സോളാര് കേസില് കുറ്റപത്രം വൈകിപ്പിക്കുന്നത് മുഖ്യമന്ത്രിയെ രക്ഷിക്കാന് ?
മുഖ്യമന്ത്രി ഉമ്മന് ചാണ്ടിയെ രക്ഷിക്കാന് പൊലീസ് സോളാര്കേസിലെ കുറ്റപത്രം വൈകിപ്പിക്കുന്നതായി ആരോപണം. നിയമവിദഗ്ധരും ഇക്കാര്യം ചൂണ്ടിക്കാട്ടി. കുറ്റപത്രം പുറത്തുവന്നാല് മുഖ്യമന്ത്രിയുടെ പങ്ക് വെളിപ്പടും. മാത്രമല്ല, അദ്ദേഹത്തിന്റെ ഓഫീസിലെത്തി തെളിവെടുപ്പ് നടത്തേണ്ടിവരും. ഇത് ഒഴിവാക്കാനാണ് നീക്കം നടക്കുന്നത്. സരിതയുടെയും ബിജു രാധാകൃഷ്ണന്റെയും ഉടമസ്ഥതയിലുള്ള ടീം സോളാര് കമ്പനിക്കെതിരെ ഇതുവരെ കേസ് എടുത്തിട്ടില്ല. അതിനാല് കേവലം വഞ്ചനാ കുറ്റമായി കേസ് ഒതുങ്ങും. കമ്പനിക്കെതിരെ കേസ് എടുത്താലേ ക്രിമിനല് ഗൂഢാലോചന പുറത്തുവരൂ.
പ്രതികളെ സഹായിക്കുന്ന തരത്തിലാണ് പ്രത്യേക അന്വേഷകസംഘം പ്രവര്ത്തിക്കുന്നത്. കഴിഞ്ഞ ദിവസം സര്ക്കാര് കോടതിയില് സ്വീകരിച്ച നടപടി ഇതിന് തെളിവാണ്. ജോപ്പന്റെ പേരിലുള്ള കേസില് മുഖ്യമന്ത്രിയെ ചോദ്യം ചെയ്താല് മാത്രമേ കുറ്റപത്രം സമര്പ്പിക്കാനാവൂ. അതോടൊപ്പം ശ്രീധരന്നായരുടെ 164 വകുപ്പുപ്രകാരമുള്ള മൊഴിയും ചേര്ക്കണം ഇതോടെ മുഖ്യമന്ത്രിയുടെ പങ്ക് പുറത്താവും. അതുചെയ്യാതെ കുറ്റപത്രസമര്പ്പണം മനഃപൂര്വം വൈകിപ്പിക്കുകയാണ്. ഇതോടെ പ്രതികള്ക്ക് ജാമ്യം ലഭിക്കുകയും ചെയ്തു.
മുഴുവന് കേസുകളിലും കുറ്റപത്രം നല്കുമെന്നാണ് മുഖ്യമന്ത്രി പറഞ്ഞിരുന്നത്. എന്നാല് 33 കേസില് നാലില് മാത്രമാണ് കുറ്റപത്രം നല്കിയത്. ബാക്കിയുള്ള കേസുകളില് പ്രതികള്ക്ക് ജാമ്യത്തിലിറങ്ങാനുള്ള സൗകര്യമാണ് സര്ക്കാര് ഒരുക്കിക്കൊടുത്തത്. പൊലീസ് രജിസ്റ്റര്ചെയ്ത കേസില് പ്രതികള്ക്കുവേണ്ടി കോടതിയില് അഡ്വക്കറ്റ് ജനറല്തന്നെ ഹാജരായി ജാമ്യം നല്കാം എന്നുപറഞ്ഞത് ഇതിനു തെളിവാണെന്ന് നിയമവിദഗ്ധര് ചൂണ്ടിക്കാട്ടുന്നു. കേരളചരിത്രത്തിലേ നീതിന്യായ ചരിത്രത്തിലോ ഇല്ലാത്ത നടപടിയാണിത്. കേസ് അട്ടിമറിക്കാന് സര്ക്കാര് തന്നെ മുന്കൈയെടുക്കുന്നു. ഈ പശ്ചാത്തലത്തില് മുഖ്യമന്ത്രിയുടെ ഓഫീസിനെയും മുഖ്യമന്ത്രിയെയും അന്വേഷണപരിധിയില്പ്പെടുത്താത്ത ജുഡീഷ്യല് അന്വേഷണവുമായി സഹകരിക്കില്ലെന്ന നിലപാടിലാണ് പ്രതിപക്ഷം.
https://www.facebook.com/Malayalivartha
