വിജയ്‌യെ മുഖ്യമന്ത്രിയാക്കാതിരിക്കാന്‍ ജയലളിത
കമലാഹാസനു പിന്നാലെ വിജയ്‌ക്കെതിരെയും ജയലളിതയുടെ പോര്‌. 30 ശതമാനം നികുതി നല്‍കാതെ വിജയ്‌യുടെ പുതിയ ചിത്രമായ തലൈവ തമിഴ്‌നാട്ടില്‍ പ്രദര്‍ശിപ്പിക്കില്ലെന്ന വാശിയിലാണ്‌ ജയലളിത. ഉലകം ചുറ്റും വാലിബന്‍ എന്ന ചിത്രത്തിനു ശേഷം എം.ജി.ആര്‍ തമിഴ്‌നാട്‌ മുഖ്യമന്ത്രിയായതു പോലെ തലൈവ റിലീസായി കഴിയുമ്പോള്‍ വിജയ്‌യും മുഖ്യമന്ത്രി പദത്തിലെത്താന്‍ കരുത്തനാകുമെന്ന്‌ അദ്ദേഹത്തിന്റെ പിതാവും സംവിധായകനുമായ എസ്.എ. ചന്ദ്രശേഖര്‍ മാധ്യമങ്ങളോട് പറഞ്ഞതാണ്‌ തലൈവിയെ ചൊടിപ്പിച്ചത്‌. സാറ്റലൈറ്റ്‌ അവകാശം സണ്‍ ടി.വിക്ക്‌ കൊടുത്തില്ലെന്ന്‌ പറഞ്ഞ്‌ കരുണാനിധി മുഖ്യമന്ത്രിയായിരുന്ന കാലത്ത്‌ കാവലന്റെ റിലീസിംഗ്‌ തടഞ്ഞിരുന്നു. അന്ന്‌ ജയലളിതയ്‌ക്കൊപ്പമാണ്‌ വിജയ്‌യും പിതാവും നിന്നത്‌. കഴിഞ്ഞ നിയമസഭാ തെരഞ്ഞെടുപ്പിലും ഇരുവരും തലൈവിക്കൊപ്പമായിരുന്നു.
ജയലളിതയെ നേരില്‍ക്കണ്ട്‌ കാര്യം പറഞ്ഞ്‌ അനുമതി നേടാന്‍ വിജയ്‌ ശ്രമിച്ചെങ്കിലും കാണാന്‍ അവര്‍ കൂട്ടാക്കിയില്ല. മുഖ്യമന്ത്രിയെ കാണാന്‍ ചീഫ്‌ സെക്രട്ടറിക്ക്‌ അപേക്ഷ നല്‍കണം. അതു കഴിഞ്ഞ്‌ ഒരു മാസം കഴിഞ്ഞ്‌ കാണാമെന്നാണ്‌ അധികൃതര്‍ അറിയിച്ചത്‌.
30 ശതമാനം നികുതി നല്‍കിയാല്‍ വന്‍ സാമ്പത്തിക ബാധ്യതയുണ്ടാകുമെന്നാണ്‌ വിജയ്‌ പറയുന്നത്‌. വിജയ്‌യുടെ രാഷ്ട്രീയ പ്രവേശനം ഇഷ്ടമല്ലാത്തതിനാല്‍ ഡി.എം.കെ.യോ, പ്രതിപക്ഷനേതാവ്‌ വിജയ്‌കാന്തോ ഇതിനെക്കുറിച്ച്‌ പ്രതികരിച്ചിട്ടില്ല. അതേസമയം കേരളത്തില്‍ ചിത്രം നിറഞ്ഞ സദസില്‍ പ്രദര്‍ശിപ്പിക്കുകയാണ്‌. കന്യാകുമാരിയിലുള്ളവരും കോയമ്പത്തൂരുള്ളവരും തിരുവനന്തപുരത്തും പാലക്കാട്ടും എത്തിയാണ്‌ സിനിമ കാണുന്നത്‌.
വിശ്വരൂപം റിലീസായ സമയത്ത്‌ കമലാഹാസന്‌ ദേശീയ പിന്തുണ ലഭിച്ചിരുന്നു. എന്നാല്‍ വിജയ്‌ക്ക്‌ പിന്തുണയായി തമിഴ്‌നാട്ടിലെ ചില മാധ്യമങ്ങള്‍ മാത്രമാണ്‌ രംഗത്തുള്ളത്‌. നിയമസഭാ തെരഞ്ഞെടുപ്പില്‍ ജയലളിതയ്‌ക്കെതിരെ പ്രസംഗിച്ച വടിവേലുവിന്‌ ജയലളിത അപ്രഖ്യാപിത വിലക്ക്‌ ഏര്‍പ്പെടുത്തിയിരിക്കുകയാണ്‌. പലരും അദ്ദേഹത്തെ അഭിനയിക്കാന്‍ വിളിക്കുന്നില്ല.
https://www.facebook.com/Malayalivartha
