ആത്മഹത്യാഭീഷണി മുഴക്കിയിരിക്കുകയാണ് വിവാദ സിനിമാ വിമർശകനായ കമാല്‍ ആര്‍ ഖാൻ. ബോളിവുഡ് താരം ആമിര്‍ഖാന്റെ പരാതിയെതുടർന്ന് കമാലിന്റെ അക്കൗണ്ട് ട്വിറ്റര്‍ അധികൃതർ സസ്‌പെൻഡ് ചെയ്തിരുന്നു. ട്വിറ്റര്‍ അക്കൗണ്ട് തിരിച്ചുകിട്ടിയില്ലെങ്കില്‍ ആത്മഹത്യ ചെയ്യുമെന്നാണ് കമാൽ പറയുന്നത്. അതിന് 15ദിവസത്തെ സാവകാശവും കമാൽ ട്വിറ്റർ അധികൃതർക്ക് നൽകിയിട്ടുണ്ട്.

ആമിർഖാന്റെ പുതിയ ചിത്രമായ സീക്രട്ട് സൂപ്പര്‍സ്റ്റാറിന്‍റെ ക്ലൈമാക്സ് കമാൽ വെളിപ്പെടുത്തിയതിനെത്തുടർന്നാണ് താരം പരാതി നൽകിയത്. ട്വിറ്റര്‍ അധികൃതര്‍ തന്നെ വഞ്ചിക്കുകയായിരുന്നെന്നാണ് കമാൽ പറയുന്നത്.

ട്വിറ്ററില്‍ ആറ് മില്യണ്‍ ഫോളോവേഴ്സിനെയുണ്ടാക്കാന്‍ നാല് വര്‍ഷവും കുറെയേറെ പണവും ചെലവഴിച്ചിട്ടുണ്ടെന്ന് കമാൽ പറഞ്ഞിരുന്നു. ട്വിറ്റർ അക്കൗണ്ട് നഷ്ട്ടപെട്ടതിനുശേഷം അതീവ ദുഖിതനാണെന്നും താന്‍ ആത്മഹത്യ ചെയ്താല്‍ ട്വിറ്റര്‍ അധികൃതരായിരിക്കും ഉത്തരവാദികളെന്നും കമാൽ പറഞ്ഞു.

താരങ്ങളെ വിമര്‍ശിച്ചുകൊണ്ട് സോഷ്യല്‍മീഡിയയില്‍ താരമായി മാറിയ വ്യക്തിയാണ് കമാൽ. തന്റെ ട്വിറ്റർ അക്കൗണ്ട് സസ്‌പെൻഡ് ചെയ്യപ്പെട്ട വിവരം കമാൽ മറ്റൊരു അക്കൗണ്ടിലൂടെ ആരാധകരെ അറിയിച്ചിരുന്നു.

ബോളിവുഡ് താരങ്ങളെ സ്ഥിരമായി വിമര്‍ശിക്കാറുള്ള കെആര്‍കെ മോഹന്‍ലാലിനെ ഛോട്ടാഭീം എന്ന് ട്വീറ്റ് ചെയ്തതോടെയാണ് മലയാളികള്‍ ശ്രദ്ധിച്ചുതുടങ്ങിയത്. ഒടുവിൽ ലാലേട്ടൻ ആരാധകർ പൊങ്കാലയിട്ടപ്പോൾ കമാൽ മാപ്പ് പറയുകയും ചെയ്തിരുന്നു.