സരിതയുടെ അമ്മ പെട്ടെന്ന്‌ ലക്ഷാധിപതിയായെന്ന്‌ വേലക്കാരി
സരിതാ എസ്.നായരുടെ അമ്മ ഇന്ദിര കഴിഞ്ഞ മൂന്നാഴ്‌ചയ്‌ക്കുള്ളില്‍ ലക്ഷാധിപതിയായി. സരിതയുടെ വീട്ടില്‍ ജോലിക്കു നിന്നിരുന്ന സ്‌ത്രീയെ പൊലീസ് ചോദ്യം ചെയ്‌തപ്പോഴാണ്‌ ഇക്കാര്യം വ്യക്തമാക്കിയതെന്നറിയുന്നു. എന്നാല്‍ പൊലീസ് ഇക്കാര്യം മറച്ചുവച്ചിരിക്കുകയാണ്‌. സരിത മൊഴിമാറ്റി ഏതാനും ദിവസങ്ങള്‍ക്കുള്ളിലാണ്‌ ഇന്ദിരയുടെ കയ്യില്‍ ആവശ്യത്തിലേറെ പണം കണ്ടു തുടങ്ങിയത്‌.
സരിത അറസ്റ്റിലായ ശേഷം വാടക വീടൊഴിയാന്‍ ഉടമ ആവശ്യപ്പെട്ടു. തുടര്‍ന്നാണ്‌ വേലക്കാരിയെ പറഞ്ഞയച്ചത്‌. ആ സമയത്ത്‌ അവരുടെ ഒരു മാസത്തെ ശമ്പളം പോയിട്ട്‌ യാത്രാക്കൂലി പോലും നല്‍കിയിരുന്നില്ല. എന്നാല്‍ അടുത്തിടെ ഇവരുടെ പുതിയ വീട്‌ സന്ദര്‍ശിച്ചപ്പോള്‍ ഇന്ദിരയുടെ കൈവശം ആവശ്യത്തിലേറെ പണം ഉണ്ടായതായി വേലക്കാരിക്ക്‌ ബോധ്യമായി. തനിക്ക്‌ തരാനുള്ള കൂലി അവര്‍ തന്നെന്നും വേലക്കാരി മൊഴി നല്‍കി. എന്നാല്‍ ഇക്കാര്യങ്ങള്‍ ഔദ്യോഗികമായി രേഖപ്പെടുത്തിയിട്ടില്ല.
മൊഴി മാറ്റിയ ശേഷം സംസ്ഥാനത്തെ ഒരു പ്രമുഖ സ്വകാര്യ ബാങ്കില്‍ സരിതയുടെയും അമ്മയുടെയും പേരില്‍ അഞ്ച്‌ കോടിയോളം രൂപ രണ്ട്‌ ഉന്നതര്‍ നിക്ഷേപിച്ചതായി നേരത്തെ വാര്‍ത്തകളുണ്ടായിരുന്നു. അത് ശരിവയ്‌ക്കുന്നതാണ്‌ വേലക്കാരിയുടെ വെളിപ്പെടുത്തല്‍. സരിത തട്ടിപ്പിലൂടെ നേടിയ പണത്തിന്റെ ഒരു വിഹിതം ഡ്രൈവര്‍ കൈക്കലാക്കിയതായി നേരത്തെ ആരോപണം ഉണ്ടായിരുന്നു. പന്തളം സ്വദേശിയായ ഇയാള്‍ വളരെ ചുരുങ്ങിയ കാലം കൊണ്ട്‌ ധനവാനായതായി നാട്ടുകാരും പറഞ്ഞിരുന്നു. എന്നാല്‍ ഇയാളെ അറസ്റ്റ്‌ ചെയ്യാനോ, പണത്തിന്റെ ഉറവിടത്തെ കുറിച്ച്‌ അന്വേഷിക്കാനോ പൊലീസ് തയ്യാറായിട്ടില്ല.
https://www.facebook.com/Malayalivartha
