യുവ നടിയെ ആക്രമിച്ച കേസില്‍ പള്‍സര്‍ സുനിയുടെ അഭിഭാഷകനെ ചോദ്യം ചെയ്യാന്‍ ഹൈക്കോടതി അനുവാദം നല്‍കിയതോടെ അഭിഭാഷകനും സിനിമാലോകവും തമ്മിലുള്ള ബന്ധവും പുറത്താകുന്നു. അഭിഭാഷകനും പള്‍സര്‍ സുനിയുമായുള്ള ബന്ധം വിരല്‍ ചൂണ്ടുന്നത് മറ്റ് പ്രമുഖ താരങ്ങളേയാണ്. അഭിഭാഷകന് സിനിമാലോകവുമായി അടുത്ത ബന്ധമാണുള്ളത്. സിനിമാ ലോകത്തെ പല ഇടപാടുകളിലും അഭിഭാഷകന് ബന്ധമുണ്ടെന്നാണ് കരുതുന്നത്.

രണ്ടാമത് വക്കാലത്തെടുത്ത പ്രതീഷ് ചാക്കോയെ ചോദ്യം ചെയ്യാനുള്ള അനുമതിയാണ് കോടതി നല്‍കിയിരിക്കുന്നത്. രണ്ടു ദിവസത്തിനുള്ളില്‍ പോലീസ് മുമ്പാകെ ഹാജരാകണമെന്നാണ് പ്രതീഷ് ചാക്കോയ്ക്ക് കോടതിയില്‍ നിന്ന് ലഭിച്ചിരിക്കുന്ന നിര്‍ദേശം.

സുനിയുടെ മൊബൈലും സിം കാര്‍ഡും ലഭിച്ചത് അഭിഭാഷകന്റെ ഓഫിസില്‍ നിന്നാണ്. നടിയെ ആക്രമിക്കുമ്പോള്‍ സുനി ധരിച്ചിരുന്ന വസ്ത്രങ്ങളും ഇവിടെ നിന്ന് ലഭിച്ചതായി പോലീസ് അറിയിച്ചിരുന്നു. ഇതേത്തുടര്‍ന്നാണ് പ്രതീഷ് ചാക്കോയെ ചോദ്യം ചെയ്യാന്‍ അനുവദിക്കണമെന്ന് പോലീസ് ആവശ്യപ്പെട്ടത്.