സോളാര്‍ വീണ്ടും കത്തുന്നു. പ്രതിപക്ഷവും മാധ്യമങ്ങളും നേരത്തെ ഉന്നയിച്ച ആരോപണങ്ങളുടെ തെളിവുകള്‍ ഇന്നലെ പുറത്തു വന്നതോടെ പ്രതികരിക്കാതെ മുഖ്യമന്ത്രി ഉമ്മന്‍ചാണ്ടി ഒഴിഞ്ഞുമാറി.  ബാങ്ക് അക്കൗണ്ടില്‍ ഒന്നരലക്ഷം രൂപാ മാത്രമുള്ള സരിതാ എസ്.നായര്‍ തനിക്കെതിരെ പരാതി നല്‍കിയവര്‍ക്ക് നല്‍കാനുള്ള ലക്ഷങ്ങള്‍ തിരികെ നല്‍കി. ഇതിനുള്ള പണം എവിടെ നിന്നാണെന്ന് പൊലീസ് ഇതുവരെ അന്വേഷിച്ചിട്ടില്ല.  തട്ടിപ്പലൂടെ ഏഴ് കോടിയോളം നേടിയെന്നാണ് മുഖ്യമന്ത്രി പറയുന്നത്. എന്നാല്‍ ഈ പണം എവിടെയാണെന്ന് ഇതുവരെ അന്വേഷണം നടത്തിയിട്ടില്ല.

മൊഴി മാറ്റാന്‍ ഉന്നതര്‍ നല്‍കിയ കോടിക്കണക്കിന് രൂപാ ഉപയോഗിച്ചാണ് സരിത കേസുകള്‍ ഒത്തുതീര്‍പ്പാക്കുന്നതെന്ന് ആക്ഷേപമുണ്ട്. ഇത്തരത്തില്‍ കേസുകള്‍ തീര്‍പ്പാക്കി രക്ഷപെടാനാണ് സരിതയുടെ നീക്കമെന്നറിയുന്നു. ഇതിന്റെ ഭാഗമായി ബിജു രാധാകൃഷ്ണനും ശാലുമേനോനും എതിരെയുള്ള കേസുകള്‍ ഊര്‍ജിതപ്പെടുത്താനും സര്‍ക്കാര്‍ തീരുമാനിച്ചതായി അറിയുന്നു. ശാലുമേനോന് ജാമ്യം നല്‍കരുതെന്ന് കോടതിയെ സര്‍ക്കാര്‍ അറിയിച്ചത് ഇതിന്റെ ഭാഗമായാണെന്ന് വിലയിരുത്തുന്നു.

അതേസമയം സരിതയുടെ അമ്മ ഇന്ദിരയ്‌ക്കൊപ്പം ജയിലിലെത്തിയ ആദര്‍ശ് എന്ന യുവാവിനെ കുറിച്ച് ഒന്നും അറിയില്ലെന്നാണ് അട്ടക്കുളങ്ങര ജയില്‍ അധികൃതര്‍ പറയുന്നത്.  ജയിലില്‍ സന്ദര്‍ശകരുടെ തിരിച്ചറിയല്‍ കാര്‍ഡും മറ്റു രേഖകളും പരിശോധിച്ച ശേഷം ഇവ സൂക്ഷിക്കണമെന്നാണ് നിയമം. സഹോദരന്‍ എന്ന പേരില്‍ എത്തിയത് മൊഴി അട്ടിമറിക്കാന്‍ ഇടനില നിന്നയാളാണെന്ന് ആക്ഷേപമുണ്ട്. ഇയാള്‍ വഴിയാണ് പണവും മറ്റും സരിതയുടെ അമ്മയ്ക്ക് കൈമാറിയതെന്നും അറിയുന്നു.