സ്ഥാനാര്‍ത്ഥി നിര്‍ണയം പൂര്‍ത്തിയാക്കിയിട്ടില്ലെങ്കിലും എറണാകുളം, കൊല്ലം, ആലപ്പുഴ, കോട്ടയം, ഇടുക്കി, തിരുവനന്തപുരം, പത്തനംതിട്ട, തൃശൂര്‍, മലപ്പുറം വയനാട് ജില്ലകളില്‍ എല്‍ഡിഎഫ് സ്ഥാനാര്‍ത്ഥികള്‍ ജയിക്കാനുള്ള സാധ്യത കുറവാണെന്ന് സിപിഎമ്മിന്റെ രഹസ്യ റിപ്പോര്‍ട്ട്.
സിപിഎം സംസ്ഥാന സെക്രട്ടറി ബാലകൃഷ്ണന്റെ നേതൃത്വത്തില്‍ പാര്‍ട്ടി ഏര്‍പ്പെടുത്തിയ നാലംഗ സംഘമാണ് കേരളമെമ്പാടും സന്ദര്‍ശിച്ച് രഹസ്യ റിപ്പോര്‍ട്ട് തയ്യാറാക്കിയത്. ഒരു സ്വകാര്യ ഏജന്‍സിയുടെ സംവിധാനങ്ങളാണ് ഇതിനായി ഉപയോഗിച്ചത്. എറണാകുളം ജില്ലയില്‍ എസ് ശര്‍മ്മക്കും സാജു പോളിനും മാത്രമാണ് വിജയസാധ്യതയെന്ന് റിപ്പോര്‍ട്ടില്‍ പറയുന്നു.
എറണാകുളം, പത്തനംതിട്ട, തിരുവനന്തപുരം ജില്ലകളില്‍ ജയസാധ്യതയില്ലാത്ത സ്ഥാനാര്‍ത്ഥികളെ ഇറക്കി കോണ്‍ഗ്രസ് സ്ഥാനാര്‍ത്ഥികളുടെ ജയം ഉറപ്പിക്കാനുള്ള ശ്രമങ്ങളാണ് നടക്കുന്നതെന്നും ആരോപണമുണ്ട്. ഇത്തരമൊരു പ്രതിസന്ധി എങ്ങനെ മറികടക്കും എന്നതിനെ കുറിച്ചാണ് കോടിയേരി ആലോചിക്കുന്നത്. കണ്ണൂര്‍, കാസര്‍കോട്, കോഴിക്കോട് ജില്ലകളില്‍ മാത്രമാണ് സിപിഎമ്മിന് ജയസാധ്യതയുള്ളത്.
അതേസമയം തെരഞ്ഞെടുപ്പ് ഫലത്തെ കുറിച്ച് പിണറായി വിജയന് പറയത്തക്ക ആകുലതകളൊന്നുമില്ല. കാരണം അധികാരത്തിലെത്തിയാല്‍ വിഎസ് അച്യുതാനന്ദന്‍ മുഖ്യമന്ത്രിയാകുമെന്ന് പിണറായി കരുതുന്നു. അങ്ങനെ വന്നാല്‍ തനിക്ക് ഭരണത്തില്‍ ഒരു സ്വാധീനവും ഉണ്ടാവുകയില്ല. അപ്പോള്‍ ഭരണം വേണമെന്നോ ഇല്ലെന്നോള്ള അഭിപ്രായം പിണറായിക്കില്ല.
അച്യുതാനന്ദനെയാണ് പാര്‍ട്ടിയുടെ അന്വേഷണ റിപ്പോര്‍ട്ട് ഏറെ വിഷമിപ്പിക്കുന്നത്. കോടിയേരിയും അതേ അവസ്ഥയില്‍ തന്നെയാണ്. വിവിധ മതവിഭാഗങ്ങളുടെ പിന്തുണയുള്ള സ്ഥാനാര്‍ത്ഥികളെ മത്സരിപ്പിക്കാനുള്ള തീരുമാനം ഇങ്ങനെയുണ്ടായതാണ്. മുകേഷ്, കെ പി,എസി ലളിത, വീണാജോര്‍ജ്, നികേഷ്‌കുമാര്‍ തുടങ്ങി കെട്ടിയിറക്കപ്പെട്ട സ്ഥാനാര്‍ത്ഥികള്‍ ഇപ്രകാരം വന്നു ചേര്‍ന്നവരാണ്.
അതേസമയം യുഡിഎഫ് ചിട്ടയായ പ്രവര്‍ത്തനങ്ങളിലൂടെ ഭരണതുടര്‍ച്ച ഉറപ്പു വരുത്താനുള്ള ശ്രമത്തിലാണ്. ഇന്നോളം കണ്ടിട്ടില്ലാത്ത പ്രവര്‍ത്തന രീതികളാണ് യുഡിഎഫ് കാഴ്ച വയ്ക്കുന്നത്. പണ്ട് ഒട്ടും വിയര്‍ക്കാത്തവരായിരുന്നു യുഡിഎഫുകാര്‍. എന്നാല്‍ ഇപ്പോള്‍ അങ്ങനെയല്ല. ഭരണതുടര്‍ച്ച ലഭിക്കുകയാണെങ്കില്‍ സിപിഎമ്മിനെ ബംഗാളിലെ അവസ്ഥയിലെത്തിക്കാനുമാണ് യുഡിഎഫ് കരുതുന്നത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha