ഇനിയൊരു ജന്മമുണ്ടെങ്കില് സരിതയായി ജനിക്കണേ...
ഇനിയൊരു ജന്മമുണ്ടെങ്കില് സരിതയായി ജനിക്കണമെന്നാണ് കേരളത്തിലെ ജയിലുകളിലുള്ള തടവുകാരുടെ ഇപ്പോഴത്തെ പ്രാര്ത്ഥന. ഇതിനായി ചിലര് ഗണപതിഭഗവാന് നാളീകേരവും നേര്ന്നു. പൂജപ്പുര സെന്ട്രല് ജയിലിലെ മഹാഗണപതി ക്ഷേത്രത്തില് ആഗ്രഹ പ്രാപ്തിക്കായി തടവുകാര് പ്രാര്ത്ഥനയും പൂജയുമായി തിരക്കു കൂട്ടുകയാണത്രേ.
സാധാരണ തടവുകാര്ക്ക് ഇപ്പോഴും ജയിലുകളില് നടയടി പതിവാണ്. എന്നാല് സരിതയെയും ബിജുവിനെയും പോലുള്ള വിഐപി തടവുകാര്ക്ക് നടയടിയില്ല. പകരം നട നമസ്ക്കാരം. അധികം വൈകാതെ സരിതയ്ക്കും ബിജുവിനും സല്യൂട്ട് അടിക്കേണ്ടി വരുമെന്നാണ് വാര്ഡന്മാര് അടക്കം പറയുന്നത്.
കാഞ്ഞങ്ങാട് കോടതിയിലെത്തിയ ബിജുവും സരിതയും താമസിച്ചത് ഹോസ്ദുര്ഗ് പൊതുമരാമത്ത് വകുപ്പിന്റെ ഗസ്റ്റ് ഹൗസിലെ എയര് കണ്ടീഷന്ഡ് മുറിയില്. സരിതയ്ക്കും ബിജുവിനും അവരുടെ ജീവിതനിലവാരം അനുസരിച്ച സൗകര്യങ്ങള് നല്കണമെന്ന് ജയില്മേധാവികള് നല്കിയ രഹസ്യ നിര്ദ്ദേശത്തിന്റെ അടിസ്ഥാനത്തിലായിരുന്നു അതിഥിമന്ദിര വാസം.
മന്ത്രിമാര് എത്തുമ്പോള് നല്കി വരാറുള്ള സ്യൂട്ടാണ് സരിതയുടെ താമസത്തിന് നല്കിയത്. സരിതയും ബിജുവും വരുന്നുണ്ടെന്ന വിവരം ഗസ്റ്റ്ഹൗസിലെ ജീവനക്കാരെ ഹോസ്ദുര്ഗ് സ്റ്റേഷനിലെ പോലീസുകാര് നേരത്തെ അറിയിച്ചിരുന്നു.
സരിതയ്ക്ക് കുളിക്കാന് ചൂടുവെള്ളം വേണമെന്നും അറിയിച്ചിരുന്നു. ഇതിനായി ഹീറ്ററുള്ള സ്യൂട്ടാണ് നല്കിയത്. സരിതയ്ക്കും ബിജുവിനും പ്രഭാതഭക്ഷണം നല്കിയതും ഹോസ്ദുര്ഗ് റസ്റ്റ് ഹൗസില് തന്നെ. പുട്ടും കടലയും പഴവുമായിരുന്നു പ്രഭാതഭക്ഷണം. ഏത്തക്കാബോളിയും തയ്യാറാക്കിയിരുന്നു.
കുളി കഴിഞ്ഞ് സരിതയുടെ മുടി ഉണങ്ങുന്നതു വരെ പോലീസ് വാഹനം കാത്തു കിടന്നു. ബിജുവും സരിതയും ഒരുറക്കം ഉറങ്ങുകയും ചെയ്തു. ഈ സമയമത്രയും എയര്കണ്ടീഷനറും പ്രവര്ത്തിച്ചിരുന്നു. ബിജുവിന് പുതിയ ബ്ലോക്കും സരിതയ്ക്ക് പഴയ ബ്ലോക്കുമാണ് നല്കിയത്. രണ്ട് വാഹനങ്ങളിലായി എത്തിയ തടവുകാര് പരസ്പരം കാണുകയും മന്ദഹസിക്കുകയും ചെയ്തു.
അധികം വൈകാതെ മറ്റേതെങ്കിലും സ്ഥലത്ത് സരിതയ്ക്കും ബിജുവിനും ഒരുമിച്ച് കഴിയാന് അവസരമൊരുക്കാന് ഇടയുണ്ടെന്നും ദോഷൈകദൃക്കുകള് വാദിക്കുന്നു. ഭരണ നേതൃത്വത്തിന് സരിതയിലും ബിജുവിലും വലിയ വിശ്വാസമാണ്. ഇരുവരും തങ്ങളുടെ പേരു പറഞ്ഞില്ലല്ലോ എന്നാണ് ഭരണാധികാരികളുടെ സമാധാനം.
കോടതി പര്യടനം അവസാനിച്ചാലുടന് സരിതയും ബിജുവും ജയില് മോചിതരാകും. ഇരുവര്ക്കും സ്വസ്ഥമായ ഒരു വിടുതല് സര്ക്കാര് വാഗ്ദാനം ചെയ്തിട്ടുണ്ട്. ഇവരിലുളള മാധ്യമ ശ്രദ്ധ അവസാനിച്ചു കിട്ടാനാണ് സര്ക്കാര് കാത്തിരിക്കുന്നത്.
https://www.facebook.com/Malayalivartha