ജന്മം നല്‍കുന്ന ദിവസം അവള്‍ പുനര്‍ജനിക്കുകയാണ്. കുഞ്ഞിന്റെ പിറവിക്കുശേഷം ആ സ്ത്രീ ജനിക്കുന്നത് ഒരു അമ്മയായാണ്. ആദിറയുടെ പിറവിയോടെ ക്ഷമയും ശാന്തതയും സഹനശക്തിയും തനിക്കു കൂടിയതായി റാണി അവകാശപ്പെടുന്നു. ഇതൊക്ക ഒരു രാത്രി ഇരുട്ടിവെളുത്തപ്പോള്‍ എന്നിലുണ്ടായ മാറ്റമാണ്. ഒരു അമ്മയായ ശേഷമുള്ള നിമിഷം മുതല്‍ ഈ മാറ്റങ്ങള്‍ എന്നില്‍ പ്രകടമാണ്.

ഭയാശങ്കകളൊന്നും അലട്ടാത്ത ഒരു മിടുക്കിക്കുട്ടിയായി കുഞ്ഞിനെ വളര്‍ത്തണമെന്നാണ് തന്റെ ആഗ്രഹമെന്നും ധൈര്യവും, ബുദ്ധിയും അച്ചടക്കവുമുള്ള കുട്ടിയായി അവള്‍ മാറണമെന്നും. അവളെക്കുറിച്ചോര്‍ത്ത് എല്ലാവരും അഭിമാനിക്കുന്ന വിധം അവള്‍ പെരുമാറട്ടെയെന്നും പിറന്നാള്‍ക്കുട്ടിയെ അനുഗ്രഹിച്ചുകൊണ്ടാണ് റാണി കത്ത് അവസാനിപ്പിക്കുന്നത്.