അന്തരിച്ച ബോളിവുഡ് നടി തന്റെ അഭിനയ ജീവിതത്തിൽ മാത്രമല്ല തിളങ്ങിയിരുന്നത്. ആരെയും ആകർഷിക്കുന്ന തരത്തിലുള്ള വ്യക്തിത്വമായിരുന്നു അവരുടേത്. ഇന്ത്യൻ സിനിമയിൽ ലേഡി സൂപ്പർ സ്റ്റാറായി ശോഭിച്ചിരുന്ന സമയത്തും അതിന്റെ യാതൊരു അഹങ്കാരവും അവർ കാണിച്ചില്ല. എല്ലാവരോടും വളരെ സൗമ്യമായേ പെരുമാറിയിരുന്നുള്ളൂ. അതുകൊണ്ടുതന്നെ സിനിമാതാരങ്ങൾക്ക് ശ്രീദേവിയുടെ മരണം താങ്ങാവുന്നതിനപ്പുറമായിരുന്നു.

സിനിമാരംഗത്തുനിന്നും നിരവധിപ്പേരാണ് ശ്രീദേവിക്ക് അനുശോചനമറിയിച്ചും അവരുമായുള്ള ഓർമ്മകൾ പങ്കുവച്ചും രംഗത്തെത്തിയത്. ഇപ്പോഴിതാ രജനി കാന്തിനു വേണ്ടി ശ്രീദേവി നോമ്പെടുത്ത വാർത്തയാണ് സമൂഹമാധ്യമങ്ങളിൽ തരംഗമായിക്കൊണ്ടിരിക്കുന്നത്. റാണ എന്ന ചിത്രത്തിന്റെ ഷൂട്ടിംഗിനിടെ നടന്ന ഒരു സംഭവമാണ് ഇപ്പോള്‍ ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്. ചിത്രീകരണത്തിനിടെ ഗുരുതരമായ അസുഖം കാരണം ചികിത്സയിലായിരുന്ന രജനികാന്തിനെ അസുഖത്തെ തുടര്‍ന്ന് അവിടുത്തെ ഒരു സ്വകാര്യ ആശുപത്രിയില്‍ പ്രവേശിപ്പിച്ചിരുന്നു. അസുഖം കൂടിയതിനെ തുടര്‍ന്ന് സിംഗപൂരിലെ ആശുപത്രിയിലേക്ക് മാറ്റി. ഈ വിവരം അറിഞ്ഞ ശ്രീദേവി വളരെയധികം ദു:ഖിതയായി. തുടര്‍ന്ന് അസുഖം പെട്ടെന്ന് ഭേദമാകാന്‍ വേണ്ടി നോമ്പ് നോല്‍ക്കുകയായിരുന്നു. രജനികാന്ത് രോഗത്തില്‍ നിന്ന് മുക്തി നേടിയ ശേഷമാണ് ശ്രീദേവി നോമ്പ് നോറ്റ കാര്യം പുറത്തറിയുന്നത്. ശൃദ്ധി സായി ബാബയോട് പ്രാര്‍ത്ഥിച്ച ശ്രീദേവി രജനികാന്തിനായി ഒരാഴ്ച നോമ്പ് അനുഷ്ടിച്ചതായി ഡെക്കാന്‍ ക്രോണിക്കിളാണ് റിപ്പോര്‍ട്ട് ചെയ്യുന്നത്.