വീണ്ടും സമരത്തിന്‌ സി.പി.എം.
ദിവസങ്ങള്‍ക്കകം കേരളം വീണ്ടും സമരവേദിയാകും. സോളാര്‍ വിഷയത്തില്‍ സര്‍ക്കാര്‍ പ്രഖ്യാപിച്ച ജുഡീഷ്യല്‍ അന്വേഷണ പരിധിയില്‍ മുഖ്യമന്ത്രിയേയും അദ്ദേഹത്തിന്റെ ഓഫീസിനെയും ഉള്‍പ്പെടുത്താനാവില്ലെന്ന നിലപാടാണ്‌ ഇടതുമുന്നണിയെ വീണ്ടും സമരവഴിയിലെത്തിച്ചിരിക്കുന്നത്‌. സമരത്തിന്റെ പേരു പറഞ്ഞ്‌ വിരട്ടേണ്ടെന്ന്‌ തന്നെയാണ്‌ സര്‍ക്കാര്‍ നിലപാട്‌. പൊളിഞ്ഞ സമരത്തെ പുനരുജ്ജീവിപ്പിക്കാന്‍ കഴിയുമോ എന്ന സംശയം ഇടതുമുന്നണിക്കുമുണ്ട്‌. ഏതായാലും ഇനിയുമൊരു സമരപ്രഹസനത്തിന്‌ തങ്ങളെ കിട്ടില്ലെന്നാണ്‌ അണികളുടെ നിലപാട്‌.
മുഖ്യമന്ത്രിയെ ഉള്‍പ്പെടുത്താതെയുളള അന്വേഷണം സ്വീകാര്യമല്ലെന്ന്‌ പ്രതിപക്ഷനേതാവ്‌ വി. എസ്. അച്യുതാനന്ദന്‍ പ്രഖ്യാപിച്ചു കഴിഞ്ഞു. മുഖ്യമന്ത്രിയെ അന്വേഷണപരിധിയില്‍ ഉള്‍പ്പെടുത്താമെന്ന്‌ താന്‍ എം. വി . ഗോവിന്ദന്‌ ഉറപ്പു നല്‍കിയതായുള്ള വാര്‍ത്ത ആഭ്യന്തരമന്ത്രിയും തള്ളി. സമരം നിര്‍ത്താന്‍ നടന്ന ചര്‍ച്ചയില്‍ തിരുവഞ്ചൂര്‍, പിണറായിയ്‌ക്ക്‌ ഉറപ്പു നല്‍കിയെന്നാണ്‌ ഗോവിന്ദന്‍മാസ്റ്റര്‍ പറഞ്ഞത്‌. എന്നാല്‍ ഇരു നേതാക്കളും ഗോവിന്ദന്‍മാസ്റ്ററുടെ വാദം തള്ളി. അണികളെ വിശ്വാസത്തിലെടുക്കാതെ സമരം നിര്‍ത്തിയത്‌ സി.പി.എമ്മിലും ഭിന്നസ്വരത്തിന്‌ ഇടയാക്കിയിട്ടുണ്ട്‌.
ജുഡീഷ്യല്‍ അന്വേഷണം തനിക്ക്‌ പുത്തരിയല്ലെന്ന ധീരമായ നിലപാടുമായി മുഖ്യമന്ത്രിയും രംഗത്തെത്തി കഴിഞ്ഞു. 1982-ല്‍ വനംമന്ത്രിയായിരിക്കെ നടന്ന കക്കി തടി ഇടപാട്‌ ജുഡീഷ്യല്‍ അന്വേഷണത്തിന്‌ കാരണമായിരുന്നു. എന്നാല്‍ ആക്ഷേപം ഉന്നയിച്ച നായനാരോ എം.വി രാഘവനോ തനിക്കെതിരെ ജുഡീഷ്യല്‍ കമ്മീഷന്‌ മുമ്പില്‍ മൊഴികൊടുത്തില്ലെന്നും മുഖ്യമന്ത്രി പരിഹസിച്ചു.
സോളാര്‍ അന്വേഷണത്തില്‍ തന്നെ ഉള്‍പ്പെടുത്തണമെന്ന ആവശ്യം നിസ്സാരവത്‌ക്കരിക്കുകയാണ്‌ മുഖ്യമന്ത്രി ഇതിലൂടെ ചെയ്‌തത്‌. സമരം നിര്‍ത്താന്‍ ഒത്തുകളിച്ചെന്ന ആരോപണം നേരിടുന്ന പിണറായിക്ക്‌ ഇനിയുമൊരു സമരത്തിന്‌ ബാല്യമില്ലെന്ന്‌ ഉമ്മന്‍ചാണ്ടിക്കറിയാം. ഇനി സോളാറില്‍ അന്വേഷണം നടന്നാല്‍ തന്നെ തനിക്കൊന്നും സംഭവിക്കില്ലെന്നും മുഖ്യമന്ത്രിക്കറിയാം.
മുഖ്യമന്ത്രിയെ പൊതുപരിപാടിയില്‍ പങ്കെടുക്കാന്‍ അനുവദിക്കില്ലെന്ന്‌ പിണറായി വിജയന്‍ പത്രസമ്മേളനം നടത്തി പറഞ്ഞത്‌ ആഗസ്റ്റ്‌ 14 നാണ്‌. സമരം പിന്‍വലിച്ചതിന്റെ പിറ്റേന്നായിരുന്നു ഇത്‌. ആഗസ്റ്റ്‌ 15 ന്‌ തിരുവനന്തപുരത്ത്‌ നടന്ന സ്വാതന്ത്ര്യദിന പരേഡ്‌ മുതല്‍ നിരവധി പൊതു പരിപാടിയില്‍ മുഖ്യമന്ത്രി പങ്കെടുത്തു. ആരും ഇതുവരെ അദ്ദേഹത്തെ കരിങ്കൊടി കാണിച്ചില്ല. കരിങ്കൊടി കാണിക്കുമോ എന്ന ഭയം കാരണം പോലീസ്‌ മുഖ്യമന്ത്രിക്ക്‌ ഒരുക്കുന്ന അതീവസുരക്ഷയില്‍ ജനം വലയുന്നതു മാത്രം മിച്ചം. കരിങ്കൊടി കാണിക്കാനും അടികൊള്ളാനും തങ്ങളില്ലെന്നാണ്‌ സി.പി.എം. അണികള്‍ പറയുന്നത്‌.
എന്തായാലും ലക്ഷങ്ങള്‍ മുടക്കി ഒരു സമരം നടത്തിയില്ലെങ്കില്‍ വോട്ടര്‍മാര്‍ക്ക്‌ മുമ്പില്‍ തങ്ങള്‍ ഒറ്റപ്പെടുമെന്നാണ്‌ സി.പി.എം കരുതുന്നത്‌.
https://www.facebook.com/Malayalivartha
