ദുൽഖർ സൽമാന്റെ ഏറ്റവും പുതിയ തമിഴ് ചിത്രമാണ് 'കണ്ണും കണ്ണും കൊള്ളയടിത്താല്‍'. ദേസിങ് പെരിയ സാമിയുടെ സംവിധാനത്തിലെ ആദ്യചിത്രം. ചിത്രത്തിൽ സിദ്ധാർഥ്‌ എന്ന ഐടി പ്രൊഫഷണലിന്റെ വേഷത്തിലാണ് ദുൽഖർ എത്തുന്നത്. റൊമാന്റിക് കോമഡി പശ്ചാത്തലത്തിലുള്ള സിനിമയാണിത്. ചിത്രത്തിൽ ദുൽഖറിന്റെ നായികയായി എത്തുന്നത് ഋതു വർമയാണ്.

ദുൽഖറിന്റെ നായികയായി അഭിനയിക്കുന്നതിനായി നിരവധി നടിമാരെ സംവിധായകൻ പരിഗണിച്ചിരുന്നു. എന്നാൽ,​ ഒടുവിൽ നറുക്ക് വീണത് ഋതു വർമയ്ക്കാണ്. ഇപ്പോൾ തന്നെ ഋതുവിന് കൈനിറയെ ചിത്രങ്ങളുണ്ട്. ദുൽക്കറിന്റെ ചിത്രമായതിനാൽ കൂടിയാണ് ഋതു അഭിനയിക്കാൻ തയ്യാറായത്. ഒരു ഓൺലൈൻ മാധ്യമത്തിന് നൽകിയ അഭിമുഖത്തിൽ ദുൽഖറിനെക്കുറിച്ച് ഋതു വർമ പറയുന്നതിങ്ങനെ;

"ദുല്‍ഖറിനെ ക്യാമറയ്ക്ക് മുന്നില്‍ കാണുന്നത് തന്നെ സന്തോഷകരമായ കാര്യമാണ്. അദ്ദേഹം അഭിനയിക്കുകയാണെന്നു തോന്നുകയേ ഇല്ല. അത്രയ്ക്ക് അനായാസകരമായാണ് ദുല്‍ഖര്‍ അത് ചെയ്യുന്നത്. ഞാനിതെപ്പോഴും ദുല്‍ഖറോട് പറയാറുണ്ട്. മാത്രമല്ല മണിരത്നം സാറിനെ പോലുള്ള വലിയ പ്രതിഭകളുടെ കൂടെ ജോലി ചെയ്ത പരിചയം ഉള്ളതുക്കൊണ്ട് ദുല്‍ഖറിനെ എപ്പോഴും ഞാൻ ചോദ്യങ്ങള്‍ കൊണ്ട് പൊറുതിമുട്ടിച്ചിരുന്നു. പെട്ടെന്ന് തന്നെ കഥാപാത്രമായി മാറാന്‍ ദുല്‍ഖറിന് കഴിയും.

വ്യത്യസ്തമായ നിരവധി കഥാപാത്രങ്ങള്‍ ചെയ്യാന്‍ ദുല്‍ഖറിന് ഭാഗ്യം കിട്ടിയിട്ടുണ്ട്. തന്റെ ജോലിയോട് വളരെ ആത്മാര്‍ത്ഥതയുള്ള വ്യക്തിയാണ് ദുല്‍ഖര്‍ അതുകൊണ്ട് തന്നെ എപ്പോഴും വ്യത്യസ്തമായി എന്തെങ്കിലും ചെയ്യണമെന്ന് അദ്ദേഹം ആഗ്രഹിക്കുന്നു. ദുല്‍ഖറിനൊപ്പം അഭിനയിക്കാന്‍ സാധിച്ചത് വളരെ സന്തോഷമുള്ള കാര്യമാണ്. മികച്ചൊരു അഭിനേതാവും അതേസമയം നല്ലൊരു വ്യക്തിത്വവുമാണ് അദ്ദേഹത്തിന്റേത്.

ദുല്‍ഖറിന്റെ അഭിനയത്തെ ഞാന്‍ എന്നും ഇഷ്ടപ്പെട്ടിരുന്നു. അദ്ദേഹത്തോടൊപ്പം പ്രവര്‍ത്തിക്കാന്‍ സാധിച്ചത് വലിയൊരു അനുഭവമാണ്. തമാശക്കാരനാണ് ദുല്‍ഖര്‍ അതുകൊണ്ടു തന്നെ ചിത്രീകരണ സമയമൊക്കെ തമാശകളുമായി നല്ല രസമായിരുന്നു-" ഋതു വർമ പറഞ്ഞു.