വിവാഹ ശേഷം നടി മീരാജാസ്മിന്‍ മടങ്ങിവരുന്നു. നവാഗതനായ പാര്‍ത്ഥി സംവിധാനം ചെയ്യുന്ന തമിഴ് സയന്‍സ് ഫിക്ഷനിലൂടെയാണ് രണ്ടാം വരവ്. സംവിധായകന്‍ തന്നെയാണ് നായക വേഷവും ചെയ്യുന്നത്. അമേരിക്കന്‍ ബഹിരാകാശ ഗവേഷണ ഏജന്‍സിയായ നാസയില്‍ സയന്റിസ്റ്റായിരുന്ന പാര്‍ത്ഥി തമിഴ്‌നാട് സ്വദേശിയാണ്. അടുത്തകാലത്ത് ചെന്നൈയിലെത്തിയ അദ്ദേഹം മീരയുമായി സംസാരിച്ചാണ് ചിത്രീകരണം ഉള്‍പ്പെടെയുള്ള കാര്യങ്ങള്‍ തീരുമാനിച്ചത്. 
വിവേക്, സഞ്ജന സിംഗ് എന്നിവരാണ് മറ്റ് താരങ്ങള്‍. തമിഴില്‍ സയന്‍സ് ഫിക്ഷന്‍ സിനിമകള്‍ ഇറങ്ങുന്നത് കുറവാണ്. എന്നാല്‍ ഹോളിവുഡ് ചിത്രങ്ങളുടെ ഡബ്ബ് ചെയ്ത് ഇറക്കിയത് കളക്ഷന്‍ നേടിയതോടെയാണ് ഇത്തരത്തില്‍ ഒരു ചിത്രം ഒരുക്കാന്‍ തീരുമാനിച്ചത്. ചൊവ്വാ ദൗത്യവും ചാന്ദ്രയാനും ഇന്ത്യന്‍ ശാസ്ത്ര ലോകത്ത് വലിയ കുതിപ്പുകള്‍ നടത്തുമ്പോള്‍ ഒരു ഗ്രാമത്തില്‍ ഉണ്ടാകുന്ന സംഭവങ്ങളുടെ പശ്ചാത്തലത്തിലാണ് സയന്‍സ് ഫിക്ഷന്‍ പാര്‍ത്ഥി ഒരുക്കുന്നത്. ആചാരങ്ങളും സംസ്‌കാരവും സയന്‍സുമായി ബന്ധപ്പെട്ട് കിടക്കുന്ന സംഭവങ്ങളും വിഷയമാകുന്നുണ്ട് ചിത്രത്തില്‍.
വി.കെ പ്രകാശിന്റെ മഴനീര്‍ത്തുള്ളികള്‍, മനോജ് ആലുങ്കലിന്റെ ഇതിനുമപ്പുറം തുടങ്ങിയ ചിത്രങ്ങളിലും മീര നായികയാകുന്നു. സോഫ്ട് വെയര്‍ എഞ്ചിനിയറെ വിവാഹം കഴിച്ച ശേഷം ദുബയിലായിരുന്ന മീര ബോറടിച്ച് തുടങ്ങിയതോടെയാണ് അഭിനയത്തിലേക്ക് മടങ്ങിവരാന്‍ തീരുമാനിച്ചത്. ഓടി നടന്ന് അഭിനയിക്കാന്‍ താരത്തിന് താല്‍പര്യമില്ല. കുടുംബജീവിതത്തിന് തടസം ആവാത്ത ചിത്രങ്ങള്‍ അഭിനയിക്കാനാണ് തീരുമാനം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha