കപ്പലിലെ ആയുധങ്ങള്‍ മലയാളി തീവ്രവാദികള്‍ക്ക്‌?
തൂത്തുകുടി തുറമുഖത്ത്‌ ആയുധങ്ങളുമായി പിടിയിലായ അമേരിക്കന്‍ കപ്പലിനുള്ള കേരള ബന്ധത്തെ കുറിച്ച്‌ അന്വേഷിക്കുന്ന ക്യൂ ബ്രാഞ്ച്‌ മലയാളികളായ ചില തീവ്രവാദികള്‍ക്ക്‌ കപ്പലിലുള്ള ആയുധങ്ങളുമായി ബന്ധമുണ്ടെന്ന്‌ സംശയിക്കുന്നു.
കപ്പലിന്‌ ഡീസലടിക്കാന്‍ പണം നല്‍കിയ കൊച്ചി സ്വദേശിയെ കേന്ദ്രീകരിച്ചാണ്‌ അന്വേഷണം പുരോഗമിക്കുന്നത്‌. മലബാറിലെ വിവിധ ഭാഗങ്ങളില്‍ അടുത്തകാലത്തായി നടന്ന ആയുധവേട്ടയുടെ വിശദാംശങ്ങള്‍ ക്യൂ ബ്രാഞ്ച്‌ തേടി കഴിഞ്ഞു.
കഴിഞ്ഞദിവസം അറസ്റ്റിലായ ഒരു മത്സ്യ തൊഴിലാളിയുടെ അക്കൗണ്ടിലേക്ക് കൊച്ചിയിലെ ന്യൂജനറേഷന്‍ ബാങ്ക്‌ വഴിയാണ്‌ കൊച്ചി സ്വദേശി പണം അയച്ചത്‌. എന്നാല്‍ കൂടുതല്‍ വിവരങ്ങള്‍ പുറത്തുവിടാന്‍ ക്യൂ ബ്രാഞ്ച്‌ തയ്യാറായിട്ടില്ല.
അനധികൃതമായി ഇന്ത്യന്‍ തീരത്തേക്ക്‌ കടന്ന കപ്പലിന്‌ ഡീസല്‍ അടിക്കാന്‍ സൗകര്യം നല്‍കിയാതാര്‌ എന്നതിനെക്കുറിച്ചും ക്യൂ ബ്രാഞ്ച്‌ വിശദമായി അന്വേഷിക്കുന്നുണ്ട്‌. ആയുധങ്ങള്‍ ആര്‍ക്കുവേണ്ടിയാണ്‌ കൊണ്ടു വന്നതെന്നും അന്വേഷിക്കുന്നു. ഡീസലടിക്കാന്‍ മലയാളി പണം നല്‍കിയെങ്കില്‍ ആയുധങ്ങള്‍ മലയാളിക്കുവേണ്ടി എത്തിച്ചതെന്നാണ്‌ ക്യൂ ബ്രാഞ്ചിന്റെ സംശയം. ആഗസ്റ്റ്‌ 28 ന്‌ കൊച്ചിയില്‍ കപ്പല്‍ പരിശോധിച്ചെങ്കിലും ആയുധങ്ങള്‍ കണ്ടെത്തിയിരുന്നില്ല. പിന്നീട്‌ കപ്പല്‍ ഷാര്‍ജയിലെത്തി. ഇതിനിടയില്‍ എവിടെയാണ്‌ ആയുധങ്ങള്‍ കയറ്റിയതെന്നാണ്‌ അന്വേഷിക്കുന്നത്‌.
ഒറീസയിലെ കൊടുങ്കാറ്റ്‌ ഭയന്നാണ്‌ കപ്പല്‍ ഇന്ത്യന്‍ തീരത്തേക്ക്‌ തിരിച്ചതെന്ന ക്യാപ്‌റ്റന്റെ വിശദീകരണം പോലീസ് മുഖവിലക്കെടുത്തിട്ടില്ല. കപ്പല്‍ ജീവനക്കാരുടെ മൊഴികളിലും വൈരുദ്ധ്യമുണ്ട്‌. ഏതെങ്കിലും സംസ്ഥാനത്ത്‌ ആയുധങ്ങള്‍ വന്‍തോതില്‍ എത്തുന്നുണ്ടോ എന്നാണ്‌ പോലീസ് അന്വേഷിക്കുന്നത്‌. ആയുധ ശേഖരത്തിന്‌ കേരളം കുപ്രസിദ്ധമാണ്‌.
https://www.facebook.com/Malayalivartha
