തച്ചങ്കരിക്ക് സ്പോണ്സര്; ആഭ്യന്തരമന്ത്രി
തച്ചങ്കരിക്ക് പുതിയ സ്പോണ്സര്; ആഭ്യന്തരമന്ത്രി തിരുവഞ്ചൂര് രാധാകൃഷ്ണന്. ആഭ്യന്തരമന്ത്രിയോട് തച്ചങ്കരിയെ സഹായിക്കണമെന്ന് പറഞ്ഞത് മുഖ്യമന്ത്രി ഉമ്മന്ചാണ്ടി. ഒടുവില് തച്ചങ്കരിക്ക് പ്രമോഷന് നല്കാനുള്ള ഫയലില് താന് ഒപ്പിട്ടില്ലെന്ന് വരെ ആഭ്യന്തരമന്ത്രിക്ക് പറയേണ്ടിവന്നു. എന്നാല് തച്ചങ്കരിക്കെതിരെയുള്ള ഡി.ജി.പി യുടെ റിപ്പോര്ട്ട് പൂഴ്ത്തിയതിനെക്കുറിച്ച് മന്ത്രി ഒന്നും പറഞ്ഞില്ല.
തച്ചങ്കരിയെ പിരിച്ചുവിടണമെന്ന ഡിജിപിയുടെ ശുപാര്ശയാണ് ആഭ്യന്തരമന്ത്രിയുടെ ഫ്രീസറില് കയറിയത്. ഇതിനെതിരെ ബാലകൃഷ്ണപിള്ളയും കെ. മുരളീധരനും രംഗത്തെത്തിയതോടെ തച്ചങ്കരിയും കോണ്ഗ്രസ് ഗ്രൂപ്പ് യുദ്ധത്തിന്റെ ഭാഗമായി.
തച്ചങ്കരിയെ സര്വീസില് പ്രവേശിപ്പിച്ചത് ഉമ്മന്ചാണ്ടിയാണ്. തസ്തിക നല്കാതെ കുറച്ചുകാലം പുറത്തുനിര്ത്തി. എന്നാല് ജോലി ചെയ്യാതെ ശമ്പളം നല്കാനാവില്ലെന്ന് ധനവകുപ്പിന്റെ നിലപാടിനെതുടര്ന്ന് തച്ചങ്കരിക്ക് ഉമ്മന്ചാണ്ടി നിയമനം നല്കി.
തീവ്രവാദകേസിലാണ് തച്ചങ്കരി സംശയിക്കപ്പെടുന്നത്. തച്ചങ്കരി കുറ്റക്കാരനാണെന്ന് തെളിഞ്ഞിട്ടും നടപടിയെടുക്കാന് സര്ക്കാര് തയ്യാറാവുന്നില്ല. കുറ്റക്കാരന് സ്ഥാനകയറ്റം നല്കുന്നതാണ് കേരളത്തിലെ പതിവെന്ന് മുരളീധരന് പറയേണ്ടി വന്നു.
ഡി.ജി.പി, ചീഫ് സെക്രട്ടറിക്ക് നല്കിയ ശുപാര്ശ സര്ക്കാര് അംഗീകരിക്കാനിടയില്ല. ക്രിമിനല് പശ്ചാത്തലമുള്ള ഒരാള് എ.ഡി.ജി.പി ആയാല് പോലീസ് എങ്ങോട്ട് പോകുമെന്ന് സംശയിക്കുന്ന സാധാരണക്കാര് കേരളത്തില് നിരവധിയാണ്.
മുഖ്യമന്ത്രിയുടെ നിര്ദ്ദേശാനുസരണമാണ് താന് പ്രവര്ത്തിക്കുന്നതെന്ന് ആഭ്യന്തരമന്ത്രി രഹസ്യമായി പറയുന്നുമുണ്ട്. ഒരാള്ക്ക് അര്ഹതപ്പെട്ട പ്രമോഷന് തടഞ്ഞുവയ്ക്കാന് നിയമമില്ലെന്ന് മുഖ്യമന്ത്രിയും രഹസ്യമായി സമ്മതിക്കുന്നുണ്ട്.
https://www.facebook.com/Malayalivartha
