കേന്ദ്രം കളിച്ചു; മാര്‍ട്ടിനും കെന്നഡിയും സ്വാഹ!
സാന്റിയാഗോ മാര്‍ട്ടിനും ജോണ്‍ കെന്നഡിക്കും വ്യാജ ലോട്ടറി കേസില്‍ നിന്നും തടിയൂരാന്‍ കേന്ദ്രമന്ത്രിസഭയുടെ പച്ചക്കൊടി. ഇവരെ കുറ്റവിമുക്തരാക്കികൊണ്ട്‌ സി.ബി.ഐ എറണാകുളം സി.ജെ.എം. കോടതിയില്‍ റിപ്പോര്‍ട്ട്‌ നല്‍കി. ലോട്ടറിയിലൂടെ സംസ്ഥാനത്തെ ജനങ്ങളെ കബളിപ്പിച്ചതിന്‌ തെളിവില്ലെന്നാണ്‌ സി.ബി.ഐയുടെ കണ്ടെത്തല്‍.
വ്യാജലോട്ടറികേസില്‍ ശക്തമായ നടപടികള്‍ സംസ്ഥാനം സ്വീകരിച്ചത്‌ കെ.എം.മാണി ധനമന്ത്രിയായ ശേഷമാണ്‌. തോമസ്‌ ഐസക്‌ ധനമന്ത്രിയായിരിക്കെ ലോട്ടറി രാജാക്കന്‍മാരെ വഴിവിട്ട്‌ സഹായിച്ചിരുന്നു. ലോട്ടറി മാഫിയ സി.പി.എം. സംസ്ഥാന കമ്മിറ്റിക്ക്‌ നല്‍കിയ സംഭാവനകളും വിവാദമായിരുന്നു. കഴിഞ്ഞ ഇടതുസര്‍ക്കാരിന്റെ കാലത്ത്‌ ജോസഫ്‌ എം.പുതുശ്ശേരി, വി.ഡി.സതീശന്‍ തുടങ്ങിയ നിയമസഭാംഗങ്ങള്‍ ലോട്ടറി മാഫിയക്കെതിരെ ശക്തമായി രംഗത്തു വന്നിരുന്നു. ഇതു കഴിഞ്ഞുവന്ന നിയമസഭാ തെരഞ്ഞെടുപ്പില്‍ പുതുശ്ശേരിക്ക്‌ സീറ്റ്‌ കിട്ടിയില്ല. സതീശന്‍ മന്ത്രിയാകുമെന്ന്‌ പ്രതീക്ഷിച്ചെങ്കിലും മന്ത്രിയായില്ല. സതീശന്റെ മന്ത്രിസ്ഥാനം തട്ടിയത്‌ ചിദംബരമാണെന്ന്‌ അഭ്യൂഹമുണ്ടായിരുന്നു. ചിദംബരത്തിന്റെ ഭാര്യ നളിനി ചിദംബരവുമാണ്‌ ലോട്ടറി മാഫിയക്ക്‌ വേണ്ടി കോടതിയില്‍ ഹാജരായത്‌.
ഒറ്റനമ്പര്‍ ലോട്ടറി നടത്തിയാണ്‌ മാര്‍ട്ടിനും കെന്നഡിയും പണമുണ്ടാക്കിയത്‌. എന്നാല്‍ ഇവ പോലീസ്‌ പിടിച്ചെടുത്തിട്ടില്ലെന്നാണ്‌ സി.ബി.ഐ പറയുന്നത്‌. അതുകൊണ്ടുതന്നെ ലോട്ടറി മാഫിയക്കെതിരെയുള്ള കേസുകള്‍ തള്ളണമെന്നാണ്‌ സി.ബി.ഐയുടെ വാദം. വ്യാജഭാഗ്യക്കുറിയിലൂടെ സംസ്ഥാന ഖജനാവിന്‌ നഷ്‌ടം വന്നില്ലെന്നും സി.ബി.ഐ പറയുന്നു. മുന്‍കൂര്‍ നികുതി അടച്ച ടിക്കറ്റുകളാണ്‌ പോലീസ്‌ പിടിച്ചെടുത്തതെന്നും സി.ബി.ഐ പറയുന്നു.
2010 ജനുവരി ഒന്നു മുതല്‍ 31 വരെ ജോണ്‍ കെന്നഡിയില്‍ നിന്നും മുന്‍കൂര്‍ നികുതി വാങ്ങിയതായി വാണിജ്യ നികുതി കമ്മീഷണര്‍ തങ്ങളെ അറിയിച്ചതായി സി.ബി.ഐ , കോടതിയില്‍ നല്‍കുന്ന റിപ്പോര്‍ട്ടില്‍ പറയുന്നു.
സാന്റിയാഗോ മാര്‍ട്ടിനും കെന്നഡിക്കും കേന്ദ്ര-സംസ്ഥാന സര്‍ക്കാരുകളില്‍ കാര്യമായ സ്വാധീനമുണ്ടെന്ന കാര്യം പരസ്യമായ രഹസ്യമാണ്‌. ആദര്‍ശധീരന്മാരെന്ന്‌ പേരു കേട്ട ഇടതുമുന്നണിക്കാരെ പോലും ലോട്ടറി മാഫിയ കുപ്പിയിലിറക്കിയിരുന്നു. ലോട്ടറി മാഫിയ തലവന്‍മാരുടെ അഭിഭാഷകരാണ്‌ ഇവര്‍ക്ക്‌ വേണ്ടി കരുക്കള്‍ നീക്കുന്നത്‌. ഒരിക്കല്‍ കോണ്‍ഗ്രസ്‌ വക്താവ്‌ പോലും മാഫിയക്ക്‌ വേണ്ടി കേരള ഹൈക്കോടതിയില്‍ ഹാജരായിരുന്നു.
ഇതിനിടയില്‍ ഭൂട്ടാന്‍, ഗോവ ലോട്ടറികള്‍ സംസ്ഥാനത്ത്‌ പുനരാരംഭിക്കാന്‍ ശ്രമങ്ങള്‍ ആരംഭിച്ചു കഴിഞ്ഞു. ഇത്‌ സംബന്ധിച്ചുള്ള ഇവരുടെ നിവേദനം കേരള സര്‍ക്കാരിന്റെ പരിഗണനയിലാണ്‌.
https://www.facebook.com/Malayalivartha
