അമ്മമാരെ സ്നേഹിക്കുന്നവര് അറിയാന് , മക്കള് ഉപേക്ഷിക്കുന്ന അമ്മമാര് പെരുകുന്നു
കേരളത്തിനകത്തും പുറത്തുമുള്ള പ്രസിദ്ധമായ ക്ഷേത്രങ്ങളുടെ മറ്റ് ദേവാലയങ്ങളുടേയും പരിസരത്ത് അലഞ്ഞുതിരിയുന്ന അമ്മമാരുടെ വിശദാംശങ്ങള് ശേഖരിക്കാന് സര്ക്കാര് ഒരുങ്ങുന്നു.
ഗുരുവായൂര് അമ്പല പരിസരത്ത് മക്കള് ഉപേക്ഷിക്കുന്ന അമ്മമാരുടെ എണ്ണം പെരുകുന്ന പശ്ചാത്തലത്തിലാണ് അന്വേഷണം. സ്വന്തമായുണ്ടായിരുന്ന ഏഴരസെന്റ് സ്ഥലം തട്ടിയെടുത്തശേഷം ഗുരുവായൂരമ്പലത്തില് ഉപേക്ഷിക്കപ്പെട്ട ഒരമ്മയെ വനിതാ കമ്മീഷന് കണ്ടെത്തി മകനെ തിരിച്ചേല്പിച്ചു. ഇത്തരത്തില് അമ്മമാരെ ഉപേക്ഷിക്കുന്ന മക്കളുടെ എണ്ണം കേരളത്തില് വര്ധിക്കുന്നുവെന്നാണ് സര്ക്കാര് കണ്ടെത്തല്. ചില കേസുകളില് മക്കളുടേയും മരുമക്കളുടേയും പീഡനം സഹിക്കാന് കഴിയാതെ വീട്ടില് നിന്നും ഇറങ്ങിപോകുന്ന അമ്മമാരുമുണ്ട്.
ക്ഷേത്രങ്ങളില് അമ്മമാര് എത്താനുള്ള പ്രധാന കാരണം അന്നദാനമാണ്. ക്ഷേത്രങ്ങളില് നിന്നും ലഭിക്കുന്ന സൗജന്യ ഭക്ഷണം കഴിച്ച് നാമജപവുമായി സന്തോഷത്തോടെ കഴിയുന്ന അമ്മമാരേയും ഗുരുവായൂരില് കാണാം. ഇവരിലധികവും ഭര്ത്താവ് മരിച്ചവരാണ്. പ്രവാസികളായ ആണ്മക്കളുടെ അമ്മമാരും ഇത്തരത്തില് എത്തുന്നുണ്ട്. മരുമക്കളുടെ ഉപദ്രവമാണ് ഇതിനുകാരണം.
സ്വത്തുക്കള് എഴുതിവാങ്ങിയ ശേഷമാണ് അമ്മമാരെ ഉപേക്ഷിക്കുന്നത്. ഇത്തരത്തിലുള്ള മക്കളെ നേരിടാന് നിയമങ്ങള് കര്ക്കശമാണെങ്കിലും പലപ്പോഴും നിയമങ്ങള് നോക്കുകുത്തിയാവുന്നു. മക്കള്ക്കെതിരെ കേസുനടത്താനും അമ്മമാര് ഒരുക്കമല്ല. ഗുരുവായൂരിലെത്തിയ വനിതാ കമ്മീഷന് പ്രതിനിധികളോട് തങ്ങള് സ്വന്തം ഇഷ്ടത്തോടെയാണ് അമ്പല നടയിലെത്തിയതെന്നും പറഞ്ഞ അമ്മമാര് നിരവധിയാണ്. എന്നാല് സര്ക്കാര് ഇവരുടെ വിവരങ്ങള് ശേഖരിച്ച് വീടുമായി ബന്ധപ്പെടാന് ഒരുങ്ങുകയാണ്. ശബരിമല,മൂകാംബിക,മധുര തുടങ്ങിയ സ്ഥലങ്ങളിലേക്കും സര്ക്കാര് അന്വേഷണം വ്യാപിപ്പിച്ചേക്കും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
