തൊണ്ടിമുതലും ദൃക്‌സാക്ഷിയുമെന്ന ചിത്രം ഫഹദിനും സുരാജിനും വലിയ ബ്രേക്ക് ആണ് നൽകിയത്. ആ സിനിമയുടെ ചിത്രീകരണത്തിനിടയിൽ ഫഹദ് കാരണം ഡ്യൂപ്പിനെ വയ്‌ക്കേണ്ടി വന്നില്ലെന്ന് സൂരാജ് വെഞ്ഞാറമൂട് പറയുന്നു .

‘തൊണ്ടി മുതലും ദൃക്‌സാക്ഷിയും എന്ന ചിത്രത്തിന്റെ സെറ്റില്‍ ക്ലൈമാക്‌സ് രംഗം ഷൂട്ട് ചെയ്യുന്ന സമയം. ഞാനും ഫഹദും ഉരുണ്ടു നേരെ വെള്ളത്തിലേക്ക് വീഴുന്ന രംഗം. സ്റ്റണ്ട് മാസ്റ്റര്‍ രണ്ടു പേരെ വെച്ച് ഫൈറ്റ് ചെയ്യിപ്പിച്ചോണ്ടിരിക്കുന്നു. ഇത് കണ്ട് ഞാന്‍ ഫഹദിനോട് ചോദിച്ചു. ഇതൊക്കെ നമ്മള്‍ ചെയ്യണ്ടി വരില്ലേ. എന്റെ കയ്യിന് അല്‍പ്പം പ്രശ്‌നമുണ്ട്. അപ്പോള്‍ ഫഹദ് പറഞ്ഞു ഏയ് ഇതൊന്നും നമ്മള്‍ ചെയ്യേണ്ടി വരില്ല. ഡ്യൂപ്പ് വെച്ച് ചെയ്യിപ്പിക്കും.

കുറച്ച് കഴിഞ്ഞ് ദിലീഷ് വന്ന് റെഡിയല്ലേയെന്ന് ചോദിച്ചു. അപ്പോള്‍ ഫഹദ് ദിലീഷിനോട് സുരാജേട്ടന് കയ്യിന് അല്‍പ്പം പ്രശ്‌നമുണ്ട്, അത് പ്രശ്‌നമല്ലേ, അപ്പോള്‍ ഡ്യൂപ്പ് വേണ്ടെ.. പക്ഷെ നമ്മള്‍ ഇതുവരെ ഡ്യൂപ്പിനെ വെച്ച് ചെയ്തിട്ടില്ലല്ലോ ഇതെല്ലാം ഒര്‍ജിനലല്ലേ അപ്പോള്‍ ഇതും നിങ്ങള്‍ അങ്ങനെ ചെയ്യ്, ഇത് കേട്ടതും ഫഹദ് ചാടി എണീറ്റ് ഒക്കെ ഞാന്‍ ചെയ്യാമെന്ന് പറഞ്ഞു. ഞാന്‍ ഞെട്ടിപ്പോയി കൂടെ നിന്നിട്ട് ഇവന്‍ എന്ന് തോന്നി…

പക്ഷെ അദ്ദേഹം ചാടി എണീറ്റപ്പോള്‍ എനിക്കും എണീക്കാനുള്ളൊരു പ്രചോദനം തോന്നി. സീന്‍ പൂര്‍ത്തിയാക്കിയപ്പോള്‍ പിന്നില്‍ നിന്ന് ദിലീഷ് രണ്ട് പ്രസാദ്മാരും തമ്മില്‍ എന്താ ഒരു കെമിസ്ട്രി. പക്ഷെ ദിലീഷിനറിയില്ലല്ലോ എന്റെ ബയോളജി മോശമാണെന്ന്, പോരാത്തതിന് അവിടത്തെ ജ്യോഗ്രഫിയില്‍ വളരെ പ്രശ്‌നമാണ്. എന്തെങ്കിലും പറ്റിയിരുന്നെങ്കില്‍ ഞാന്‍ ഹിസ്റ്ററിയിലേ കാണില്ലായിരുന്നു. എന്തായാലും സീന്‍ ഗംഭീരമായി വന്നു’. സുരാജ് പറഞ്ഞു.