മദ്യത്തിനും ക്ഷാമം വരുന്നു
കേരളത്തില് കുടിയന്മാരെ ബുദ്ധിമുട്ടിലാക്കി ഡിസ്റ്റിലറി ലോറി പണിമുടക്ക് ബുധനാഴ്ച തുടങ്ങും. അനിശ്ചിതകാല പണിമുടക്കാണ് പ്രഖ്യാപിച്ചിരിക്കുന്നത്. പാലക്കാട് ജില്ലയിലെ ലോറി ഉടമകളാണ് സമരം പ്രഖ്യാപിച്ചിരിക്കുന്നതെങ്കിലും സംസ്ഥാനത്തെ ലോറി ഉടമകള് പങ്കെടുക്കും. 18 ഡിസ്റ്റിലറികളില് ആറെണ്ണവും പാലക്കാടായതിനാല് കേരളമെങ്ങും മദ്യം മുടങ്ങാന് ഇടയുണ്ട്. പാലക്കാട് ജില്ലയില് നിന്നും ദിവസേന 80 മുതല് 90 ലോഡ് വരെ മദ്യം കമ്പനികളില് നിന്നും കയറ്റി അയയ്ക്കുന്നുണ്ട്. സംസ്ഥാനത്തെ 13 ജില്ലകളിലുള്ള 22 ബീവറേജ് കോര്പ്പറേഷന് ഡിപ്പോകളിലേക്ക് മദ്യം കൊണ്ടുപോകുന്ന ലോറികളാണ് സമരം പ്രഖ്യാപിച്ച് കുടിയന്മാരെ വിഷമത്തിലാക്കിയിരിക്കുന്നു.
ലോറി വാടകയും കാത്തു കിടക്കുന്ന സമയത്തിനുള്ള വാടകയും വര്ദ്ധിപ്പിക്കാത്തതാണ് സമരകാരണം. 2012 ഒക്ടോബറിനു ശേഷം ഡീസലിന് 5 രൂപയുടെ വര്ദ്ധനവുണ്ടായിട്ടും ലോറി വാടക വര്ദ്ധിച്ചില്ലെന്നാണ് പരാതി. സമരം പ്രഖ്യാപിച്ച് നോട്ടീസ് നല്കിയിട്ട് മാസങ്ങളായെങ്കിലും അത് ഗൗരവമായെടുത്തില്ലന്നും ലോറി ഉടമകള് പറയുന്നു. കഴിഞ്ഞദിവസം പേരിനൊരു ചര്ച്ച നടന്നെങ്കിലും തീരുമാനമുണ്ടായില്ല. കമ്പനിയിലേക്ക് കാലികുപ്പി കയറ്റിവരുന്നതും ലോറികള് ഒഴിവാക്കണമെന്ന് കോ-ഓര്ഡിനേഷന് കമ്മിറ്റി അറിയിച്ചു.
ഇതിനിടയില് കേരളത്തില് കുടിയന്മാരുടെ എണ്ണം കുറയുന്നത് സര്ക്കാരിന് ഭീഷണിയായി മാറി കഴിഞ്ഞു. ജൂണില് മദ്യവരുമാനത്തില് ഗണ്യമായ കുറവുണ്ടായി. എക്സൈസ് ഡ്യൂട്ടി ഇനത്തില് വന് തിരിച്ചടിയാണ് ഉണ്ടായിരിക്കുന്നത്.സര്ക്കാരിനെ സാമ്പത്തിക പത്മവ്യൂഹത്തിലാക്കിയതും കുടിയന്മാര് തന്നെയാണ്.
https://www.facebook.com/Malayalivartha