സംവിധായകന്‍ ഐ.വി ശശി കളര്‍ഷര്‍ട്ടിടാത്തതിന് പിന്നില്‍ ഒരു കഥയുണ്ട്. ശശി മലബാര്‍ക്രിസ്ത്യന്‍ കോളജില്‍ പ്രീ യൂണിവേഴ്‌സിറ്റിക്ക് പഠിക്കുന്ന കാലത്ത്. അവിടെ വലിയൊരു സംഘര്‍ഷം നടന്നു. വിദ്യാര്‍ത്ഥികളെ ശാന്തരാക്കാന്‍ പ്രിന്‍സിപ്പല്‍ എത്തി. അതിനിടെ ആരോ അദ്ദേഹത്തിനു നേരെ ചീമുട്ടയെറിഞ്ഞു. ഏറ് വന്ന ഭാഗത്തേക്ക് പ്രിന്‍സിപ്പല്‍ നോക്കിയപ്പോള്‍ ചെക്ക് കളര്‍ ഷര്‍ട്ടിട്ട ഐ.വി ശശിയെയാണ് കണ്ടത്. മാതാപിതാക്കളെ വിളിച്ച് കൊണ്ടുവന്നിട്ട് ക്ലാസില്‍ കയറിയാല്‍ മതിയെന്ന് അദ്ദേഹം പറഞ്ഞു. എന്നാല്‍ മാതാപിതാക്കളെ വിളിച്ച് കൊണ്ടുവരില്ലെന്നും താനിനി കാമ്പസിലേക്ക് ഇല്ലെന്നും പറഞ്ഞ് ശശി അന്ന് കോളജിന്റെ പടിയിറങ്ങി.

അന്ന് വൈകുന്നേരം താമസിച്ചാണ് വീട്ടില്‍ ചെന്നത്. അമ്മ കാര്യം തിരക്കിയപ്പോള്‍ എന്തോ കള്ളം പറഞ്ഞു. വീടിനടുത്ത് പലചരക്ക് കട നടത്തുന്ന ഗോവിന്ദന്‍ ശശിക്ക് അത്യാവശ്യം പണം കടം കൊടുക്കുമായിരുന്നു. ഗോവിന്ദന്റെ കയ്യില്‍ നിന്ന് 50രൂപാ കടം വാങ്ങി കോഴിക്കോട്ട് നിന്ന് മദ്രാസിലേക്ക് ശശി പോയി. പണം ഉണ്ടായിരുന്നെങ്കിലും കള്ളവണ്ടിയാണ് കയറിയത്. ബന്ധുവും ആര്‍ട്ട് ഡയറക്ടറുമായ കൊന്നനാട്ട് മദ്രാസിലുണ്ട്. അദ്ദേഹത്തെ കണ്ട് എന്തെങ്കിലും പണി തരപ്പെടുത്തണം. ചിത്രം വരയ്ക്കുമായിരുന്ന ശശിയുടെ ആഗ്രഹം അതായിരുന്നു. മദ്രാസില്‍ എ.വി.എം സ്റ്റുഡിയോയില്‍ ചെന്നെങ്കിലും കാവല്‍ക്കാര്‍ കടത്തിവിട്ടില്ല.

പരിചയപ്പെട്ട ഒരു മലയാളി പറഞ്ഞു മലയാള പടങ്ങള്‍ അരുണാചലം സ്റ്റുഡിയോയിലാണ് ചിത്രീകരിക്കുന്നതെന്ന്. അവിടെ ചെന്നെങ്കിലും കടത്തിവിട്ടില്ല. കുറേ കഴിഞ്ഞ് ഒരാള്‍ വന്ന് ക്രൗഡ് സീനില്‍ അഭിനയിക്കാന്‍ വിളിച്ചു. എന്‍.ടി രാമറാവു ആയിരുന്നു ചിത്രത്തിലെ നായകന്‍. പ്രതിഫലമായി രണ്ട് രൂപ കിട്ടി. സ്റ്റുഡിയോയില്‍ വെച്ച് കണ്ട മലയാളിയോട് കൊന്നനാട്ടിനെ കുറിച്ച് ചോദിച്ചപ്പോള്‍ നുങ്കംപക്കത്താണ് താമസമെന്ന് പറഞ്ഞു. രണ്ടാഴ്ച കഴിഞ്ഞ് കൊന്നനാട്ടിന്റെ വീട് കണ്ടെത്തി. എന്നാല്‍ കോളജില്‍ നടന്ന സംഭവങ്ങള്‍ അറിഞ്ഞ കൊന്നനാട്ട് ഒരുപാട് വഴക്ക് പറഞ്ഞു. പിന്നീട് കൂടെ നിര്‍ത്തി. അന്ന് രാത്രി ബാഗിലുണ്ടയിരുന്ന കളര്‍ ഷര്‍ട്ടുകള്‍ വാരി ശശി കത്തിച്ചു. അതില്‍ പിന്നെ ക്രീം കളര്‍ ഷര്‍ട്ടുകള്‍ മാത്രമേ ധരിക്കൂ. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha