തെന്നിന്ത്യയില്‍ വെന്നിക്കൊടി പാറിപ്പിച്ച മലയാള നടിയാണ് നയന്‍താര. ഏറെ ശ്രദ്ധയോടെ സിനിമകള്‍ തിരഞ്ഞെടുത്താണ് നയന്‍താര മുന്നേറിയത്. ഇതിനിടെ തെലുങ്ക് സിനിമയില്‍ നിന്ന് താരത്തെ പുറത്താക്കാനുള്ള ശ്രമങ്ങള്‍ ചില നിര്‍മ്മാതാക്കള്‍ നടത്തുന്നതായാണ് സൂചന.

കത്തിസണ്ടൈ സംവിധായകന്‍ സുരാജിനെതിരെ കടുത്ത വിമര്‍ശനവുമായി നയന്‍താര രംഗത്തെത്തിയിരുന്നു. സൂരജിന്റെ സ്ത്രീവിരുദ്ധ പരാമര്‍ശത്തിനെതിരെയാണ് നടി പൊട്ടിത്തെറിച്ചത്. നടിമാരുടെ പാദം വരെ മറയ്ക്കുന്ന വസ്ത്രം തുന്നിക്കൊണ്ട് ഡിസൈനര്‍ വന്നാല്‍ അവരെ തിരിച്ചയക്കുമെന്നും വസ്ത്രത്തിന്റെ നീളം കുറച്ചു കൊണ്ടു വരാന്‍ ആവശ്യപ്പെടുമെന്നുമായിരുന്നു സുരാജിന്റെ പ്രസ്താവന. അടുത്തിടെ നല്‍കിയ ഒരു അഭിമുഖത്തിലാണ് സുരാജ് ഇക്കാര്യം പറഞ്ഞത്. ഇറക്കം കുറഞ്ഞ വസ്ത്രം ധരിക്കുന്നതിന് നടിമാര്‍ക്ക് അസൗകര്യമുണ്ടോയെന്ന് താന്‍ പരിഗണിക്കാറില്ലെന്നും സുരാജ് പറഞ്ഞിരുന്നു.

ഇതിനെതിരെ നയന്‍താര രംഗത്തെത്തുകയും പണത്തിന് വേണ്ടി തുണിയഴിക്കുന്നവരല്ല നടിമാരെന്നും പറഞ്ഞു. ഇത് മറ്റു ചില നടിമാര്‍ ഏറ്റുപിടിച്ചതോടെ സംവിധായകന് ക്ഷീണമായി. മറ്റ് സംവിധായകര്‍ അണിയറ നീക്കം നടത്തിയതോടെ നിര്‍മ്മാതാക്കളും അവര്‍ക്ക് സപ്പോര്‍ട്ടായി.

നയന്‍സിന്റെ സിനിമകള്‍ക്ക് പഴയതു പോലെ കളക്ഷന്‍ ഇല്ലെന്നും വന്‍ നഷ്ടമുണ്ടാക്കുന്നെന്നുമാണ് ഈ നിര്‍മ്മാതാക്കളുടെ ആരോപണം. എന്നാല്‍ ഇതൊന്നും ശരിയല്ലെന്നതാണ് സത്യം. വ്യാജ പ്രചരണങ്ങളില്‍ വീഴരുതെന്ന് താരം ആരാധകരോട് നേരത്തേ തന്നെ വ്യക്തമാക്കിയിരുന്നു. അതു കൊണ്ടു തന്നെ ഇപ്പോള്‍ ഏറെ ശ്രദ്ധയോടെയാണ് ചിത്രങ്ങള്‍ തിരഞ്ഞെടുക്കുന്നത്.

ഒടുവില്‍ പുറത്തിറങ്ങിയ കാര്‍ത്തി നായകനായ കാഷ്‌മോരയില്‍ മികച്ച പ്രകടനമാണ് നയന്‍സ് കാഴ്ച വെച്ചത്. ഡോറ, ഇമൈക നൊടികള്‍, ആരം എന്നീ സിനിമകളാണ് നയന്‍സിന്റേതായി ഉടന്‍ എത്തുന്നത്.