ബോളിവുഡ് ഗ്ലാമര്‍ ലോകത്ത് റാണിമാരാണ് സണ്ണി ലിയോണും രാഖി സാവന്തും. മൂന്ന് വര്‍ഷം മുന്‍പ് താന്‍ സണ്ണി ലിയോണിനോട് ചെയ്ത കുറ്റത്തിന് മാപ്പപേക്ഷയുമായി ബോളിവുഡ് നടി രാഖി സാവന്ത് രംഗത്തെത്തിയിരിക്കുകയാണ്. പോണ്‍ മേഖലയില്‍ നിന്ന് ബോളിവുഡിലെത്തിയ സണ്ണി ലിയോണ്‍ ഇവിടെ നിന്ന് പോകണമെന്നും, സണ്ണിക്കെതിരെ അസഭ്യം പറഞ്ഞും രാഖി വിവാദ പരാമര്‍ശങ്ങളില്‍ ഇടം നേടിയിരുന്നു.

കഷ്ടപ്പാടും വേദനകളും പോരാട്ടങ്ങളും നിറഞ്ഞ സണ്ണിയുടെ ജീവിതയാത്രയെ കുറിച്ച് ഒന്നും അറിയാതെ അവരെ വിലയിരുത്തിയത് തെറ്റായിപ്പോയി. കഥയറിയാതെ ഇവരെക്കുറിച്ച് ഒരു അഭിപ്രായപ്രകടനം നടത്തിയതില്‍ ഞാന്‍ ക്ഷമ ചോദിക്കുന്നു ഒരു ടിവി ഷോയ്ക്കിടെ രാഖി സാവന്ത് വ്യക്തമാക്കുന്നു. സണ്ണി ലിയോണിനെതിരെ അടുത്തിടയും രാഖി സാവന്ത് ആരോപണം ഉന്നയിച്ചിരുന്നു, പോണ്‍ സിനിമ മേഖലയിലേക്ക് തനിക്ക് ക്ഷണം ലഭിച്ചുവെന്നും ഇവര്‍ക്ക് നമ്പര്‍ നല്‍കിയത് സണ്ണി ലിയോണ്‍ ആണെന്നും രാഖി സാവന്ത് ആരോപിച്ചിരുന്നു.

സണ്ണിയുടെ വസ്ത്രധാരണവും ഗാനരംഗങ്ങളുമെല്ലാം ഇന്ത്യന്‍ സംസ്‌കാരത്തിന് ചേര്‍ന്നതല്ലന്നായിരുന്നു രാഖിയുടെ അന്നത്തെ വാദം. ഇത് ഇന്ത്യയിലെ പുരുഷന്‍മാരെ മാത്രമല്ല സ്ത്രീകളേയും വഴിതെറ്റിയ്ക്കുമെന്നായിരുന്നു താരത്തിന്റെ അന്നത്തെ ഭാഷ്യം. അതിനാല്‍ തന്നെ ഇന്ത്യയില്‍ ഇനിയും തുടര്‍ന്ന് അഭിനയിക്കണമെങ്കില്‍ ശരീരം മുഴുവന്‍ മറയ്ക്കുന്ന വസ്ത്രം ധരിക്കണമെന്നും രാഖി അന്ന് ആവശ്യപ്പെട്ടിരുന്നു.

സണ്ണി ലിയോണിന്റെ ഇന്ത്യന്‍ സിനിമയിലേയ്ക്കുള്ള കടന്നു വരവ് ഏറ്റവും കൂടുതല്‍ ബാധിച്ചത് രാഖി സാവന്തിനെയായിരുന്നു. ഇന്ത്യന്‍ ഗ്ലാമറസ് ലോകത്ത് തിളങ്ങി നിന്ന താരമായിരുന്നു രാഖി.

രാഖിയുടെ വസ്ത്രധാരണം പലപ്പോഴും വിവാദങ്ങള്‍ സൃഷ്ടിച്ചിരുന്നു. സണ്ണി ലിയോണ്‍ എത്തിയതോടെ രാഖിയ്ക്ക് വന്‍ തിരിച്ചടിയായിരുന്നു. കൂടാതെ താരത്തിന്റെ വളര്‍ച്ച അത്ഭുതപ്പെടുത്തും വിധത്തിലായിരുന്നു. ഇത് രാഖിയെ ചൊടിപ്പിച്ചിരുന്നു. സണ്ണിയെ വിമര്‍ശിക്കാന്‍ അവസരം കിട്ടുമ്പോഴൊക്കെ രാഖി അത് മാക്‌സിമം പ്രയോജനപ്പെടുത്തുകയും ചെയ്തിരുന്നു.