സരിത മിടുക്കി; നായരീഴവ ഐക്യവും തകര്ത്തു
രമേശ് ചെന്നിത്തലയില് തട്ടി നായര് ഈഴവ ഐക്യം തകരാന് സാധ്യത തെളിയുന്നു. കൊട്ടിഘോഷിച്ച് കൊണ്ടു വന്ന എന്.എസ്.എസ്, എസ്.എന്.ഡി.പി ഐക്യമാണ് ഇരു ജനറല് സെക്രട്ടറിമാരുടെയും രാഷ്ട്രീയ താല്പര്യങ്ങളില് തട്ടി ഉലയുന്നത്. ഉമ്മന്ചാണ്ടിയെ കുടുക്കിയ അതേ സോളാര് വിവാദമാണ് നായര്-ഈഴവ ഐക്യത്തേയും ഉലച്ചിരിക്കുന്നത്.
രമേശ് ചെന്നിത്തലയ്ക്കെതിരെ എന്.എസ്.എസ്. ജനറല് സെക്രട്ടറി ജി. സുകുമാരന് നായര് രംഗത്തു വന്നെങ്കിലും രമേശിനെ മാനസികമായി തള്ളാന് സുകുമാരന്നായര് തയ്യാറായിട്ടില്ല. ഉമ്മന്ചാണ്ടിക്ക് പകരം രമേശ് മുഖ്യമന്ത്രിയാകണമെന്ന നിലപാട് തന്നെയാണ് സുകുമാരന്നായര്ക്കുള്ളത്. തന്റെ ഇത്തരം നിലപാടുകള് രമേശിന് വിനയാകുമെന്ന് കണ്ടപ്പോഴാണ് ചെന്നിത്തലയ്ക്ക് നല്കിയിരുന്ന പരസ്യപിന്തുണ സുകുമാരന് നായര് പിന്വലിച്ചത്. രമേശ് ചെന്നിത്തലയ്ക്ക് രണ്ടരവര്ഷം മുഖ്യമന്ത്രിസ്ഥാനം എന്ന ഫോര്മുല കേന്ദ്ര നേതൃത്വത്തിനു മുമ്പില് അവതരിപ്പിച്ച് കഴിഞ്ഞ നിയമസഭാ തെരഞ്ഞെടുപ്പ് കാലത്ത് സുകുമാരന് നായര് കോണ്ഗ്രസ്സില് നിന്നും അനുമതി തേടിയിരുന്നു.
ഉമ്മന്ചാണ്ടി മുഖ്യമന്ത്രിസ്ഥാനം ഒഴിയാനിടയില്ല എന്ന് മനസ്സിലാക്കിയപ്പോള് സുകുമാരന് നായര് അദ്ദേഹത്തിനെതിരെ രംഗത്തു വന്നു. ജോപ്പനെ അകത്താക്കിയ ശ്രീധരന് നായര് എന്.എസ്.എസിന്റെ കോന്നിയിലെ നേതാവാണ്. ഉമ്മന്ചാണ്ടി, കെ.എം.മാണി, പി. കെ. കുഞ്ഞാലിക്കുട്ടി തുടങ്ങിയ ന്യൂനപക്ഷക്കാര്ക്ക് മുകളില് രമേശ് ചെന്നിത്തല വന്ന് ഭരണം സെക്കുലര് ആകണമെന്ന് കഴിഞ്ഞ ദിവസം പി. സി. ജോര്ജ്ജും ആവശ്യപ്പെട്ടിരുന്നു. ഇത് എന്.എസ്.എസിന്റെ നിലപാടാണ്.
കെ. സി. വേണുഗോപാലിനെ കേന്ദ്ര മന്ത്രിയാക്കിയത് എന്.എസ്.എസാണ്. എന്നാല് സോളാര് വിവാദം ഉണ്ടായതോടെ വെള്ളാപ്പള്ളി വേണുഗോപാലിനും രമേശിനുമെതിരെ പരസ്യമായ നിലപാട് സ്വീകരിച്ചു. ഇത് സുകുമാരന് നായരെ ചൊടിപ്പിച്ചു. വേണുഗോപാലിനെ സോളാര് കേസില് പ്രതിയാക്കാന് നടേശന് ആവശ്യപ്പെട്ടതായി സരിതയുടെ അഭിഭാഷകന് ഫെനി ബാലകൃഷ്ണന് വെളിപ്പെടുത്തിയിരുന്നു.
രമേശിനും വേണുവിനുമെതിരെ നിലപാടെടുക്കരുതെന്ന് സുകുമാരന് നായര് വെള്ളാപ്പള്ളിയോട് അഭ്യര്ത്ഥിച്ചെങ്കിലും അദ്ദേഹം സമ്മതിച്ചില്ല.
എന്നാല് തമ്മില് അഭിപ്രായവ്യത്യാസമുണ്ടെന്ന വാര്ത്തകള് ഇരുനേതാക്കളും നിഷേധിച്ചു. തെറ്റിദ്ധാരണയുണ്ടെങ്കില് അക്കാര്യം തുറന്നുപറയാന് മടിക്കില്ലെന്നും സുകുമാരന് നായര് പറഞ്ഞു. ഐക്യത്തില് വിളളലില്ലെന്ന് വെള്ളാപ്പള്ളിയും പറഞ്ഞു.
ഏതായാലും രണ്ട് പ്രമുഖ സാമുദായിക സംഘടനകളെ രണ്ടാക്കാനും തനിക്ക് കഴിഞ്ഞെന്ന് അട്ടക്കുളങ്ങര ജയിലില് കഴിയുന്ന സരിതയ്ക്ക് ആശ്വസിക്കാം.
https://www.facebook.com/Malayalivartha
