ഉദ്യോഗസ്ഥരെ ഇറക്കി സിപിഎം ജനസമ്പര്ക്കം പൊളിക്കും
മുഖ്യമന്ത്രി ഉമ്മന്ചാണ്ടി തലസ്ഥാനത്ത് ആരംഭിച്ച രണ്ടാം ജനസമ്പര്ക്കത്തെ അട്ടിമറിക്കാന് സി.പി.ഐ(എം) ഉദ്യോഗതലത്തില് രഹസ്യനിര്ദ്ദേശം നല്കി. ജനസമ്പര്ക്കത്തില് ലഭിക്കുന്ന അപേക്ഷകള് നിഷ്കരുണം നിരസിക്കാനും അതുവഴി ഗുണഭോക്താക്കളെ സര്ക്കാരിന് എതിരാക്കാനുമാണ് സിപിഎം പ്ലാന്. സര്ക്കാര് സര്വ്വീസിലെ 75 ശതമാനം വരുന്ന ഇടതുയൂണിയന്കാരായ ഉദ്യോഗസ്ഥര് വിചാരിച്ചാല് ഇത് നിസാരമായി നടക്കുമെന്ന് സിപിഎം സംസ്ഥാന നേതൃത്വം കീഴ് ഘടകങ്ങള്ക്ക് നിര്ദ്ദേശം നല്കി കഴിഞ്ഞു.
ജനസമ്പര്ക്കത്തെയാണ് സിപിഎം ഭയപ്പെടുന്നത്. ആദ്യഘട്ട ജനസമ്പര്ക്കത്തില് ഉമ്മന്ചാണ്ടിക്ക് ലഭിച്ച ജനപിന്തുണ തകര്ക്കാന് സോളാര് വിവാദത്തിന് കഴിഞ്ഞതായി സിപിഎം കരുതുന്നു. സോളാര് വിവാദം കത്തിച്ചു നിര്ത്തിയെങ്കിലും രണ്ടാം ജനസമ്പര്ക്കവുമായി ഉമ്മന്ചാണ്ടി രംഗത്തുവന്നത് സിപിഎമ്മിനെ പരിഭ്രാന്തരാക്കുന്നു.
സിപിഎം നിയമസഭാംഗങ്ങള് ത്രിശങ്കുവിലാണ്. അവര്ക്ക് സ്വന്തം മണ്ഡലത്തിലെ ജനസമ്പര്ക്ക അപേക്ഷകള് പരിഗണിക്കാതിരിക്കാന് കഴിയുന്നില്ല. പരസ്യമായി ജനസമ്പര്ക്കത്തെ അനുകൂലിക്കുന്നില്ലെങ്കിലും രഹസ്യമായി ഇവര് ജനസമ്പര്ക്കത്തോടൊപ്പമാണ്.
ജനസമ്പര്ക്കത്തിനെത്തുന്നവരെ തടയുന്നതില് നിന്നും സി പി എം പിന്മാറി കഴിഞ്ഞു. ജനവികാരം എതിരാകുമെന്ന തിരിച്ചറിവിനെ തുടര്ന്നാണ് ഇത്. ഉപരോധ ഭീഷണി വകവയ്ക്കാതെ ജനസമ്പര്ക്ക വേദിയില് നടന്നെത്തിയ മുഖ്യമന്ത്രി സിപിഎം സംസ്ഥാനനേതൃത്വത്തെ അമ്പരപ്പിച്ചു.
സംസ്ഥാനമൊട്ടാകെ 1,28,535 പരാതികളാണ് ജനസമ്പര്ക്ക പരിപാടിയില് ഇതുവരെ ലഭിച്ചത്. തിരുവനന്തപുരത്തെ ജനസമ്പര്ക്ക പരിപാടിയില് 15,000 പരാതികള്ക്ക് പരിഹാരം കാണും.
ഉദ്യോഗതലത്തില് നടത്തുന്ന അട്ടിമറി പ്രവര്ത്തനങ്ങള് സി.പി.എം സംസ്ഥാനനേതൃത്വം വിലയിരുത്തും. കിട്ടുന്ന പരാതികളില് തടസ്സവാദങ്ങള് എഴുതാനാണ് ഉദ്യോഗസ്ഥര് ഉദ്ദേശിക്കുന്നത്. പരാതി പരിഹരിക്കാന് മുഖ്യമന്ത്രിക്ക് ഉത്തരവ് നല്കാമെങ്കിലും പരാതികള് പരിഹരിക്കുന്നതിനു മുമ്പ് ഉദ്യോഗസ്ഥതലത്തില് പരിശോധനകള് നടത്തും. ഇല്ലെങ്കില് അനര്ഹമായ ആനുകൂല്യങ്ങള് നല്കേണ്ടി വരുമെന്നാണ് ഉദ്യോഗസ്ഥര് പറയുന്നത്.
സി പി എം ഉദ്യോഗസ്ഥരെ ഇറക്കി അട്ടിമറി വിജയിപ്പിക്കുമ്പോള് കോണ്ഗ്രസുകാര് ഉറങ്ങുകയാണ്. ജനസമ്പര്ക്ക അപേക്ഷകള് പരിഹരിക്കേണ്ട സീറ്റുകളിലിരിക്കുന്നവരില് അധികവും ഇടതുമുന്നണിക്കാരായ ഉദ്യോഗസ്ഥരാണ്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
https://www.facebook.com/Malayalivartha
