ജോര്‍ജ്‌ അടങ്ങിയതോടെ മുരളി പൊങ്ങി
സര്‍ക്കാരിനും മുഖ്യമന്ത്രി ഉമ്മന്‍ചാണ്ടിക്കും എതിരെ നിരന്തരം ആരോപണങ്ങള്‍ ഉന്നയിച്ചിരുന്ന ചീഫ്‌ വിപ്പ്‌ പി.സി ജോര്‍ജിനെ എ ഗ്രൂപ്പ്‌ അനുനയിച്ചതോടെ ഐ ഗ്രൂപ്പ്‌ മുരളിയെ ഗോദയിലിറക്കി. പാര്‍ട്ടിയ്‌ക്കുള്ളില്‍ നിന്ന്‌ സര്‍ക്കാരിനും എ ഗ്രൂപ്പിനുമെതിരെ തുറന്ന യുദ്ധം നയിക്കാന്‍ രമേശ്‌ ചെന്നിത്തല തന്നെയാണ്‌ മുരളിയെ ഇറക്കിവിട്ടിരിക്കുന്നത്‌. കേരളത്തിലെ കാര്യങ്ങളില്‍ അന്തിമതീരുമാനം എടുക്കേണ്ട എ.കെ ആന്റണി ഇക്കാര്യത്തില്‍ ഇടപെടാതെ മൗനം തുടരുകയാണ്‌.
വലിയ വാഗ്‌ദാനങ്ങള്‍ നല്‍കിയാണ്‌ മുഖ്യമന്ത്രി ജോര്‍ജിനെ ഒതുക്കിയത്‌. അതോടെ സലിംരാജിന്റെ അറസ്‌റ്റും സരിതയെയും ബിജു രാധാകൃഷ്‌ണനെയും ഗസ്‌റ്റ്‌ഹൗസില്‍ താമസിപ്പിച്ച സംഭവവും വലിയ വിവാദമായില്ല. എല്‍.ഡി.എഫിനാകട്ടെ ഇതൊന്നും വിവാദമാക്കാന്‍ താല്‍പര്യവുമില്ല. സര്‍ക്കാരില്‍ ജനങ്ങള്‍ക്കുള്ള അവിശ്വാസം ലോക്‌സഭാ തെരഞ്ഞെടുപ്പ്‌ വരെ നീട്ടിക്കൊണ്ടു പോകാനാണ്‌ അവരുടെ തീരുമാനം. ടി.പി ചന്ദ്രശേഖരന്‍ വധത്തിലും ജയകൃഷ്‌ണന്‍ മാസ്റ്ററുടെ കൊലപാതകത്തിലും സര്‍ക്കാര്‍ സി.പി.എമ്മിനെ വഴിവിട്ട്‌ സഹായിച്ചെന്നാണ്‌ ആക്ഷേപം. ഇത്‌ ശരിവയ്‌ക്കുന്ന രീതിയിലാണ്‌ എല്‍.ഡി.എഫിന്റെ തീരുമാനങ്ങള്‍.
വിലക്കയറ്റത്തിനെതിരെ ചെന്നിത്തല മുഖ്യമന്ത്രിക്ക്‌ കത്തെഴുതിയപ്പോള്‍ വയലാര്‍ രവിയടക്കമുള്ള നേതാക്കളും കെ.എം മാണിയെ പോലുള്ള ഘടകക്ഷി നേതാക്കളും മുഖ്യമന്ത്രിക്ക്‌ പിന്തുണയുമായി എത്തിയിരുന്നു. എന്നാല്‍ ടി.പി വധത്തിലെ 20 പ്രതികളെ വെറുതെ വിട്ടതോടെ സ്ഥിതി മാറി. ഉമ്മന്‍ചാണ്ടിക്കും ആഭ്യന്തരവകുപ്പിനുമെതിരെ എല്ലാവരും തിരിഞ്ഞു. ആഭ്യന്തരമന്ത്രി തിരുവഞ്ചൂര്‍ രാധാകൃഷ്‌ണനെ കുറ്റപ്പെടുത്താതെ മുഖ്യമന്ത്രിയിലേക്ക്‌ വിമര്‍ശനം നീങ്ങുന്നത്‌ ഐ ഗ്രൂപ്പിന്റെയും ഘടകക്ഷികളുടെയും കൂട്ടായ തീരുമാനമാണെന്നറിയുന്നു. മുരളീധരനാണ്‌ ഇതിന്‌ ചുക്കാന്‍ പിടിക്കുന്നതെന്നും സൂചനയുണ്ട്‌.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെ ഫെയ്‌ബുക്ക്‌ Like ചെയ്യുക
https://www.facebook.com/Malayalivartha
