സ്പെയിനിൽ അതിവേഗ ട്രെയിനുകൾ കൂട്ടിയിടിച്ചുണ്ടായ അപകടത്തിൽ മരണസംഖ്യ 64 ആയി ഉയർന്നു. മരണസംഖ്യ ഉയർന്നേക്കുമെന്നാണ് സൂചനകൾ. ഈ വർഷം രാജ്യത്ത് നടന്ന രണ്ടാമത്തെയും ഈ നൂറ്റാണ്ടിലെ മൂന്നാമത്തെയും വലിയ ട്രെയിൻ അപകടമാണിത്. നിരവധി യാത്രക്കാർക്ക് ഗുരുതരമായി പരിക്കേറ്റിട്ടുണ്ട്. സ്ഥലത്ത് രക്ഷാപ്രവർത്തനം പുരോഗമിക്കുന്നു. പരിക്കേറ്റവരെ കൊണ്ടുപോകാൻ നിരവധി ആംബുലൻസുകളും എയർ ലിഫ്റ്റ് ചെയ്യാനായി ഹെലികോപ്റ്ററുകളും ഇവിടെ എത്തിച്ചിട്ടുണ്ട്. കൂട്ടിയിടിയിൽ മൂന്ന് ബോഗികൾ പൂർണമായും തകർന്നുവെന്നാണ് ലഭിക്കുന്ന സൂചന. അവശിഷ്ടങ്ങളിൽ പരിക്കേറ്റവർ കുടുങ്ങിക്കിടക്കാൻ സാധ്യതയുണ്ടെന്ന് കരുതുന്നു. മരിച്ചവരുടെ മൃതദേഹങ്ങൾ കൊണ്ടുപോകുന്നതിനും പ്രത്യേക സജ്ജീകരണങ്ങൾ ഒരുക്കി.

സ്വകാര്യ കൺസോർഷ്യമായ ഇറിയോ സർവീസ് ഓപ്പറേറ്റ് ചെയ്തിരുന്ന അതിവേഗ ട്രെയിൻ സിഗ്നൽ തകരാർ കാരണം നിർത്തിയിട്ടിരുന്നു. മറ്റൊരു കൺസോർഷ്യമായ റെൻഫെ സർവീസ് പ്രവർത്തിപ്പിക്കുന്ന അതിവേഗ ട്രെയിൻ ഇതേ പാതയിലെത്തി നിർത്തിയിട്ടിരുന്ന ട്രെയിനിലേക്ക് ഇടിച്ചുകയറിയെന്നാണ് സൂചനകൾ. തുടർന്ന് ട്രെയിനുകൾ പാളം തെറ്റി മറിഞ്ഞു. സിഗ്നൽ ലഭിച്ച ശേഷമാണ് ട്രെയിൻ മുന്നോട്ട് പോയതെന്നാണ് റെൻഫെ സർവീസിൻ്റെ ആദ്യ പ്രതികരണം. അപകടത്തിൽ നടുക്കം രേഖപ്പെടുത്തി സ്പാനിഷ് പ്രധാനമന്ത്രി.