തമിഴ്‌നാട്ടിലെ രാഷ്ട്രീയ അസ്ഥിരക്കെതിരെ നടന്‍ കമലാഹാസന്‍ പരസ്യമായി രംഗത്ത്. ഒ. പനീര്‍ സെല്‍വം ഗ്രൂപ്പും എടപ്പാടി പളനിസ്വാമി ടീമും നടത്തുന്ന ചക്കളത്തിപ്പോര് തമിഴ്‌നാടിനെ അസ്ഥിരപ്പെടുത്തുമെന്ന് താരം പറഞ്ഞു. അണ്ണാ ഡി.എം.കെ ജനറല്‍ സെക്രട്ടറിയായ വി.കെ ശശികലയെ മുഖ്യമന്ത്രി പദത്തിലെത്തിക്കാനുള്ള നീക്കത്തിനെതിരെ കമലാഹാസന്‍ പരസ്യമായി രംഗത്തെത്തിയിരുന്നു. എന്ത് യോഗ്യതയാണ് ശശികലയ്ക്കുള്ളതെന്ന് കമലാഹാസന്‍ അന്ന് ആഞ്ഞടിച്ചു. സാധാരണ തമിഴ് രാഷ്ട്രീയത്തില്‍ നിന്ന് അകലം പാലിക്കുന്നയാളാണ് കമലാഹാസന്‍.

എന്നാല്‍ നിലവിലെ രാഷ്ട്രീയ സാഹചര്യം വല്ലാതെ മനംമടുപ്പിച്ചത് കൊണ്ടാണ് അദ്ദേഹം പ്രതികരിച്ചത്. അഴിമതിയും അധികാര ദുര്‍വിനിയോഗവും നടത്തുന്ന രാഷ്ട്രീയക്കാര്‍ക്ക് വോട്ട് ചെയ്ത് വര്‍ഷങ്ങളായി നമ്മള്‍ സ്വാതന്ത്ര്യം നഷ്ടപ്പെടുത്തുകയാണ്. ഇതിനെതിരെ എല്ലാ ആര്‍ട്ടിസ്റ്റുകളും രംഗത്തിറങ്ങണമെന്നും കമലാഹാസന്‍ ആവശ്യപ്പെട്ടു. കോണ്‍ഗ്രസ് നേതാവായ ഖുശ്ബുവിനും മൗനം പാലിക്കുകയാണ്. ഒരു പക്ഷെ, അണ്ണാ ഡി.എം.കെയുടെ ജയാ ടി.വിയില്‍ പരിപാടി അവതരിപ്പിക്കുന്നത് കൊണ്ടാകാം ഖുശ്ബു മൗനം പാലിക്കുന്നത്. താമസിക്കാതെ കൂടുതല്‍ താരങ്ങള്‍ ഭരണ അസ്ഥിരതയ്‌ക്കെതിരെ രംഗത്ത് വരുമെന്ന് കരുതുന്നു.