മലയാളചലച്ചിത്ര രംഗത്ത് ഒന്നര പതിറ്റാണ്ടുകളായി സജീവമായി നിൽക്കുന്ന നടനാണ് കുഞ്ചാക്കോ ബോബൻ. 1997-ൽ പുറത്തിറങ്ങിയ അനിയത്തിപ്രാവ് എന്ന ചിത്രത്തിലൂടെ അന്നത്തെ യുവത്വത്തിന്റെ ഹരമായി മാറിയ റൊമാന്റിക് ഹീറോ. രമേശ് പിഷാരടി സംവിധാനം ചെയ്യുന്ന പഞ്ചവര്‍ണതത്തയാണ് ചാക്കോച്ചന്‍റെ ഏറ്റവും പുതിയ ചിത്രം. കുട്ടനാടന്‍ മാര്‍പ്പാപ്പ എന്ന ചിത്രം മാര്‍ച്ചില്‍ പ്രദർശനത്തിനെത്തുകയാണ്. ഇതിനിടെ ഭാര്യ പ്രിയയ്‌ക്കൊപ്പം നിൽക്കുന്ന ഒരു ചിത്രം താരം തന്റെ ഫേസ്ബുക്ക് പേജിൽ പങ്കുവച്ചിരുന്നു. ഈ ചിത്രം ഇപ്പോൾ സോഷ്യൽ മീഡിയയിൽ ഏറെ ചർച്ചാവിഷയമായിരിക്കുകയാണ്.

വെള്ള നിറത്തിലുള്ള ഷർട്ടും കാക്കി പാന്റും ധരിച്ച ഈ ചിത്രം കണ്ടിട്ട് ഇതേതാ ഈ ചെറുപ്പക്കാരൻ എന്നാണ് സോഷ്യൽ മീഡിയ ചോദിക്കുന്നത്. ചാക്കോച്ചന്റെ പ്രായം വീണ്ടും കുറഞ്ഞല്ലോ, കണ്ടതിൽ ഏറ്റവും മികച്ച ചിത്രം, ഇങ്ങനെ ചെറുപ്പക്കാരനാകല്ലേ ചാക്കോച്ചാ..കണ്ടിട്ട് സഹിക്കുന്നില്ല, എന്നൊക്കെയാണ് ചിത്രം കണ്ട് ആരാധകർ പറയുന്നത്. ഏതെങ്കിലും ചിത്രത്തിന് വേണ്ടിയാണോ എന്ന് വ്യക്തമല്ലെങ്കിലും ഭാരം കുറച്ച് പുതിയ രൂപത്തിൽ എത്തിയിരിക്കുന്ന ചാക്കോച്ചന്റെ മേക്കോവർ കണ്ട് ആരാധകർ ഞെട്ടിയിരിക്കുകയാണ്.