ജനതാദള്‍ തെറ്റയിലിനെഒഴിവാക്കുന്നു
ലൈംഗികാപവാദ കേസില്‍ നിന്ന് കഷ്ടിച്ച് തടിയൂരിയ ജോസ് തെറ്റയില്‍ എം.എല്‍.എയെ സ്വന്തം പാര്‍ട്ടിക്ക് വേണ്ടാതായി. പാര്‍ട്ടി പരിപാടികളിലും കമ്മിറ്റികളിലും തെറ്റയിലിനെ അടുപ്പിക്കുന്നില്ല. സംസ്ഥാന പ്രസിഡന്റ് മാത്യു ടി. തോമസ് നയിക്കുന്ന ജനതാമുന്നേറ്റ യാത്രയില്‍ പങ്കെടുക്കരുതെന്ന് തെറ്റയിലിനോട് പാര്‍ട്ടി ആവശ്യപ്പെട്ടിട്ടുണ്ട്. പാര്‍ട്ടിയിലെ ഏറ്റവും പ്രബലനായ നേതാവായിരുന്നു തെറ്റയില്‍.
ലൈംഗികാരോപണത്തില്‍ കുടുങ്ങിയപ്പോള്‍ ജോസ് തെറ്റയില്‍ എം.എല്‍.എ രാജി വെക്കേണ്ടതില്ലെന്ന് ജനതാദള്‍ ഒറ്റക്കെട്ടായി നിലപാടെടുത്തെങ്കിലും തുടര്‍ന്നങ്ങോട്ട് ഈ പിന്തുണ ഉണ്ടായില്ല.
തെറ്റയില്‍ രാജി സന്നദ്ധത അറിയിച്ചെങ്കിലും ഉപതെരഞ്ഞെടുപ്പിലെ വിജയസാധ്യതയെ കുറിച്ച് സംശയമുളളതിനാല്‍ എല്‍.ഡി.എഫും എം.എല്‍.എയെ കൈവിട്ടില്ല. ബലാത്സംഗ കേസില്‍ തെറ്റയിലിനെതിരായ എഫ്.ഐ.ആര്‍ ഹൈക്കോടതി റദ്ദാക്കിയിരുന്നു. പാര്‍ട്ടിയോ മുന്നണിയോ പിന്നെ തിരിഞ്ഞു നോക്കിയിട്ടില്ല. ജനതാദള്‍ കമ്മിറ്റികള്‍ അറിയിക്കാറില്ല. സ്വന്തം മണ്ഡലമായ അങ്കമാലിയില്‍ പോലും പാര്‍ട്ടി സംഘടിപ്പിക്കുന്ന പരിപാടികള്‍ എം.എല്‍.എ അറിയുന്നില്ല. അടുത്തമാസം 4ന് സംസ്ഥാന പ്രസിഡന്റ് മാത്യു ടി. തോമസ് നയിക്കുന്ന ജനതാമുന്നേറ്റ യാത്രയില്‍ പങ്കെടുക്കരുതെന്ന് തെറ്റയിലിന് പാര്‍ട്ടി പ്രത്യേക നിര്‍ദേശം നല്‍കിക്കഴിഞ്ഞു. യാത്രയുടെ ഫ്‌ളക്‌സുകളില്‍ മുഴുവന്‍ നേതാക്കളുടെയും ചിത്രമുണ്ടെങ്കിലും പ്രധാന നേതാവായ തെറ്റയിലിനെ ഒഴിവാക്കി.
പാര്‍ട്ടിയുടെ തിരസ്‌കാരം ശക്തമാകുന്നതിനിടെ പഴയ നേതാവ് എം.പി. വീരേന്ദ്രകുമാര്‍ തെറ്റയിലിനെ ഒപ്പം കൂട്ടാന്‍ ശ്രമം തുടങ്ങിയതായി സൂചനയുണ്ട്. എന്നാല്‍ ഇതിനോട് പ്രതികരിക്കാന്‍ തെറ്റയില്‍ തയാറായിട്ടില്ല.
നീലലോഹിത ദാസിനൊപ്പം ബി.എസ്.പിയില്‍ ചേര്‍ന്ന് ജനതാദളില്‍ തിരിച്ചെത്തിയതോടെ പാര്‍ട്ടിയില്‍ മാത്യു.ടി തോമസ് വിഭാഗത്തിന് മേല്‍ക്കൈ നേടാനായിട്ടുണ്ട്. ഇതിനിടെ ലൈംഗികാപവാദത്തില്‍ കൂടി കുരുങ്ങിയതോടെ തെറ്റയിലിനെ ഒതുക്കാന്‍ കാത്തിരുന്നവര്‍ അവസരം പരമാവധി ഉപയോഗപ്പെടുത്തുകയായിരുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
