അച്ഛൻ തങ്കച്ചൻ ഇമ്മാനുവൽ നിർമ്മിച്ച കമലിന്റെ സ്വപ്ന സഞ്ചാരി എന്ന ചിത്രത്തിലൂടെ ജയറാമിന്റേയും സംവൃതയുടേയും മകളായി അഭിനയിച്ചാണ് അനു ഇമ്മാനുവൽ മലയാള സിനിമാലോകത്തേക്ക് കടന്നുവന്നത്. ഈ ചിത്രത്തിൽ അഭിനയിക്കുമ്പോൾ അനു ഒൻപതാം തരം വിദ്യാർഥിനി ആയിരുന്നു.

സ്കൂൾ വിദ്യാഭ്യാസത്തിനു ശേഷം അനു ഉന്നത വിദ്യാഭ്യാസത്തിനായി അമേരിക്കയിൽ പോയി. അമേരിക്കയിൽ നിന്നും തിരിച്ചു വന്ന ശേഷം 2016 ൽ റിലീസായ ആക്ഷൻ ഹീറോ ബിജുവിൽ നായികയായി അനു തിരിച്ചു വന്നു. പക്ഷേ ഇപ്പോള്‍ മലയാളത്തേക്കാള്‍ അനുവിന് തിരക്ക് തെലുങ്കിലാണ്. മലയാളത്തിൽ വെറും രണ്ടുസിനിമകൾ മാത്രം അഭിനയിച്ച അനുവിന് തെലുങ്കിലും തമിഴിലും ഇറങ്ങിയതും ഇറങ്ങാനുള്ളതുമായി കൈനിറയെ ചിത്രങ്ങളാണ്.

അനു അഭിനയിക്കുന്നത് മുൻനിര നടന്മാരോടൊപ്പമാണ്. പവന്‍ കല്ല്യാണും അല്ലു അര്‍ജുനും വിശാലും ഇപ്പോള്‍ ഗോപിചന്ദുമുണ്ട്. ശരിക്കും ഒരു മുന്‍നിരക്കാരിയായി മാറിക്കഴിഞ്ഞു മലയാള സിനിമ ശ്രദ്ധിക്കാതെപ്പോയ അനു. തെലുങ്കിലെ വമ്പൻ താരങ്ങള്‍ക്കൊപ്പമുള്ള അഭിനയം അത്ര എളുപ്പമായിരുന്നില്ലെന്ന് പറയുകയാണ് അനു.

തെലുങ്കിലെ സൂപ്പര്‍ പവര്‍ സ്റ്റാര്‍ പവന്‍ കല്ല്യാണിനൊപ്പം ആദ്യമായി അഭിനയിക്കുമ്പോൾ ശരിക്കും വിറച്ചിരുന്നുവെന്ന് അനു പറയുന്നു. പവന്‍ സാറിനൊപ്പമുള്ള ആദ്യ ദിവസത്തെ ഷൂട്ടിങ് സമയത്ത് ഞാന്‍ ശരിക്കും പേടിച്ചാണ് നിന്നത്. അതൊരു റൊമാന്റിക് സീനായിരുന്നു.

ഞാന്‍ ഡയലോഗൊക്കെ മനപ്പാഠമാക്കിയാണ് എത്തിയത്. എന്നാല്‍, അദ്ദേഹത്തെ കണ്ടതോടെ ഞാന്‍ പറയേണ്ട ഡയലോഗൊക്കെ മറന്നു. പക്ഷേ, അദ്ദേഹം കൂളായ ഒരു വ്യക്തിയായിരുന്നു. ഒരുപാട് തമാശകളും പറയും. അദ്ദേഹത്തിനൊപ്പം നില്‍ക്കുമ്പോള്‍ അനുഗ്രഹിക്കപ്പെട്ട ഒരു അനുഭവമാണെന്നും അനു പറഞ്ഞു.

ഗോപിചന്ദിനൊപ്പം അഭിനയിക്കുന്ന ഓക്സിജന്‍ എന്ന ചിത്രം വൈകുന്നതില്‍ തനിക്ക് ആശങ്കയൊന്നുമില്ലെന്നും അനു പറഞ്ഞു. എന്റെ രണ്ട് സിനിമകള്‍ ഇപ്പോള്‍ തന്നെ ഇറങ്ങിക്കഴിഞ്ഞു. മറ്റ് ചില ഓഫറുകളുണ്ട്. ഇതൊന്നുമില്ലെങ്കില്‍ ഒരുപക്ഷേ ഓക്സിജന്‍ വൈകുന്നതില്‍ ഞാന്‍ ആശങ്കപ്പെടുമായിരുന്നുവെന്നും നടി പറഞ്ഞു.